ق ر ۇكىمەتىنىڭ وتىرىسىندا اعىمداعى سۋ تاسقىنى جاعدايى، سونداي-اق كوكتەمگى ماۋسىمعا جانە بولۋى مۇمكىن توتەنشە جاعدايلارعا دايىندىق شارالارى تالقىلاندى، دەپ حابارلايدى almaty-akshamy.kz
توتەنشە جاعدايلار ءمينيسترى شىڭعىس ءارىنوۆ بۇگىندە رەسپۋبليكادا سۋ تاسقىنى جاعدايى تۇراقتى ەكەنىن ايتتى. بۇل رەتتە ۆەدومستۆو جەرگىلىكتى اتقارۋشى ورگاندارمەن بىرلەسىپ سۋ تاسقىنى كەزەڭىنە دايىندىق بويىنشا قاجەتتى ءىس-شارالار كەشەنىن وتكىزدى.
اتاپ ايتقاندا، «كوكتەم» رەسپۋبليكالىق كوماندالىق-شتابتىق وقۋ-جاتتىعۋ شەڭبەرىندە باسقارۋ ورگاندارىنىڭ كۇشتەرى مەن قۇرالدارىنىڭ ناقتى دايىندىعى تەكسەرىلدى. حالىقتى قۇلاقتاندىرۋ پىسىقتالدى، زارداپ شەككەن ازاماتتاردى جيناۋ پۋنكتتەرى دايىندالدى.
- بۇدان بولەك، ەلدى مەكەندەردە ۋاقىتشا بوگەندەر سالۋ جانە ۇيەمەلەۋ (114 كم)، ارىقتاردى، كانالداردى (1 904 كم)، سونداي-اق اۆتو جانە تەمىر جولدارداعى سۋ وتكىزۋ قۇرىلىستارىن تازارتۋ (5 002 دانا) ناقتى تۇردە جۇزەگە اسىرىلدى. ەلدى مەكەندەردەن 10،5 ملن تەكشە مەتردەن استام قار شىعارىلدى.
- كوكتەم ماۋسىمىنا ناقتىلانعان گيدروبولجاۋ بويىنشا ەكولوگيا جانە تابيعي رەسۋرستار ءمينيسترى ەرلان نىسانبايەۆ، سۋ قويمالارىن تاسقىن سۋدى قابىلداۋ جانە جيناقتاۋعا دايىنداۋ تۋرالى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ، اۆتو جانە تەمىر جولداردىڭ جاعدايى بويىنشا كولىك ءمينيسترى مارات قارابايەۆ باياندادى.
سونداي-اق شىعىس قازاقستان، اقتوبە جانە اتىراۋ وبلىستارىنىڭ اكىمدەرى الداعى سۋ تاسقىنى كەزەڭىنە دايىندىق شارالارى تۋرالى مالىمەت بەردى.
پرەمەر-مينيستر بۇعان دەيىن وڭىرلەردە سۋ تاسقىنىنا قارسى بارلىق ءىس-شارالاردى ساپالى ىسكە اسىرۋ قاجەتتىگى تۋرالى بىرنەشە رەت تاپسىرمالار بەرىلگەنىن اتاپ ءوتتى. الايدا مەملەكەتتىك ورگاندار مەن اكىمدىكتەر ءتيىستى شارالاردى تولىق كولەمدە قابىلداعان جوق.
«ناتيجەسىندە 218 ءىس-شارانىڭ 92ء-سى وسى ۋاقىتقا دەيىن ورىندالماي وتىر. جۇمىسقا بۇلايشا سەلقوس قاراۋعا بولمايدى. توتەنشە جاعدايلار مينيسترىنە جوسپارلانعان ءىس-شارالاردىڭ ورىندالماۋىنا جول بەرگەن ورتالىق جانە جەرگىلىكتى مەملەكەتتىك ورگانداردىڭ لاۋازىمدى تۇلعالارىنىڭ جاۋاپكەرشىلىگى تۋرالى ۇسىنىستار ەنگىزۋدى تاپسىرامىن»، — دەدى ولجاس بەكتەنوۆ.
ول قالىڭ قار مەن جاڭبىر دا ءقاۋىپتى ارتتىرا تۇسەتىنىن اتاپ ءوتتى. بۇل رەتتە جەكەلەگەن وڭىرلەردە قار شىعارۋعا ارنالعان قاراجات تەك ءىرى قالالار مەن وبلىس ورتالىقتارىنا بولىنەدى. ال اۋىلدىق ەلدى مەكەندەردە قار شىعارۋ جۇمىستارى نازاردان تىس قالىپ وتىر.
