الماتى اكىمى 22 قاراشادا «كەمەل» شاعىن اۋدانىنداعى كوپىر ارقىلى قوزعالىس اشۋدى تاپسىردى، دەپ حابارلايدى aqshamnews.kz
جەتىسۋ اۋدانىنا جۇمىس ساپارى بارىسىندا الماتى اكىمى ەربولات دوسايەۆ «كەمەل» شاعىن اۋدانىندا ەسەنتاي وزەنى بويىنا سالىنىپ جاتقان كوپىردى ارالاپ كوردى. بۇعان دەيىن مەگاپوليس باسشىسىنىڭ تاپسىرماسى بويىنشا كوپىردىڭ اپاتتى جاعدايىنا قاتىستى قوزعالىس جابىلعان بولاتىن.
60-شى جىلدارى سالىنعان كوپىر قۇرىلىسىنا ماۋسىم ايىندا جۇرگىزىلگەن تەحنيكالىق زەرتتەۋ بەتون كونسترۋكسيالارىنىڭ ءىشىنارا بۇزىلۋىن، كوپىر تىرەكتەرىندە جارىقتاردىڭ پايدا بولۋىن، دەفورماسيالىق تىگىستىڭ بولماۋىن جانە ت.ب. انىقتادى. وسىعان بايلانىستى تج اياسىندا جاڭا كوپىر سالۋ تۋرالى شەشىم قابىلداندى.
باستاپقىدا كولىك قوزعالىسىن قازان ايىنىڭ سوڭىندا اشۋ جوسپارلانعان بولاتىن. الايدا، توپىراق قۇرىلىمىنا بايلانىستى جوسپارلانعان 9 مەتردىڭ ورنىنا 29 مەترلىك بۇرعىلاۋ قادالارىن ورناتۋ قاجەت بولدى. سونىمەن قاتار، ارنايى تەحنيكانىڭ نەگىزىن دايىنداۋ كەزىندە وزەن ارناسىندا كوپىردىڭ جاياۋ جۇرگىنشىلەر بولىگى قۇلادى. بۇل بولىك جاڭا كوپىر سالىنعاننان كەيىن بولشەكتەلۋى كەرەك ەدى، ءبىراق قۇلاۋ سالدارىنان ونى ەرتەرەك بولشەكتەۋگە تۋرا كەلدى. وسىلايشا، جۇمىستىڭ مەرزىمى اۋىستىرىلدى.
قالا باسشىسىنا قالالىق موبيلدىلىك باسقارماسىنىڭ باسشىسى ساعىندىق تەلىبايەۆ ايتىپ وتكەندەي، بۇگىندە قادالاردى ورناتۋ جانە سىناۋ، تىرەكتەردى، تىرەۋ قابىرعالارىن ورناتۋ، ارقالىقتاردى مونتاجداۋ جانە ينجەنەرلىك جەلىلەردى قايتا قۇرۋ جۇمىستارى جۇرگىزىلدى. سونداي-اق، عيمارات سىناقتان ءوتتى.
رەكونسترۋكسيالاۋ قۇرۋ ناتيجەسىندە كوپىردىڭ ۇزىندىعى 16،8 – دەن 33 مەترگە دەيىن، ەنى 8،5-تەن 14،5 مەترگە دەيىن ۇلعايتىلادى. سونىمەن قاتار، ەكى جاعىنان 1،5 م تروتۋارلاردى ورناتۋ جوسپارلانۋدا.
«كوپىر بىرنەشە شاعىن اۋداندار مەن جاقىن ماڭداعى ەلدى مەكەندەردىڭ تۇرعىندارى ءۇشىن كولىك بايلانىسىن قامتاماسىز ەتەدى. بۇل ماڭىزدى ينفراقۇرىلىمدىق نىسان، سوندىقتان قۇرىلىس مۇمكىندىگىنشە قىسقا مەرزىمدە جۇرگىزىلدى. گەولوگيا توپىراقتىڭ تۇراقسىزدىعىن انىقتادى، سوندىقتان قادالاردى شامامەن 30 مەتر تەرەڭدىككە ورناتۋ تۋرالى شەشىم قابىلداندى، كوپىر ۇزىندىعى بويىنشا ەكى ەسەگە جۋىق ۇلعايتىلدى. جۇمىستىڭ نەگىزگى كولەمى ورىندالدى، قوزعالىستى كەلەسى اپتانىڭ سوڭىنا دەيىن اشىپ، سودان كەيىن جاياۋ جۇرگىنشىلەر بولىگى مەن ىرگەلەس اۋماق بويىنشا جۇمىستاردى اياقتاۋ قاجەت»، - دەپ اتاپ ءوتتى ەربولات دوسايەۆ.
ەستەرىڭىزگە سالا كەتەيىك، جاڭا كوپىر سالۋ بويىنشا جوندەۋ جۇمىستارى اياقتالعانعا دەيىن اتالعان ۋچاسكەنى اينالىپ ءوتۋ مۇحامەدجان سەرالين كوشەسى ارقىلى قامتاماسىز ەتىلگەن.
