جينالعاندار 28 گۆارديالىق-پانفيلوۆشىلار ساياباعىنداعى ماڭگىلىك الاۋ مەن ينتەرناسيوناليست-جاۋىنگەرلەرگە ارنالعان ەسكەرتكىشكە القىزىل گۇل شوقتارىن قويىپ، قان مايداندا ەرلىك كورسەتكەن، سوعىستىڭ زاردابىن تارتىپ، ومىردەن وتكەن جاۋىنگەرلەردىڭ رۋحىنا تاعزىم ەتتى.
سالتاناتتى شاراعا اۋعان سوعىسىنىڭ ارداگەرلەرى مەن ارداگەرلەر كەڭەسىنىڭ وكىلدەرى، ۇلتتىق ۇلان مەن قازاقستان رەسپۋبليكاسى قارۋلى كۇشتەرىنىڭ اسكەري قىزمەتشىلەرى، اسكەري جوعارى وقۋ ورىندارىنىڭ كۋرسانتتارى مەن قالا تۇرعىندارى قاتىستى.
الدىمەن ساياباققا جينالعان قاۋىم اۋعان سوعىسىندا قازا تاپقان جاۋىنگەرلەردىڭ رۋحىنا باس ءيىپ، ولاردى ءبىر مينۋتتىق ۇنسىزدىكپەن ەسكە الدى. بۇدان كەيىن اۋعان ارداگەرلەرى ءسوز الىپ، سوعىس اقتاڭداقتارى تۋرالى ەستەلىكتەرىمەن ءبولىستى.
- مەن اۋعانستاننىڭ باگرام ەلدى-مەكەنىندە توقتاعان جەكە بارلاۋ باتالونىندا دارىگەر بولىپ قىزمەت ەتتىم. «شەپسىز مايدان» اتالىپ كەتكەن ۇرىس قيمىلدارىندا جاراقات العان جاۋىنگەرلەرگە مەديسينالىق جاردەم كورسەتۋ باستى مىندەت بولدى. سولارمەن قويان-قولتىق ءجۇرىپ، ۇرىس ۇستىندە قىزمەتىمدى اتقاردىم. ءوزىمىز دە جاراقات العان كەزدەر بولدى. بىردە، اۆتوموبيلدەر لەگىمەن كەلە جاتقانىمىزدا سالانگ اسۋىنان وتكەننەن كەيىن مودجاحەتتەر اتقان وقتىڭ استىندا قالىق. جۇرگىزۋشىم الەكساندر پاۋتوۆ مەنى كولىكتەن شىعىپ، ولارعا قارسى وق جاۋدىردى. ءسويتىپ مەنى اجال وعىنان امان الىپ قالعان ەدى. بارلىق قارۋلاس جولداستارىما جانە ولاردىڭ جاقىندارىنا ۇلكەن ريزاشىلىعىمدى بىلدىرەمىن. بۇل وتە اۋىر مىندەت بولدى جانە ءبىز ونى اسا قۇرمەتپەن ورىندادىق دەپ، - جات ەلدەگى جورىقتى جىلداردى ۇلتتىق ۇلاننىڭ وتستاۆكاداعى پولكوۆنيگى ءسابيت ايماعانبەتوۆ وسىلاي ەسكە الدى.
جيىن سوڭىندا الماتى گارنيزونىنا قاراستى اسكەري بولىمدەر مەن اسكەري جوعارى وقۋ ورىندارىنىڭ كۋرسانتتارى ارداگەرلەر الدىنان سالتاناتتى شەرۋمەن ءجۇرىپ ءوتتى.
القالى جيىن كونسەرتتىك باعدارلامامەن اياقتالدى، وندا اۋعان سوعىسى ينتەرنوسيوناليست-جاۋىنگەرلەرىنىڭ ەرلىكتەرى تۋرالى اندەر شىرقالدى.
امان جۇرىڭىزدەر، جاۋىنگەر اعالار! اۋعان سوعىسىنىڭ ارداگەرلەرى! كەۋدە تولعان وردەن-مەدالدار ەرلىك پەن باتىلدىقتىڭ بەلگىسىندەي، جاس ۇرپاققا قوڭىراۋ بولىپ، سىڭعىرلاپ تۇرا بەرسىن!