بۇل وتباسى اتا كاسىپتى ناسيحاتتاپ، بۇركىتشىلىكتى دارىپتەپ ءجۇر.
ق ر پرەزيدەنتى جانىنداعى ورتالىق كوممۋنيكاسيالار قىزمەتىنىڭ الاڭىندا وتباسى كۇنىنە وراي وتكەن «مەرەيلى وتباسى» ۇلتتىق بايقاۋىنىڭ جەڭىمپازدارىن ونلاين فورماتتا ماراپاتتاۋ راسىمىندە جەتىسۋلىق يسابەكوۆتار وتباسى رەسپۋبليكاداعى ەڭ ۇزدىك وتباسىلاردىڭ ءبىرى بولىپ انىقتالدى، دەپ حابارلايدى Almaty-akshamy.kz.
الماتى وبلىسى اكىمىنىڭ ءبىرىنشى ورىنباسارى لاززات تۇرلاشوۆ جەڭىمپازداردى قۇتتىقتاي وتىرىپ، ەڭبەكشىقازاق اۋدانىنان كەلگەن يسابەكوۆتار وتباسىنا جىلى لەبىزدەرىن ءبىلدىردى.
يسابەكوۆتار وتباسى حالىق اراسىندا ۇلكەن بەدەلگە يە. بۇل وتباسى اتا كاسىپتى ناسيحاتتاپ، بۇركىتشىلىكتى دارىپتەپ ءجۇر. نۇرا اۋىلىنداعى «جەتى قازىنا» قۇسبەگىلىك مەكتەبى ءارى مۇراجايىنا يەلىك ەتىپ، جۇمىسىن جولعا قويىپ وتىرعان اۋلەتتىڭ ونەگەلى ىستەرى بارشىلىق.
ەسكە سالا كەتەيىك، مۇحامەد يسابەكوۆ 2003 جىلى «جەتى قازىنا» اڭشى قۇستار مۇراجايىن اشقان بولاتىن. بۇل ۇلتتىق اڭشىلىق تۇرلەرى بويىنشا ەلدەگى العاشقى مۇراجاي. كوپتەگەن ەكسپوناتتىڭ ىشىندە قۋانىش يسابەكوۆتىڭ لوندوندا وتكەن I حالىقارالىق اڭشىلار فەستيۆالىندەگى جەڭىسى ءۇشىن بەرىلگەن ماراپات ەرەكشە باعالانادى. ول 33 ەلدەن كەلگەن قاتىسۋشىلار اراسىندا جەڭىسكە جەتىپ، «ۇزدىك بۇركىتشى» اتاعىن الدى.
- ءبىراق باستى ماراپاتتى ءبىز بۇگىن الدىق. ءبىزدى مەملەكەتتىك حاتشى قۇتتىقتاپ، ەل پرەزيدەنتى قاسىم-جومارت توقايەۆتىڭ قۇتتىقتاۋىن جەتكىزدى. وبلىس اكىمىنىڭ ءبىرىنشى ورىنباسارى لاززات تۇرلاشوۆتىڭ قولىنان مەملەكەت باسشىسى قول قويعان ديپلوم الىپ، الماتى وبلىسىنىڭ ۇزدىك وتباسى اتاندىق. قاراپايىم وتباسىلاردىڭ قۇندىلىقتارى ەڭ جوعارى دەڭگەيدە ايتىلادى. ال بۇل ماڭىزدى بولىپ تابىلادى. مەن بالالارعا ءوزىم بىلەتىن نارسەنى ۇيرەتەمىن، ماعان ونى اتا-انام ۇيرەتتى، - دەدى مۇحامەد يسابەكوۆ.
ايتا كەتەيىك، يسابەكوۆتار وتباسى جەتىسۋدا 410 قاتىسۋشى اراسىندا ۇزدىك اتاندى.
بۇعان دەيىن حابارلاعانىمىزداي، ماراپاتتاۋ راسىمىنە مەملەكەتتىك حاتشى قىرىمبەك كوشەربايەۆ قاتىسىپ، ق ر پرەزيدەنتىنىڭ قۇتتىقتاۋىن جەتكىزدى. ءراسىم بارىسىندا ءار وتباسىنا مەملەكەت باسشىسىنىڭ ديپلومدارى مەن اقشالاي سەرتيفيكاتتار تابىس ەتىلدى.