مادەنيەت جانە اقپارات مينيسترلىگى مەملەكەت باسشىسى تاعايىنداعان "تاۋەلسىزدىك ۇرپاقتارى" گرانتىن بەرۋ بويىنشا كونكۋرستىڭ باستالعانىن جاريالادى، دەپ حابارلايدى aqshamnews.kz
گرانت بەرۋدىڭ ماقساتى — بەلسەندى شىعارماشىل جاستار قاۋىمداستىعىن قالىپتاستىرۋعا باعىتتالعان جاڭا يدەيالار مەن باستامالاردى مەملەكەتتىك قولداۋ.
2025 جىلى رەسپۋبليكالىق دەڭگەيدە 3 ملن تەڭگەدەن 30 گرانت بەرىلەتىن بولادى.
گرانتقا 14 جاستان باستاپ 35 جاسقا دەيىنگى (34 جاستى قوسا العاندا) قازاقستان ازاماتى ۇمىتكەر بولا الادى.
گرانت مىناداي 6 باعىت بويىنشا جوبالاردى ىسكە اسىرۋ ءۇشىن كونكۋرستىق نەگىزدە بەرىلەدى:
"عىلىم" – جاڭا عىلىمي جوبالاردى جانە زەرتتەۋلەردى ىسكە اسىرۋعا ارنالعان؛
"مادەنيەت" – قازاقستاننىڭ مادەني مۇراسىن تانىمال ەتۋگە، حالىقتىق مادەني داستۇرلەر مەن ونەردى ىلگەرىلەتۋگە باعىتتالعان جوبالاردى ىسكە اسىرۋعا ارنالعان؛
"اقپاراتتىق تەحنولوگيالار" – جاڭا IT شەشىمدەر مەن جوبالاردى، ونىڭ ىشىندە جاڭادان باستالعان ستارتاپ جوبالاردى ىسكە اسىرۋعا جانە ازىرلەۋگە ارنالعان؛
"بيزنەس" – جاڭا بيزنەس-يدەيالاردى ىسكە اسىرۋعا ارنالعان؛
"مەديا" – جاڭا مەديا جوبالاردى، ونىڭ ىشىندە جاستار ءۇشىن تانىمدىق، پايدالى، قىزىقتى كونتەنت قۇرۋ جونىندەگى جوبالاردى ىسكە اسىرۋعا ارنالعان؛
"ۆولونتەرلىك" – وزەكتى، الەۋمەتتىك پروبلەمالاردى شەشۋگە باعىتتالعان ۆولونتەرلىك جوبالاردى (باستامالاردى) ىسكە اسىرۋعا ارنالعان.
كونكۋرستىق وتىنىمدەردى قابىلداۋ 2025 جىلعى 16 ماۋسىمنان باستاپ 18 تامىز ارالىعىندا (بۇل رەتتە، بيىل 18 تامىز ساعات 24:00-گە دەيىن) t.urpaktary25@gmail.com ەلەكتروندى پوشتاسى ارقىلى جۇزەگە اسىرىلادى.
انىقتاما تەلەفوندارى: 8 (7172) 74-12-78، 8 706-618-07-23 (جۇمىس كۇندەرى، ساعات 9:00-دەن 18:30-عا دەيىن).
كونكۋرسقا قاتىسۋ ءۇشىن قاجەتتى قۇجاتتار ءتىزىمى (مەملەكەتتىك جانە (نەمەسە) ورىس تىلدەرىندە):
1-قوسىمشاعا سايكەس نىسان بويىنشا كونكۋرستىق ءوتىنىم (PDF فورماتى)؛
2-قوسىمشاعا سايكەس نىسان بويىنشا جوبانىڭ سيپاتتاماسى (word فورماتى)؛
جوبا بويىنشا بەينەماتەريال (60 سەكۋندتان اسپايتىن) نەمەسە پرەزەنتاسيا (10 سلايدتان اسپايتىن)؛
3-قوسىمشاعا سايكەس نىسان بويىنشا شىعىندار سمەتاسىنىڭ جوباسى (word فورماتى)؛
زياتكەرلىك مەنشىك تۋرالى مالىمەتتەر (بار بولسا، PDF فورماتى)؛
جەكە كۋالىك نەمەسە تۋۋ تۋرالى كۋالىكتىڭ كوشىرمەسى (PDF فورماتى).
قوسىمشالار مەن "تاۋەلسىزدىك ۇرپاقتارى" گرانتىن بەرۋ قاعيدالارىن مينيسترلىك سايتىنان جۇكتەي الاسىز.