ونىڭ ايتۋىنشا، ەلدى مەكەندەردىڭ كوشەلەرىن سۋ باسىپ قالۋ جانە ءبىرقاتار وڭىرلەردە جولداردى شايىپ كەتۋ فاكتىلەرى ءقازىردىڭ وزىندە تىركەلىپ وتىر. جالپى 217 ەلدى مەكەندە تاسقىن ءقاۋپى ساقتالۋدا.
«مۇنداي پروبلەما ەلدى مەكەندەردىڭ كوپشىلىگىندە جىلدان-جىلعا قايتالانىپ كەلەدى. مىسالى، قوستاناي وبلىسىنداعى قارامىرزا اۋىلى سوڭعى 4 جىل بويى قار سۋىنىڭ قۇرساۋىنان شىعا الماي وتىر. بيىل دا ەلدى مەكەنگە ءقاۋىپ تونۋدە. جولداردىڭ سۋ باسىپ قالۋىنا بايلانىستى اقمولا وبلىسىندا ياگودنوە، قوستاناي وبلىسىندا ەكىدىڭ، اقتوبە وبلىسىنداعى ويماۋىت، جارىق، وتەك جانە قۇمتوعاي اۋىلدارىمەن جىل سايىن قاتىناس ءۇزىلىپ قالادى»، — دەدى ولجاس بەكتەنوۆ.
ۇكىمەت باسشىسى ءبىراز شارۋا اكىمدىكتەردىڭ ناقتى جۇمىسىنا بايلانىستى ەكەنىن اتاپ ءوتتى. وسىعان بايلانىستى ول ارىقتاردى، جاۋىن-شاشىن كارىزدەرىن ۋاقتىلى تازارتۋ، ۋاقىتشا بوگەتتەر سالۋ جانە ەلدى مەكەندەردە توپىراق ۇيىندىلەرىمەن بەكىتۋ جۇمىستارىن قامتاماسىز ەتۋدى تاپسىردى.
«توتەنشە جاعدايلار مينيسترلىگى جىل سايىن «كوكتەم» رەسپۋبليكالىق كوماندالىق-شتابتىق وقۋ-جاتتىعۋى شەڭبەرىندە سۋ تاسقىنى كەزەڭىنە ازىرلىك بارىسىن تەكسەرەدى. بارلىق وڭىرلەر سۋ تاسقىنىنا تولىق دايىنبىز دەپ باياندايدى. ال سايىپ كەلگەندە تۇرعىندار جانە سۋ باسقان عيماراتتار مەن ينفراقۇرىلىم زارداپ شەگەدى. ياعني، بۇل وقۋ-جاتتىعۋلار فورمالدى تۇردە وتكىزىلەتىنىن، ال دايىندىق قاعاز جۇزىندە عانا قالاتىنىن كورسەتەدى. ءبىز پارمەندى شارالار قابىلداۋىمىز قاجەت»، — دەگەن ولجاس بەكتەنوۆ، وقۋ-جاتتىعۋ وتكىزۋ فورماتىن قايتا قاراۋدى تاپسىردى.
پرەمەر-مينيستر توتەنشە جاعدايلار مينيسترلىگىنە اكىمدىكتەرمەن بىرلەسىپ، ارنايى جانە ينجەنەرلىك تەحنيكانى شوعىرلاندىرۋى، بيزنەسپەن ولاردىڭ تەحنيكاسىن رەزەرۆ رەتىندە پايدالانۋ تۋرالى كەلىسىمگە كەلۋدى، اسا ءقاۋىپتى ۋچاسكەلەردىڭ ماڭىندا قاجەتتى ماتەريالدار قورىن قامتاماسىز ەتۋدى مىندەتتەدى.
«كولىك قاتىناسى ءۇزىلىپ قالۋى مۇمكىن ەلدى مەكەندەردى الدىن الا ايقىنداپ، ونداعى ازىق-تۇلىك پەن دارى-دارمەكتىڭ قاجەتتى قورىن دايىنداۋ قاجەت»، — دەپ اتاپ ءوتتى ول.
سونىمەن قاتار ولجاس بەكتەنوۆ حالىقتى سۋ تاسقىنى ءقاۋپى، سۋ باسۋ جانە ەۆاكۋاسيالاۋ كەزىندەگى ءىس-قيمىل ەرەجەلەرى تۋرالى كەڭىنەن حاباردار ەتۋ جۇمىستارىن باستاۋدى جانە حالىقپەن ناقتى كەرى بايلانىس ورناتىپ، ولاردىڭ كومەك كورسەتۋ تۋرالى وتىنىشتەرىن بىردەن قاراۋدى، سونداي-اق جولدار مەن كوپىرلەردىڭ جاعدايىنا تاۋلىك بويى مونيتورينگ جۇرگىزۋدى تاپسىردى.