الماتىدا بالالاردىڭ قاۋىپسىزدىگىن پروكۋرورلار تەكسەرۋدە.
جۇرگىزىلگەن تەكسەرۋلەر بالالاردىڭ قاۋىپسىزدىگى سالاسىندا قابىلدانىپ جاتقان شارالاردىڭ جەتكىلىكسىزدىگىن كورسەتتى.
وعان اقپاراتتىق قاۋىپسىزدىك سالاسىنداعى جارتى مىڭنان استام بۇزۋشىلىقتار، بالالاردى تاسىمالداۋ جانە ءبىلىم بەرۋ مەكەمەلەرىن قورعاۋ ەرەجەلەرىنىڭ، سانيتارلىق جانە ورتكە قارسى نورمالاردىڭ بۇزىلۋى، سونداي-اق وقۋشىلار اراسىندا بۋللينگ فاكتىلەرىنىڭ انىقتالۋى دالەل.
تەكسەرۋلەر ناتيجەسىندە 10 سوتقا دەيىنگى تەرگەپ-تەكسەرۋ باستالدى، شامامەن 60 ملن. تەڭگە وتەلدى، 67 قاداعالاۋ اكتىسى ەنگىزىلدى جانە 100-دەن استام ادام اكىمشىلىك جاۋاپكەرشىلىككە تارتىلدى، دەپ حابارلايدى Almaty-akshamy.kz الماتى قالاسىنىڭ پروكۋراتۋراسىنا سىلتەمە جاساپ.
بۇدان باسقا، قۇقىق بۇزۋشىلىقتارعا جەدەل دەن قويۋ ماقساتىندا، ونىڭ ىشىندە وقۋشىلار اراسىنداعى بۋللينگكە قاتىستى، وقۋشىلار نەمەسە ولاردىڭ اتا-انالارىنا ونلاين رەجيمدە قالالىق پروكۋراتۋراعا تىكەلەي جۇگىنۋگە مۇمكىندىك بەرەتىن "QR-كود" ازىرلەندى.
مەكتەپ پسيحولوگتارىنىڭ بىلىكتىلىگىن ارتتىرۋ ماقساتىندا قالا پروكۋراتۋراسى "NGS" جاڭا بۋىن مەكتەبى الاڭىندا مەملەكەتتىك مەكتەپتەردەگى بارلىق پسيحولوگتاردىڭ، كامەلەتكە تولماعانداردىڭ ىستەرى جونىندەگى ۋچاسكەلىك ينسپەكتورلاردىڭ جانە ءبىلىم باسقارماسى وكىلدەرىنىڭ قاتىسۋىمەن سەمينار ۇيىمداستىردى.
سونىمەن قاتار پروكۋرورلار 330 ملن. تەڭگەدەن استام سوماعا بيۋدجەت قاراجاتى ۇرلانعانىن انىقتادى.
مىسالى، بوستاندىق اۋدانىنىڭ پروكۋراتۋراسى مەكتەپتەردىڭ بىرىندە جالاقىعا ارنالعان بيۋدجەت قاراجاتىن، باس بۋحگالتەردىڭ ۇرلاعانىن انىقتادى.
اتالعان قۇقىق بۇزۋشىلىق مەملەكەتكە 160 ملن.تەڭگە زالال كەلتىرە وتىرىپ، مەكتەپتىڭ جۇمىس ىستەمەيتىن قىزمەتكەرلەرىنە جانە ءوزىنىڭ جاقىن تۋىستارىنا اقشا قاراجاتىن اۋدارۋ جولىمەن جاسالعان.
وسىعان ۇقساس ۇرلىق فاكتىلەرىن مەدەۋ، المالى، تۇركسىب جانە الاتاۋ اۋداندارىنىڭ پروكۋرورلارى انىقتادى.
سوتقا دەيىنگى تەرگەپ-تەكسەرۋ امالدارى جۇرگىزىلۋدە.