ماۋسىم – ەرلەردىڭ پسيحولوگيالىق دەنساۋلىعىنا نازار اۋداراتىن ەرەكشە اي. بۇل باستاما العاش 1994 جىلى اقش-تا كوتەرىلىپ، كەيىن باسقا ەلدەرگە دە تارادى. ماقساتى - ەر ازاماتتاردىڭ ىشكى كۇيىن، پسيحولوگيالىق كۇيزەلىسىن اشىق ايتۋعا مۇمكىندىك بەرۋ، قوعامدا بۇل ماسەلەنى كورىنبەي قالعان شەتكى تاقىرىپ رەتىندە قالدىرماۋ. اqshamnews.kz ءتىلشىسى قازاقستاندىق ەر-ازاماتتاردىڭ پسيحولوگيالىق كۇيىن نازاردان تىس قالدىرماي، وسى تاقىرىپ توڭىرەگىندە پسيحولوگپەن تىلدەستى.
ۇلمەكەن ساندىبەك قىزى
پسيحولوگ، گەشتالت-تەراپيەۆت
ەرلەر پسيحولوگياسىنا ارنالعان اي قايدان شىققان؟
ەرلەردىڭ پسيحولوگيالىق دەنساۋلىعىنا ارنايىلاپ كوڭىل ءبولۋ ستاتيستيكالىق تۇرعىدان انتيرەيتينگ كورسەتۋدەن باستالعان. پسيحولوگتىڭ سوزىنشە، مۇنىڭ نەگىزگى سەبەبى - سۋيسيد ماسەلەسى.
"ەر ادامداردىڭ ايەلدەرگە قاراعاندا وز-وزىنە 3-4 ەسە ءجيى قول جۇمساۋى، تاۋەلدىلىككە بەيىمدىلىگى، اگرەسسيا مەن وقشاۋلانۋعا جاقىن بولۋى – بۇل تاقىرىپقا اشىق قاراپ، قوعامنىڭ نازارىن اۋدارۋدى تالاپ ەتەدى. ماۋسىم ايىنىڭ سيمۆولى رەتىندە اسپان تۇستەس كوك ءتۇس تاڭدالعان. بۇل – ەر ادامنىڭ وسال تۇسىن مويىنداۋى مەن قولداۋدىڭ بەلگىسى"، – دەيدى پسيحولوگ.
ەرلەر نەگە ەموسيانى ءجيى جاسىرىپ قالادى؟
قوعامدا ەر ادامعا قاتىستى تالاپ پەن ستەرەوتيپ وتە كوپ. "ەركەك دەگەن جىلامايدى"، "كوز جاسىڭدى كورسەتپە"، "سابىرلى بول" دەگەن ۇستانىمدار بالالىق شاقتان ساناعا سىڭىرىلەدى. پسيحولوگ ۇلمەكەن ساندىبەك قىزى مۇنداي شەكتەۋلەر بالانىڭ پسيحولوگيالىق دامۋىنا كەرى اسەر ەتەتىنىن ايتادى.
"ەكى جاسار بالاسىنا “جىلاما، سەن ەركەكسىڭ” دەپ جاتقانداردى ءجيى كورەمىز. اكەسى ارينە بالاسىنىڭ "ەز ەمەس، ەر بولۋىن" قالايدى. ءبىراق وسىنىڭ ءبارى بالانىڭ ىشكى كۇيىمەن ساناسپاۋعا اكەلەدى. ناتيجەسىندە ول وسكەندە ءوز ەموسياسىن سەزە المايتىن، بىلدىرە المايتىن ادامعا اينالادى"، – دەيدى مامان.
ەموسيانىڭ سىرتقا شىقپاۋى اشۋ-ىزا، رەنىشتىڭ جينالۋىنا، ىشكى قىنجىلۋدىڭ ءبارى سىرقاتقا اينالۋىنا سەبەپ بولادى. بۇل – دەنساۋلىق پەن پسيحيكانىڭ بۇزىلۋىنا اپاراتىن العاشقى قادام.
"اكە بولۋ – ۇلكەن پسيحولوگيالىق جاۋاپكەرشىلىك"
ەر ادامنىڭ پسيحولوگياسى وتباسى قۇرعاندا دا ۇلكەن سىناقتان وتەدى. اسىرەسە اكە اتانۋ - كەز كەلگەن ەر ازامات ءۇشىن ىشكى ترانسفورماسيا كەزەڭى. پسيحولوگتىڭ ايتۋىنشا، كەي ەر ادامدار جاسىنا قاراماستان ءوزىن اكە ەمەس، بالا رەتىندە سەزىنۋى مۇمكىن. بۇل ونىڭ پسيحولوگيالىق جەتىلمەگەنىن بىلدىرەدى.
"ناعىز اكە بولۋ ءۇشىن ەر ادام الدىمەن تۇلعا رەتىندە قالىپتاسۋى قاجەت. جەتىلگەن، جاۋاپكەرشىلىك الۋعا قابىلەتتى، تۇراقتى ەر ازامات قانا اكەلىك ءرولدى دۇرىس اتقارا الادى"، – دەيدى ۇلمەكەن ساندىبەك قىزى.
جاڭا ءرول، ۇلكەن جاۋاپكەرشىلىك، العاشقى ساتتەردەگى قورقىنىش – مۇنىڭ ءبارى ەر ادامنىڭ پسيحولوگيالىق ىشكى تەپە-تەڭدىگىن شايقالتىپ جىبەرەدى. سوندىقتان بۇل كەزەڭدە ەر ادامدارعا قولداۋ مەن تۇسىنىستىك اۋاداي قاجەت.
سۋيسيدكە باراتىنداردىڭ كوبى – ەر ادامدار. نەگە؟
ستاتيستيكا بويىنشا، سۋيسيدكە باراتىنداردىڭ كوبى – ەر ادامدار. بۇل ولاردىڭ ەموسياسىن ىشكە جاسىرىپ، ەشكىممەن بولىسە الماۋىنىڭ سالدارى. ۇلمەكەن ساندىبەك قىزى بۇل جاعدايدى "ۇنسىزدىك پەن وقشاۋلانۋدىڭ تراگەدياسى" دەپ سيپاتتايدى.
"ەموسياسىن بولىسە المايتىن ەر ادام ءوزىن جالعىز سەزىنەدى. تۇسىنىسپەۋشىلىك، مانسىزدىك سەزىمى كۇشەيەدى. قولداۋ تاپپاعان ادام تىعىرىققا تىرەلىپ، ومىردەن باز كەشۋگە بەيىم بولادى"، – دەيدى پسيحولوگ.
الايدا مامان كەيىنگى جىلدارى قازاقستاندىق ەر-ازاماتتار وزدەرىنىڭ پسيحولوگيالىق كۇيىنە ءمان بەرە باستاعانىن ايتتى. ونىڭ سوزىنشە، كەيىنگى ءۇش جىلدا ەر ادامداردىڭ پسيحوتەراپياعا جۇگىنۋى جيىلەگەن. ءبىرى – ءوز قالاۋىمەن، ءبىرى – جارىمەن بىرگە كەلىپ، ساۋ قارىم-قاتىناس ورناتۋعا ۇمتىلادى.