تانىمال جۋرناليست، ۆەلوشاباندوز ەرنات راحمەتوللا اباي قۇنانباي ۇلىنىڭ 180 جىلدىعىنا وراي اقش-تا ۆەلوشەرۋ وتكىزۋگە بەل بۋعانىن ايتتى، - دەپ حابارلايدى اqshamnews.kz ءتىلشىسى.
بۇل تۋرالى ول الەۋمەتتىك جەلىدەگى پاراقشاسىندا ءبولىستى.
"كەزەكتى ۆەلوشەرۋىمدى اقش-تا وتكىزۋگە بەلدى بەكەم بۋدىم. كورمەگەن ەل، جۇرمەگەن جەر. “كەلە قال، ءدامدى تاعام مەن جايلى توسەگىڭ دايىن” دەپ كۇتىپ وتىرعان ەشكىمىم دە جوق. اقش-تى اۋزىن ايعا بىلەگەن الەمدەگى ەڭ الپاۋىت، ەكونوميكا جانە اسكەري جاعىنان №1 ەل ەكەنىن بىلەمىز. كولىك، پويىز، ۇشاق ەمەس، بەلەسەبەتپەن ارالاۋدىڭ قىزىعى ءوز الدىنا. كوبىرەك كورەسىڭ، جاقىنىراق تانيسىڭ. ارينە قيىندىعى دا بولادى. ولاردى شەشە ءبىلۋ، توزە ءبىلۋ – اباي اتام ايتپاقشى، جىلى جۇرەك، نۇرلى اقىل، ىستىق قايرات، مىنەزدى قاجەت ەتەرى ءسوزسىز"، - دەدى ول.
جۋرناليست اقش-تاعى “اباي ۆەلوشەرۋىنەن” كۇندەلىك جازىپ، ءبولىسىپ وتىراتىنىن ايتتى.
ايتا كەتەيىك، بيىل ۇلى ابايدىڭ 180 جىل مەرەيتويى اتاپ وتىلەدى. ول 1845 جىلى 10 تامىزدا شىعىس قازاقستان وبلىسى (بۇرىنعى سەمەي ۋەزى) اباي اۋدانىندا (بۇرىنعى شىڭعىستاۋ وبلىسى) شىڭعىس تاۋىنىڭ باۋىرىندا دۇنيەگە كەلدى.
اباي اتاقتى توبىقتى رۋىنىڭ ىرعىزباي دەگەن توبىنان تارايدى. ول اۋىل مولداسىنان وقىپ جۇرگەن كىشكەنتاي كەزىنەن-اق زەرەكتىگىمەن كوزگە تۇسەدى. كەيىن ول سەمەي قالاسىندا 3 جىلدىق مەدرەسە تاربيەسىن الادى.
اباي كوپتى كورگەن اجەسى زەرەنىڭ تاربيەسىندە بولدى. شەشەسى ۇلجان دا اقىلدى انانىڭ ءبىرى بولعان. اكەسى قۇنانباي وسكەنباي ۇلى ورتا جاسقا كەلگەندە اتقا ءمىنىپ، ەل بيلەۋ جۇمىسىنا ارالاسقان زامانى، رەسەي پاتشالىعىنىڭ قازاقستاننىڭ باتىسى مەن ورتالىق ايماعىن وتارلاپ، ەل بيلەۋ جۇيەسىن ءوز تارتىبىنە كوندىرە باستاعان كەز.