قالانىڭ مەدەۋ اۋدانىنىڭ پوليسيا قىزمەتكەرلەرى الاياقتىق جاسادى جانە بوتەننىڭ مۇلكىن ۇرلادى دەگەن كۇدىكپەن جەرگىلىكتى تۇرعىندى ۇستادى، دەپ حابارلايدى aqshamnews.kz.
– ءبىرىنشى جاعدايدا ول كومپيۋتەرلىك كلۋبقا كەلۋشىنى الداپ، ونىڭ تەلەفونىن تارتىپ العان. تاعى ءبىر جاعدايدا قالالىق مەشىتتەردىڭ ءبىرى قىلمىستىق ىس-ارەكەت الاڭىنا اينالدى. ەركىن كىرۋ مۇمكىندىگىن پايدالانعان قاسكوي بوتەن بىرەۋدىڭ تەلەفونىن ۇرلاپ، “ءىزىن سۋىتقان”. ونىڭ بۇل ارەكەتى كامەراعا ءتۇسىپ قالعان. جەدەل ءىس-شارالاردىڭ ناتيجەسىندە كۇدىكتى ۇستالدى. ول قاماۋعا الىندى، – دەدى مەدەۋ اۋداندىق پب-عا قاراستى پوليسيا ءبولىمىنىڭ باستىعى ەلدوس باقبەرگەنوۆ.
ق ر قك-نىڭ 201-بابىنا سايكەس وزگە اقپارات تەرگەۋ مۇددەسىنە وراي جاريا ەتىلمەيدى. ق ر كونستيتۋسياسىنىڭ 77-بابى 3ء-بولىمى 1-تارماعى، ق ر قك-نىڭ 19-بابى 1-تارماعىنا ساي كەز كەلگەن ازامات سوت شەشىمى زاڭدى كۇشىنە ەنگەنگە دەيىن كىناسىز دەپ سانالادى.