الماتىدا ءدىن، ءدىني ەكسترەميزم مەن تەرروريزمنىڭ الدىن الۋ ماسەلەلەرى بويىنشا ب ا ق وكىلدەرى مەن بلوگەرلەرگە ارنالعان اقپاراتتىق جانە وقىتۋ سەمينارى ءوتتى.
بۇل سەمينارعا قالالىق جانە رەسپۋبليكالىق ب ا ق وكىلدەرى قاتىسىپ، ءبىلىم كوكجيەگىن كەڭەيتتى، دەپ حابارلايدى aqshamnews.kz.
ساباق بارىسىندا ساراپشىلار ءدىني ەكسترەميزم مەن تەرروريزمنىڭ الدىن الۋ تاقىرىبىندا قالام تەربەيتىن جۋرناليستەردىڭ جىبەرەتىن قاتەلىكتەرىن تىلگە تيەك ەتتتى.
«سالافيتتەر، ساقالدىلار، شولاق بالاقتىلار - بۇل جۋرناليستەردىڭ ءجيى قولداناتىن سوزدەرى. زاڭ تۇرعىسىنان العاندا بۇل دۇرىس ەمەس. ولار - ەڭ الدىمەن تەڭ قۇقىلى قازاقستان ازاماتتارى، قاراپايىم تۇرعىندار. سوندىقتان، سىرتقى كەلبەتىنە قاراپ وعان كۇيە جاعۋعا بولمايدى. اقپارات جازعاندا «سالافيتتەر» دەگەن ءسوزدى جازباس بۇرىن سوعان كوز جەتكىزگەن ابزال. ب ا ق وكىلدەرىنە ارنالعان سەميناردىڭ ماقساتى - تىلشىلەرگە ءدىني ەكسترەميزم مەن تەرروريزمنىڭ نە ەكەنىن ءتۇسىندىرۋ. جۋرناليستەر ءدىن سالاسىنىڭ ماماندارى ەمەس، سوندىقتان ولارعا باعىت-باعدار بەرۋ كەرەك»، - دەدى «قازاقستان رەسپۋبليكاسىنداعى تەرروريزم جانە ەكسترەميزم ماسەلەلەرىن زەرتتەۋ بويىنشا» قق پرەزيدەنتى كاكىمجان مۇراتجان ۇلى.
مامانداردىڭ ايتۋىنشا، ءدىن، ءدىني ەكسترەميزم مەن تەرروريزم تاقىرىبىندا ماقالا جازۋ وتە قيىن. سەبەبى، بۇل ۇعىمداردىڭ استارىندا ۇلكەن ءمان بار. ءتىپتى، ءقاۋىپتى دەسەك تە بولادى. سوندىقتان، قاتە جىبەرمەۋگە تىرىسۋ كەرەك. الەۋمەتتىك جەلىنى، تەلەارنانى، سايتتاردى ميلليونداعان ادام وقيدى، كورەدى، تىڭدايدى. ءجۋرناليستىڭ بىلمەستىكتەن جىبەرگەن قاتەسى ۇلكەن ساياسي داۋ تۋدىرۋى دا مۇمكىن.
«كەي جۋرناليستەر اقپاراتتىڭ انىق-قانىعىنا كوز جەتكىزبەي ءوز تاراپىنان ءتۇرلى ماقالالار جازادى. ءسويتىپ، ادامداردى شاتاستىرادى، ءوز ماماندىعىنا، ياعني جۋرناليستيكاعا نۇقسان كەلتىرۋى مۇمكىن. سوندىقتان ب ا ق وكىلدەرىن بىرلەسىپ جۇمىس ىستەۋگە شاقىرامىز»، - دەيدى كاكىمجان مۇراتجان ۇلى.
ايتا كەتەتىن جاي، اقپاراتتىق وقىتۋ سەمينارى 5 كۇنگە سوزىلادى. بۇل شاراعا قاتىسقان ب ا ق وكىلدەرى مەن بلوگەرلەرگە 5 كۇندىك وقىتۋ كۋرسى اياقتالىسىمەن ارنايى سەرتيفيكات بەرىلەدى. بەرىلگەن سەرتيفيكات ەكسترەميزم مەن تەرروريزمدى الدىن الۋ تاقىرىبىندا قالام تەربەپ جۇرگەن جۋرناليستەردىڭ بۇل تاقىرىپتا قاتە جىبەرمەۋىنە ۇلكەن ۇلەس قوسادى دەپ سەنىم ارتۋدا ۇيىمداستىرۋشىلار.