قىرعىزستاندا جۇرگىزۋشى كۋالىگىن الۋ ءتارتىبى مەن وقۋ مەرزىمى وزگەردى، دەپ حابارلايدى، Aqshamnews.kz ءتىلشىسى.
پرەزيدەنت ىستەرى باسقارماسىنىڭ مالىمەتىنە سايكەس، 2026 جىلدان باستاپ ەلدەگى بارلىق جەكەمەنشىك اۆتومەكتەپتەر تولىقتاي مەملەكەتتىك باقىلاۋعا وتەدى. بۇل شەشىم سىبايلاس جەمقورلىقتىڭ الدىن الۋ ماقساتىندا قابىلدانعان. ەندى B ساناتى بويىنشا جۇرگىزۋشىلەر 10 اي (480 ساعات)، ال C ساناتى بويىنشا 12 اي وقيدى.
وقۋ باعدارلاماسىنا جول قوزعالىسى ەرەجەلەرى، اۆتوكولىك قۇرىلىمى مەن تەحنيكالىق قىزمەت كورسەتۋ، جول-كولىك وقيعاسى كەزىندەگى العاشقى مەديسينالىق كومەك، ءقاۋىپسىز جۇرگىزۋ نەگىزدەرى، قۇقىقتىق جانە پسيحوفيزيولوگيالىق دايىندىق، سونداي-اق جۇرگىزۋشى ادەبى ەنگىزىلگەن.
ەمتيحان سۇراقتارىنىڭ سانى 750-دەن 2000-عا دەيىن ارتتى. تەوريالىق ەمتيحاندى جاساندى ينتەللەكت قابىلدايدى.
جۇرگىزۋشى كۋرستارىنا ونلاين ءوتىنىم «تۋندۋك» پلاتفورماسى ارقىلى قابىلدانادى. وقۋ قۇنى، ءوتىنىم بەرۋ ءتارتىبى جانە اۆتومەكتەپتەر ءتىزىمى كەلەسى اپتادا جاريالانباق.
سونىمەن قاتار، قىرعىزستاندا 2026 جىلدىڭ 15 قاڭتارى مەن 15 اقپانى ارالىعىندا ەسكى نەمەسە مەرزىمسىز جۇرگىزۋشى كۋالىكتەرىن 10 جىلعا جارامدى جاڭا كۋالىككە تەگىن اۋىستىرۋ ناۋقانى وتەدى.
ايتا كەتەيىك، بۇعان دەيىن ەلدە 2027 جىلدىڭ 31 جەلتوقسانىنا دەيىن اۆتومەكتەپتەرگە ليسەنزيا بەرۋگە موراتوريي ەنگىزىلگەنى حابارلانعان.