· 2024 جىل الماتى قالاسىنىڭ تۇرعىندارى ءۇشىن دامۋ مەن جاڭاشىلدىقتىڭ جارقىن كەزەڭى بولدى. قالادا مەديسينا، ءبىلىم بەرۋ، تۇرعىن ءۇي جانە قوعامدىق كەڭىستىكتەردى دامىتۋ سالالارىندا ايتارلىقتاي جەتىستىكتەرگە قول جەتكىزىلدى. تۇرعىنداردىڭ پىكىرى مەديسينالىق قىزمەتتەردىڭ ساپاسىنىڭ ارتۋى، سيفرلىق تەحنولوگيالاردىڭ ەنگىزىلۋى، جاستارعا ارنالعان تۇرعىن ءۇي باعدارلامالارى جانە قوعامدىق ورىنداردىڭ جاڭعىرتىلۋى سياقتى باستامالاردىڭ تيىمدىلىگىن راستايدى.
· الماتى تۇرعىندارىنىڭ پىكىرلەرى – قالانىڭ دامۋىنا بەرىلگەن باعا عانا ەمەس، سونداي-اق، حالىقتىڭ يگىلىگى ءۇشىن جاسالعان جۇمىستاردىڭ تيىمدىلىگىن كورسەتەتىن شىنايى ايعاق. بۇل وڭ وزگەرىستەر الماتىنى جاڭا مۇمكىندىكتەر قالاسى رەتىندە تانىتتى.
ايدانا اسىلبەك، بولاشاق دارىگەر: الماتى مەديسيناسىنىڭ مۇمكىندىگى جوعارى
– مەن ازىرگە ستۋدەنتپىن. ءبىراق ماماندىعىما ساي مەديسيناداعى تىڭ جاڭالىقتارعا قۇلاق ءتۇرىپ جۇرەمىن. مەديسينالىق قىزمەتتەردىڭ ساپاسىن ارتتىرۋ – الەۋمەتتىك تۇراقتىلىقتىڭ كەپىلى. بيىل جازدا ەلىمىزدە العاش رەت "ۇرىق حيرۋرگياسى" پيلوتتىق جوباسى ەنگىزىلدى. بۇل، ەگەر قۇرساقتا جاتقان شارانانىڭ دامۋىندا كىنارات بولسا، سونى ەمدەيتىن جاڭا يننوۆاسيا. بۇل وپەراسيا ەڭ العاش زاماناۋي مەديسينالىق اپپاراتتارمەن جابدىقتالعان الماتى كلينيكاسىندا جاسالدى. ەندى بىزدە جىلىنا 150-گە دەيىن جاتىرىشىلىك وپەراسيا جاساۋعا بولاتىن كورىنەدى. بۇل دەگەنىڭىز ەڭ ۇلكەن وزىق جەتىستىك!
سامال قالدىبەك، ستۋدەنت: كىتاپحانالار 24/7 كۇن ىستەيدى
– ءقازىر الماتى كىتاپحانالارىنىڭ كۇنىمەن، تۇنىمەن، ياعني 24/7 قاعيداتىمەن جۇمىس ىستەيتىنى ۇنايدى. كۇندىز ساباقتا، ءتۇرلى ادەبي-مادەني ءىس-شارالاردا بولامىز دا، كەشكە كىتاپحانالارعا بارۋعا ۇلگەرمەي قالىپ جاتاتىنبىز. ءقازىر ىزدەگەنىڭنىڭ ءبارى ينتەرنەتتە تۇر، دەگەنمەن، كىتاپحانانىڭ اۋراسى بولەك. الاتىن اقپاراتىڭ دا سەنىمدىرەك. مەن، ماسەلەن، جامبىل اتىنداعى جاسوسپىرىمدەر كىتاپحاناسىنا ءجيى بارامىن. ءىشى سونداي جايلى، جاپ-جارىق، ەڭسەلى. تىنىش قانا وتىرىپ كىتاپ وقيتىن ايماعى بولەك. ال دوستارىڭمەن الدەبىر تاقىرىپتا پىكىرتالاستىرۋ قاجەت بولسا، وعان بولەك ايماق ارنالعان. ەشكىم ەشكىمگە كەدەرگى جاسامايدى. ءتىپتى، كىتاپحانادا كەزدەسىپ، تابىسىپ، شاڭىراق كوتەرىپ جاتقان تانىستارىم بار. بىزگە رۋحاني باي ۇرپاق كەرەك دەپ ويلايمىن.
