14 اقپاندا اۋعان سوعىسى جانە تاجىك-اۋعان شەكاراسىنىڭ ارداگەرلەرى ۇقك شەكارا قىزمەتى الماتى وبلىسى بويىنشا دەپارتامەنتىنىڭ قاراساي اۋدانى شەكارا باسقارماسىنا بارىپ، جات ەلدىڭ شەكاراسىندا ەرلىكپەن قازا تاپقان قارۋلاستارىنىڭ ەسكەرتكىشىنە گۇل شوقتارىن قويدى. سونداي-اق، دەپارتامەنتتىڭ شەكارا بولىمشەلەرىندە اۋعان سوعىسى ارداگەرلەرىنىڭ قاتىسۋىمەن جاس ساربازدارعا ارنالعان «ەرلىك ساباعى» ءوتتى.
وتكەن تاريحقا ۇڭىلسەك، وسىدان 36 جىل بۇرىن كەڭەس اسكەرى اۋعان جەرىنەن شىعارىلدى. ال 2001 جىلدىڭ 8 اقپانىندا تاجىك-اۋعان شەكاراسىنداعى قاقتىعىستار توقتاپ، قازاقستاندىق بىتىمگەرشىلىك باتالونى ءوز ميسسياسىن اياقتاعان بولاتىن. سودان بەرى ەلىمىزدە اۋعان سوعىسىنىڭ جانە «ىستىق نۇكتەگە» بالانعان تاجىك-اۋعان شەكاراسىنىڭ ارداگەرلەرىنە قۇرمەت كورسەتىپ، جات جەردە ەرلىكپەن قازا تاپقانداردىڭ ەسىمىن ماڭگىلىك ەتۋگە ارنالعان شارالار تۇراقتى تۇردە وتكىزىلىپ كەلەدى.
دەپارتامەنت باستىعى، پولكوۆنيك سەرىك تولەۋحانوۆ پەن «زاستاۆا تارلاندارى» رەسپۋبليكالىق قوعامدىق بىرلەستىگىنىڭ الماتى قالالىق جانە وبلىستىق فيليالدارىنىڭ وكىلدەرى – وتستاۆكاداعى گەنەرال-مايور مارات ماجيتوۆ باستاعان اۋعاندىق ارداگەرلەردى قاراساي اۋدانى شەكارا باسقارماسىنىڭ جەكە قۇرامى سالتاناتتى ساپ تۇزەپ قارسى الدى. جيىن بارىسىندا ەسكەرتكىشكە گۇل شوقتارى قويىلىپ، جات ەلدە قازا تاپقان جاۋىنگەرلەردى ءبىر مينۋت ۇنسىزدىكپەن ەسكە الۋ ءراسىمى ءوتتى.
– شەكاراشىلارىمىز قايدا جۇرسە دە وتانعا ادال قىزمەت ەتۋدىڭ ۇلگىسىن كورسەتىپ كەلەدى. اۋعانستاندا ينتەرناسيونالدىق بورىشىن وتەۋ كەزىندە ەرەن ەرلىك كورسەتىپ، قۇربان بولعان شەكاراشى قارۋلاستارىمىز – ءبىزدىڭ جۇرەگىمىزدە ماڭگى ساقتالادى، – دەدى اۋعان سوعىسىنىڭ ارداگەرى مارات ءالىمجان ۇلى.
جيىننان كەيىن ارداگەرلەر شەكارا باسقارماسىندا ۇيىمداستىرىلعان شاعىن كونسەرتتىك باعدارلامانى تاماشالادى. زال تولى كورەرمەندەر الدىندا سەرجانت داستان سەمبايەۆ پەن تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتتەرى – ۇلان اسكەر، قۇزار قۇمىروللا، ەرسۇلتان اسەت ۇلى، الديار ءجۇزباي ۇلى جانە جومارت راحىمبەردى ونەر كورسەتتى. اسىرەسە، شەكاراشى ونەرپاز داستان سەمبايەۆتىڭ «اۋعان جىرى» اتتى اۋعان سوعىسىنا 18 جاسىندا اتتانىپ، تۋعان جەرىنە قارا تابىتپەن ورالعان ورىمدەي جاس جىگىتتەر تۋرالى جان تەبىرەنتەرلىك ءانى زالداعى ءار ادامنىڭ جۇرەگىنە ەرەكشە اسەر ەتتى.