جەز قانات، كۇمىس باۋىر كيىك كوردىم
ءدارۋى سول ما دەرسىڭ كۇيىك-شەردىڭ
جەز مارال جۇرەدى ەكەن اراسىندا
قاپتاعان بەتپاقتاعى كيىكتەردىڭ
جەز كيىك، ءبىزدىڭ جاققا قالاي كەلدىن؟
جولىمدى تىكە كەسىپ، جاناي بەردىڭ
ادامنىڭ كوزدەرىندەي ەكى كوزىڭ
ياپىرماي، ءداتىم شىداپ قالاي كوردىم؟
ءدال ساعان قۇرماپ ەدى توردى ەشكىم
عايىپتان دۋشار بولدىڭ، سوردى كەشتىڭ
مەن-داعى سەرتشىل ادام دالادى وسكەن
سەن-داعى جالتارمادىڭ، جولدى كەستىڭ
اسىقپا، كورەيىنشى جوندەپ قانا
كەتپەسىن جاڭا تيگەن مەندەپ جارا
ەت كەسىپ ءوز ەتىمنەن بەرسەم -داعى
جونىڭە جىبەرەيىن ەمدەپ قانا
دەدىم دە قويا بەردىم، ۇستامادىم
قاسىمدا قال دەمەدىم، قىستامادىم
تىلەيمىن سۋىق جاقتان ەسەن قايتىپ
جىلىقۇم مەكەنىنە قىستاعانىن
ءتۇس تەربەپ، جازدىڭ ءمولدىر قىسقا تاڭى
تۇزاقتاپ جەز كيىكتى ۇستاتامىن
باياعى قىزىل ىشىك كيگەن قىزعا
جەز كامزول سول كيىكتى ۇقساتامىن
قۇمارىم قايتا كورىپ قانار ما ەكەن؟
ءال ءبىتىپ، سالقىن جۇرەك جانار ما ەكەن؟
بولماسا، سۋىق قولدى ءبىر سۇر مەرگەن
ءدال كوزدەپ الدە اتىپ الار ما ەكەن؟
سۇلۋدى ادام جانى قيمايدى ەكەن
بەيمەزگىل ەسكە ءتۇسىپ قينايدى ەكەن
جەز كيىك، سەنى اڭساعان كەزدەرىمدە
ءبىر ءوزىم كەڭ دالاعا سىماي كەتەم.
ك.سالىقوۆ