گۇلنۇر ءابىلقاسىموۆا، ءمۇعالىم: سيفرلىق تەحنولوگيالار – ءبىلىم ساپاسىن ارتتىرادى
– 2024 جىلى قالا مەكتەپتەرى سيفرلىق پلاتفورمالارمەن تولىقتاي جابدىقتالدى. بۇل مۇعالىمدەردىڭ جۇمىسىن ايتارلىقتاي جەڭىلدەتتى. ەندى كۇندەلىكتى ساباقتاردى ينتەراكتيۆتى تاقتالار ارقىلى وتكىزەمىز، ەلەكتروندىق كۇندەلىك جۇيەسى اتا-انالارمەن بايلانىس ورناتۋعا كومەكتەسەدى. ءبىلىم بەرۋ پروسەسىنىڭ سيفرلانۋى وقۋشىلاردىڭ ءبىلىم ساپاسىن ارتتىرۋعا ۇلەسىن قوسىپ، مۇعالىمدەردىڭ ۋاقىتىن ۇنەمدەۋگە مۇمكىندىك بەرەدى. وسىنداي جاڭاشىلدىقتار ءۇشىن العىسىمدى بىلدىرەمىن.
اقزەر ورىنباسار قىزى، قالا تۇرعىنى: كوپتەن كۇتكەن پاتەرىمىزدى الدىق
– بيىل ءبىزدىڭ وتباسىمىز ءۇشىن ەرەكشە جىل بولدى.كوپتەگەن جاقسى جاڭالىقتارمەن اياقتالىپ جاتقان جىل بولىپ تۇر.ەڭ قۋانتارلىعى، تۇرعىن ءۇي قۇرىلىسىنا ارنالعان مەملەكەتتىك باعدارلامانىڭ ارقاسىندا الماتىدان كوپتەن كۇتكەن پاتەرىمىزدى الدىق. مەملەكەتتىك قولداۋدىڭ ارقاسىندا جاس ماماندارعا ارنالعان باعدارلامانىڭ شارتتارى ءبىز ءۇشىن وتە قولايلى بولدى. بۇل تەك باسپانا عانا ەمەس، سونىمەن بىرگە وتباسىمىز ءۇشىن ۇلكەن جەتىستىك. وسىنداي جوبالار جاستارعا ءوز بولاشاعىن قالادا قۇرۋعا ۇلكەن موتيۆاسيا بەرەدى. بۇرىن جالدامالى باسپانادا تۇرىپ، شىعىندارىمىز كوبەيىپ كەتەتىن. ەندى ءوز ۇيىمىزدە تۇرىپ جاتىرمىز، بۇل ءبىز ءۇشىن ۇلكەن قۋانىش. قالانىڭ ءار اۋدانىندا وسىنداي قولجەتىمدى تۇرعىن ۇيلەردىڭ سالىنىپ جاتقانى وتە جاقسى باستاما دەپ ويلايمىن. بۇل كوپتەگەن وتباسىلارعا جايلى ءومىر ءسۇرۋ مۇمكىندىگىن سىيلاپ وتىر.
اسەل نۇرعازينا، المالى اۋدانىنىڭ تۇرعىنى: تاماشا جوبا
– ءبىز ءۇشىن بيىل ەرەكشە جىل جولدى. روزىباكييەۆ كوشەسى مەن دۇيسەنوۆ كوشەلەرى قيىلىسى بۇرىن جابايى ساۋدا مەن رەتسىز كولىك تۇراعىنىڭ ورداسى بولعان ەدى. ءقازىر ول جەردە «شيپا دەنت» دەگەن اتاۋمەن ساياباق پايدا بولدى. بۇل ساياباققا ءبىز «حالىق قاتىساتىن بيۋدجەت» باعدارلاماسى ارقىلى قول جەتكىزدىك. ازاماتتىق بەلسەندىلىك پەن جەرگىلىكتى بيلىك جۇيەسىنىڭ تيىمدىلىگىن ارتتىراتىن تاماشا جوبا.
