ەلدەن قاشقان اۋعانستاننىڭ ەكس-پرەزيدەنتى حالىقتان كەشىرىم سۇرادى

اشراف عاني «تاليبان» قوزعالىسىنىڭ اۋعانستاندى باسىپ العانى ءۇشىن كەشىرىم سۇرادى.

اۋعانستاننىڭ بۇرىنعى پرەزيدەنتى اشراف عاني 15 تامىزدا كابۋلدى تاستاپ، «تاليبان» قوزعالىسىنىڭ ەلدى جاۋلاپ الۋعا جول بەرگەنى ءۇشىن حالىقتان كەشىرىم سۇرادى، دەپ حابارلايدى Almaty-akshamy.kz Aikyn.kz-كە سىلتەمە جاساپ.

«وسىنىڭ ءبارىن باسقاشا اياقتاي الماعانىم ءۇشىن اۋعان حالقىنان كەشىرىم سۇرايمىن. اۋعان حالقىنا قىزمەتىم شەكسىز، بار ءومىرىمدى سوعان ارنايمىن»، - دەدى ەلدەن قاشقان پرەزيدەنت Tolo News تەلەارناسىنا بەرگەن سۇقباتىندا.

ەكس-پرەزيدەنت بەلگىسىز ءبىر شەتەل ازاماتتارى ومىرىنە قاستاندىق جاساعانىن ءبولىستى. ءعانيدىڭ ايتۋىنشا، ولار پرەزيدەنت سارايىنا كىرىپ، بولمەلەردەن پرەزيدەنتتى ىزدەگەن.

«مەن ەلدەن كەتۋگە ءماجبۇر بولدىم، اياق كيىم اۋىستىرۋعا مۇرشا بولمادى. ومىرىمدەگى باستى بايلىعىم: كىتاپتارىمدى، جازبالارىمدى، جەكە نوۋتبۋگىمدى الىپ كەتە المادىم. حالىقارالىق كۇشتەرمەن ەلدەن شىعۋ جولدارىن تالقىلاۋعا ۋاقىت بولمادى. ەلدەن ءبىر عانا كوستيۋممەن شىقتىم. باسقا جايتتارىن، قۇداي قالاسا، كەلەسى جولى ايتىپ بەرەرمىن»،  - دەدى اشراف عاني.

ءقازىر ول بىرىككەن اراب امىرلىكتەرىندە تۇرىپ جاتىر. اۋعانستاننىڭ بۇرىنعى باسشىسى اۋعان حالقىنا تيەسىلى ميلليونداعان دوللاردى وزىمەن بىرگە الىپ كەتتى دەگەن مالىمەتتى تاعى دا جوققا شىعاردى.

«بۇنىڭ ءبارى جالعان. جەمقورلىق – دەرت، پرەزيدەنت بولعان ۋاقىتتا بار كۇشىمدى سونىمەن كۇرەسۋگە ارنادىم»، – دەيدى بۇرىنعى پرەزيدەنت.

اقش پرەزيدەنتى دجو بايدەن اۋعانستان بيلىگى، بەرگەن ۋادەسىنە قاراماستان، كەلىسىم مەن سوعىسقا دايىن ەمەس بولىپ شىقتى دەپ مالىمدەگەن.

«عاني مىرزا اۋعان اسكەرى سوعىسادى دەپ سەندىرگەن، ءبىراق، سوعان قاراعاندا، ول قاتەلەسكەن سەكىلدى»، - دەپ مالىمدەدى بايدەن 16 تامىزدا ۇلتقا ارناعان تەلەجولداۋىندا.