اباي ۋنيۆەرسيتەتىندە «قىسقى مەكتەپ – 2026: پەداگوگيكالىق ءبىلىم بەرۋدى جاڭارتۋ جانە زەرتتەۋشىلىك داعدىلاردى دامىتۋ» تاقىرىبىنداعى ءداستۇرلى قىسقى مەكتەپ جۇمىسى ودان ءارى جالعاسىن تاپتى. ءىس-شاراعا پرورەكتورلار، فاكۋلتەت دەكاندارى، كافەدرا مەڭگەرۋشىلەرى مەن وقىتۋشى-پروفەسسورلار قاتىستى. قازىرگى تاڭدا ادامزات جاڭا تەحنولوگيالىق كەزەڭگە – جاساندى ينتەللەكت داۋىرىنە قادام باستى. مەملەكەت باسشىسى قاسىم-جومارت توقايەۆتىڭ 2026 جىلدى «سيفرلاندىرۋ جانە جاساندى ينتەللەكت جىلى» دەپ جاريالاۋى دا – ۋاقىت تالابى مەن جاھاندىق ۇردىستەرگە ساي قابىلدانعان ماڭىزدى شەشىم. بۇل باستاما بەكەر ەمەس. سەبەبى جاساندى ينتەللەكت ەكونوميكا، مەديسينا، ءوندىرىس سالالارىمەن قاتار، ءبىلىم بەرۋ جۇيەسىنىڭ دە مازمۇنى مەن فورماتىن تۇبەگەيلى وزگەرتىپ وتىر. اسىرەسە، پەداگوگيكا سالاسىندا ءجي-دىڭ ءرولى ارتىپ، وقىتۋ ادىستەمەسىن جاڭعىرتۋ، وقىتۋشىنىڭ كاسىبي قۇزىرەتتەرىن جەتىلدىرۋ، زەرتتەۋشىلىك مادەنيەتتى دامىتۋ ماسەلەلەرى الدىڭعى قاتارعا شىقتى. وسى وزەكتى مىندەتتەرگە دايىن بولۋ ماقساتىندا اباي ۋنيۆەرسيتەتىندە ءداستۇرلى قىسقى مەكتەپ ۇيىمداستىرىلىپ، سەمينار-ترەنينگتەر جالعاسىپ جاتىر. جوبانىڭ نەگىزگى تاقىرىبى – جاساندى ينتەللەكت داۋىرىندەگى جوعارى ءبىلىمنىڭ دامۋىنداعى ترەندتەر مەن سىن-قاتەرلەر بولدى.
جيىندى اكادەميالىق قىزمەت جونىندەگى پرورەكتور بانۋ ناربەكوۆا اشىپ، پەداگوگيكالىق ءبىلىم بەرۋدىڭ بولاشاعىنا ارنالعان ستراتەگيالىق باعىتتارعا توقتالدى. ول سيفرلاندىرۋ مەن جاساندى ينتەللەكت جاعدايىنداعى جوعارى ءبىلىمنىڭ جاھاندىق ۇردىستەرى، ەڭبەك نارىعىنا جانە پەداگوگ كادرلاردى دايارلاۋ جۇيەسىنە جي ىقپالى تۋرالى باياندادى. سونداي-اق، ءمۇعالىم دايارلاۋدىڭ جاڭا مودەلدەرى، سيفرلىق ءداۋىر پەداگوگىنىڭ كاسىبي قۇزىرەتتەرى، ءبىلىم بەرۋ ۇدەرىسىندە جاساندى ينتەللەكتتى قولدانۋدىڭ ەتيكالىق ماسەلەلەرىن قوزعادى. ەلىمىزدەگى جوعارى ءبىلىم سالاسىنداعى زاڭنامالىق وزگەرىستەردى، پەداگوگيكالىق ءبىلىم بەرۋدى دامىتۋعا باعىتتالعان حالىقارالىق تاجىريبەلەر مىسالىن ساراپقا سالدى. قىسقى مەكتەپ اياسىندا «شىعارماشىلىق ويلاۋ ارقىلى كاسىبي كوممۋنيكاسيا مەن ءوزارا قولداۋدى قالىپتاستىرۋ» اتتى پسيحولوگيالىق ترەنينگ ۇيىمداستىرىلدى. ترەنينگتى الەۋمەتتىك دامۋ جونىندەگى پرورەكتور ماقسات جاقاۋوۆ جانە پسيحولوگتار سايدا قوسباي مەن اسەل جۇسىپەكوۆا جۇرگىزدى. قاتىسۋشىلار ستۋدەنتتەرگە كورسەتىلەتىن پسيحولوگيالىق قولداۋ ماسەلەلەرىن قوزعاپ، قىزمەت ساپاسىن ارتتىرۋعا باعىتتالعان ۇسىنىستاردى تالقىلادى. ايتا كەتەيىك، «قىسقى مەكتەپ – 2026» الداعى كۇندەرى كاسىبي پىكىرتالاستار مەن تاجىريبە الماسۋ الاڭى رەتىندە جۇمىسىن جالعاستىرادى. وندا پەداگوگيكا سالاسىنداعى جاڭا ۇردىستەر مەن جاساندى ينتەللەكت داۋىرىندەگى ءبىلىم بەرۋدىڭ وزەكتى ماسەلەلەرى كەڭىنەن قامتىلىپ، ءتۇرلى تىڭ تاقىرىپتار بويىنشا سەمينار-ترەنينگتەر وتكىزىلمەك.