اتاقتى سكريپكاشى، قازاقستاننىڭ ەڭبەك سىڭىرگەن قايراتكەرى ءجاميلا سەركەبايەۆا وتباسىلىق مەرەكە – جاڭا جىلدى قالاي قارسى الاتىنى تۋرالى ايتىپ بەردى.
– ادەتتەگىدەي، جاڭا جىلدى جاقىندارىممەن جانە تۋعان-تۋىستارىممەن بىرگە ءداستۇرلى تۇردە وزىمە جاقىنداردىڭ ورتاسىندا شام جارىعىمەن ارلەنگەن ادەمى داستارقان باسىندا قارسى الۋدى جوسپارلاپ وتىرمىن. ءداستۇرلى جاڭا جىلدىق شىرشانى ۇلىم جانە اكەممەن بىرگە بەزەندىردىك. شىرشا ۇيگە ەرەكشە جىلۋلىق سىيلايدى، ەرەسەكتەر مەن بالالار مەرەكەنى كۇتۋدىڭ ەرەكشە كوڭىل كۇي سىيلايدى، بۇل سەزىم جىلدار وتسە دە وزگەرمەيدى، – دەيدى ءجاميلا سەركەبايەۆا.
وتباسىلىق ءداستۇر بويىنشا، داستارقاندا سكريپكاشىنىڭ اجەسى مەن اناسى دايىنداعان تاعامدار مىندەتتى تۇردە بولۋى كەرەك، بۇل ارقىلى ۇرپاقتان ۇرپاققا بەرىلەتىن داستۇرلەر ساقتالادى.
– ادەتتە، ءبىز ۇلكەن داستارقان دايىندايمىز، نەگىزگى ىستىق تاعام رەتىندە مانتى نەمەسە الما قوسىلعان قۋىرىلعان ۇيرەك پىسىرەمىز. ءبىزدىڭ داستارقانىمىزدا مىندەتتى تۇردە قازاقتىڭ ءداستۇرلى تاعامدارى، ءتۇرلى دامدەر مەن تاتتىلەر بولادى، – دەپ اتاپ ءوتتى ءبىزدىڭ سۇحباتتاسۋشىمىز.
سەركەبايەۆا وتباسىنداعى ەڭ سۇيىكتى ءداستۇردىڭ ءبىرى – جاڭا جىلدا جاقىندارىنا، تۋعان-تۋىستارىنا جانە دوستارىنا سىيلىق بەرۋ ەكەنىن ايتتى.
– ءقازىردىڭ وزىندە وننان استام سىيلىقتار سالىنعان قاپشىقتار بولمەنى تولتىرىپ تۇر. بۇل بىزگە قازاقتىڭ سىي جاساۋ جانە قوناقجايلىلىق ءداستۇرىن ەسكە سالادى. ءوزىم دە سىيلىق جاساۋدى جاقسى كورەمىن، ماعان ەڭ قاتتى ۇنايتىنى – سىيلىقتى العان ادامنىڭ شىنايى ءارى جارقىن ەموسياسىن كورۋ. بۇل مەنى ەرەكشە قۋاتتاندىرادى، ال سىيلىقتى ءدال تاۋىپ بەرگەنىمدە قۋانىشىم ەسەلەنە تۇسەدى.
بيىل ۇلىمنىڭ جاڭا جىلدى مەنىمەن بىرگە قارسى الۋدى شەشكەنىنە ەرەكشە قۋانىشتىمىن. كوپتەگەن جاسوسپىرىمدەر بەلگىلى ءبىر جاستا دوستارىمەن بىرگە مەرەكەنى كوڭىلدى وتكىزۋگە ۇمتىلادى، – دەپ مادەنيەت قايراتكەرى ءبولىستى.
سونداي-اق، ول بالالىق شاقتاعى جاڭا جىلدى قارسى الۋ تۋرالى ەستەلىكتەرىمەن ءبولىستى:
– اجەمنىڭ (اكەمنىڭ اناسى) قاراقات قوسىلعان ءبالىشى ەرەكشە ءدامدى بولاتىن. ال ەڭ جارقىن اسەر – جاڭا جىل قارساڭىندا انامنىڭ اكەسىنىڭ كەلۋى. سول ۋاقىتتا قاتتى قار جاۋىپ تۇرعان ەدى، ونىڭ شاشى اپپاق، اياز اتاعا ۇقسايتىن. ءاردايىم ۇلكەن شىرشانى الىپ كەلەتىن، ءۇستى-باسىن قار باسقان، پالتوسى دا اپپاق بولاتىن. بارلىعى ەرتەگىدەي كورىنەتىن. بۇل بالالىق شاقتاعى اسەر ەشقاشان ۇمىتىلمايدى.
مەنى كوپ ەركەلەتپەيتىن، سەبەبى ول كەزدە اتا-انام قاراپايىم ءومىر ءسۇردى. ءبىراق، ولار ءاردايىم مەنىڭ قالاۋلارىمدى ورىنداۋعا تىرىستى، – دەيدى ءجاميلا سەركەبايەۆا.
جاڭا جىلدىق تىلەكتەرىن ايتقاندا، ول بەيبىتشىلىك پەن ءوزارا تۇسىنىستىكتى، مادەنيەت پەن داستۇرلەردى قۇرمەتتەۋدى ەرەكشە اتاپ ءوتتى:
– ءار جۇرەك مەيىرىمگە تولىپ، ءومىر بارشاعا قۋانىش پەن باقىت سىيلاسىن دەپ تىلەيمىن. ەڭ باستىسى، ءبىز بارىمىزدى باعالاپ، ومىردەن ءلاززات الۋىمىز كەرەك. بارلىق ادامداردىڭ باقىتتى بولۋىن، داستارقاندارى جايناپ، بالالاردىڭ كۇلىپ-ويناپ، جەتىستىكتەرىمەن قۋانتۋلارىن قالايمىن. بىر-بىرىمىزگە دەگەن شىنايىلىق پەن ماحاببات ارتا بەرسىن، – دەپ تۇيىندەدى ءجاميلا سەركەبايەۆا.