پرەزيدەنت قاسىم-جومارت توقايەۆ قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ابىلقاسىموۆامەن كەزدەستى، دەپ حابارلايدى، Aqshamnews.kz ءتىلشىسى.
مەملەكەت باسشىسىنا قارجى نارىعىنىڭ 2025 جىلعى دامۋ ناتيجەلەرى مەن الداعى كەزەڭگە ارنالعان نەگىزگى مىندەتتەر جونىندە ەسەپ بەرىلدى.
ءمادينا ءابىلقاسىموۆا وتكەن جىلى بانك سەكتورىنىڭ تۇراقتىلىعى ساقتالعانىن اتاپ ءوتتى. جىل سايىنعى قاداعالاۋ جانە باعالاۋ سيكلى تولىق اياقتالعان. بانكتەردىڭ اكتيۆتەرى 11 پايىزعا ءوسىپ، 68،3 تريلليون تەڭگەگە جەتتى. ال كاپيتال جەتكىلىكتىلىگى 20،7 پايىزدى قۇرادى.
سونىمەن قاتار بانكتەر تۋرالى جاڭا زاڭ جوباسى، ينۆەستيسيالىق قورلار مەن رەيتينگتىك قىزمەتتى رەتتەيتىن زاڭدار ازىرلەنگەنى ايتىلدى.
2025 جىلعى قاراشاداعى مالىمەت بويىنشا بيزنەسكە بەرىلگەن كرەديت كولەمى 17،9 پايىزعا ارتىپ، 14،8 تريلليون تەڭگەگە جەتكەن. كاسىپكەرلەر جالپى سوماسى 17،5 تريلليون تەڭگەگە جاڭا نەسيەلەر راسىمدەگەن. بانكتەر بىرلەسىپ 2،3 تريلليون تەڭگە بولاتىن 8 سينديكاتتالعان جوبانى قارجىلاندىردى.
شاعىن جانە ورتا بيزنەستى قولداۋ ماقساتىندا 2025 جىلدىڭ ماۋسىمىندا «دامۋ» قورى جانىنان كەپىلدىك قورى قۇرىلىپ، بۇگىنگە دەيىن 505 ميلليارد تەڭگە كولەمىندە نەسيە كەپىلدىگى بەرىلگەن.
تۇتىنۋشىلىق كرەديت بەرۋ كولەمى 2024 جىلمەن سالىستىرعاندا ەكى ەسە قىسقارعان. حالىقتىڭ شامادان تىس قارىز الۋىن شەكتەۋ ءۇشىن تولەمى كەشىكتىرىلگەن جاعدايدا 5 جىلدان استام مەرزىمگە نەسيە بەرۋگە تىيىم سالىندى. سونداي-اق تاۋەكەلى جوعارى جانە 3–5 جىلدىق قارىزدارعا قوسىمشا شەكتەۋلەر ەنگىزىلدى. قارىز الۋشى تابىسىنا بايلانىستى بورىشتىق جۇكتەمەنىڭ جاڭا كوەففيسيەنتى بەكىتىلدى.
قارىز جۇكتەمەسىن ازايتۋ ماقساتىندا بانكتەر مەن ميكروقارجى ۇيىمدارى 703 مىڭ ازاماتتىڭ بەرەشەگىن قايتا قاراپ، ءىشىنارا كەشىرىم جاساعان. جەكە تۇلعالاردىڭ بانكروتتىعى تۋرالى زاڭ كۇشىنە ەنگەننەن بەرى 56 مىڭ ادامنىڭ 209،7 ميلليارد تەڭگە قارىزى ەسەپتەن شىعارىلدى.
يپوتەكالىق تۇرعىن ءۇي زايمدارىن قايتا قارجىلاندىرۋ باعدارلاماسى اياسىندا 1،2 مىڭ قارىز الۋشىعا قولداۋ كورسەتىلدى.
قارجىلىق الاياقتىقپەن كۇرەس اياسىندا كرەديت راسىمدەۋ كەزىندە «شەشىم قابىلداۋ كەزەڭى» زاڭناماعا ەنگىزىلدى. العاشقى نەسيە ازاماتتىڭ جەكە قاتىسۋىمەن عانا بەرىلەدى. سونىمەن قاتار الاياقتىق فاكتىلەرى بويىنشا كرەديتتى سوت ارقىلى جانە سوتتان تىس تارتىپپەن ەسەپتەن شىعارۋ تەتىكتەرى كەڭەيتىلدى.
2025 جىلى اگەنتتىك بانكتەرگە 49 رەت تەكسەرىس جۇرگىزسە، ساقتاندىرۋ نارىعى قاتىسۋشىلارى 47، باعالى قاعازدار نارىعى 54، ميكروقارجى ۇيىمدارى مەن كوللەكتورلىق اگەنتتىكتەر 260 مارتە تەكسەرىلگەن. ناتيجەسىندە 628 قاداعالاۋ شاراسى قولدانىلىپ، 641،3 ميلليون تەڭگە كولەمىندە ايىپپۇل سالىندى.
ميكروقارجىلاندىرۋ جانە كوللەكتورلىق نارىقتاعى 58 ۇيىم ليسەنزياسىنان ايىرىلدى. ونىڭ ىشىندە 23 سۋبەكتتىڭ قىزمەتى ءماجبۇرلى تۇردە توقتاتىلىپ، 9 ۇيىمنىڭ ليسەنزياسى تولىق قايتارىلىپ الىنعان.
كەزدەسۋ قورىتىندىسىندا مەملەكەت باسشىسى قارجى تۇراقتىلىعىن ساقتاۋ، ەكونوميكانىڭ ناقتى سەكتورىن نەسيەلەۋدى كۇشەيتۋ جانە قارجى قىزمەتتەرىن تۇتىنۋشىلاردىڭ قۇقىقتارىن قورعاۋ باعىتىندا ناقتى تاپسىرمالار بەردى.