جاڭا جىل جاقىنداعان سايىن ساياباعىمىز بۇرىنعىدان دا كەرەمەت بولىپ كەتتى. جالت-جۇلت ەتكەن شامدار كوڭىل-كۇيىڭدى كوتەرەدى. بالالار دا، ءبىز دە ءمازبىز. ويتكەنى، مۇندا بوس ۋاقىتىڭدى وتكىزۋ ءۇشىن بارلىق جاعداي جاسالعان، جاياۋ جۇرگىنشىلەر جولى، بالالار وينايتىن الاڭ، قولايلى ورىندىقتار، ءتىپتى سۋرەتكە تۇسۋگە ارنالعان ارنايى ايماق تا بار. حالىق ءۇنىن ەستىپ، وتىنىشىمىزگە قۇلاق اسقان قالا بيلىگىنە، اۋدان اكىمدىگىنە العىس ايتامىز.
التىناي ەركىن قىزى، م.بازاربايەۆ اتىنداعى №138 گيمنازيانىڭ ءمۇعالىمى: جاستارعا قامقورلىقتى سەزىندىم
– 2024 جىل مەن ءۇشىن ەرەكشە جىل بولدى – «الماتى جاستارى» باعدارلاماسى ارقىلى ءوز باسپانامدى الىپ، ارمانىم ورىندالدى. وسىنداي ماڭىزدى ءارى قولجەتىمدى مۇمكىندىكتى ۇسىنعانى ءۇشىن مەملەكەتكە، جاۋاپتى مەكەمەلەرگە جانە باعدارلامانى جۇزەگە اسىرعان بارلىق ماماندارعا العىسىمدى بىلدىرەمىن. بۇل باستاما جاستارعا ۇلكەن قولداۋ كورسەتىپ، ءوز بولاشاعىن سەنىمدى تۇردە جوسپارلاۋعا كومەكتەسەدى. الماتى – مەن ءۇشىن جاڭا باستامالار مەن مۇمكىندىكتەر قالاسى. ەندى ءوز ۇيىمدە جاڭا ارماندار مەن ماقساتتاردى جۇزەگە اسىرۋعا اسىقپىن. ەلىمىزدە وسىنداي يگى ىستەر كوبەيە بەرسىن.
· ءتۇيىن: الماتى – ءاربىر تۇرعىنىنىڭ ءومىرىن جاقسارتۋعا باعىتتالعان قالا. بيىلعى جىلى قول جەتكىزىلگەن جەتىستىكتەر – بۇل تەك قالا باسشىلىعىنىڭ ەمەس، ازاماتتىق قوعامنىڭ دا بەلسەندى ۇلەسىنىڭ ناتيجەسى. مەديسينا، ءبىلىم بەرۋ، تۇرعىن ءۇي ماسەلەلەرى جانە قوعامدىق كەڭىستىكتەردى جاقسارتۋ بويىنشا ىسكە اسىرىلعان جوبالار قالا تۇرعىندارىنىڭ سەنىمى مەن قولداۋىنا يە بولدى. بۇل وزگەرىستەر الماتىنىڭ الەۋمەتتىك تۇراقتىلىق پەن يننوۆاسيالاردىڭ ورتالىعى رەتىندەگى مارتەبەسىن نىعايتىپ، ونىڭ بولاشاققا دەگەن سەنىمدى قادام جاساپ كەلە جاتقانىن كورسەتەدى. حالىق يگىلىگىنە باعىتتالعان وسىنداي باستامالار ودان ءارى جالعاسىپ، جاڭا بيىكتەردى باعىندىرۋعا نەگىز بولماق. الماتى – بارشاعا ورتاق جەتىستىكتەر مەن مۇمكىندىكتەر قالاسى.