باسپا ءسوز تۋرى بارىسىندا جەتىسۋ اۋدانىنىڭ اكىمى ءلاززات جىلقىبايەۆا وسىلاي دەدى. ءقازىر رايىمبەك، ءسۇيىنباي، رىسقۇلوۆ پەن ۆولوچايەۆسكايا–تاتىبەكوۆ كوشەلەرى شەكتەسكەن تۇستا قۇرىلىس جۇمىسى ءجۇرىپ جاتىر، دەپ حابارلايدى aqshamnews.kz
اكىمنىڭ ايتۋىنشا، بۇعان دەيىن بۇل اۋماقتا ورتالىقتاندىرىلعان كارىز جۇيەسى بولماعان، تۇرعىندار سۋدى ەسكى، ابدەن توزعان جەلىلەردەن الىپ وتىرىپتى. بۇل كوممۋنالدىق قىزمەتتىڭ ساپاسىنا دا كەرى اسەر ەتكەن.
جوبا اياسىندا جالپى ۇزىندىعى 25 شاقىرىمنان اساتىن ينجەنەرلىك جەلى سالىنادى. ونىڭ 13،41 شاقىرىمى – سۋ قۇبىرىنا، 12 شاقىرىمنان استامى – كارىز جۇيەسىنە ارنالعان. بۇل شامامەن 1500 ابونەنتتى وسى زامانعى ينجەنەرلىك ينفراقۇرىلىمعا قوسۋعا مۇمكىندىك بەرمەك.
اۋداندا ەكى ۇلكەن جوبا جۇزەگە اسىرىلۋدا. ءبىرىنشى جوبا – 120-دان استام كوشەنى قامتيدى. ونىڭ ۇزىندىعى 97 شاقىرىم:
• 25 شاقىرىم – سۋمەن جابدىقتاۋ جەلىلەرى،
• 72 شاقىرىم – سۋ بۇرۋ جەلىلەرى.
ءقازىر 13 شاقىرىم سۋ قۇبىرى مەن 14 كم كارىز جەلىسى سالىنىپ بىتكەن.
«ءقازىر 5 بريگادا ينجەنەرلىك جەلىلەر بويىنشا، 2 بريگادا اسفالتتاۋ بويىنشا جۇمىس ىستەپ جاتىر. جوبا تولىق اياقتالماعانىمەن، ينجەنەرلىك جەلىلەر جۇرگىزىلگەن كوشەلەردەگى سۋمەن جابدىقتاۋ مەن كارىز جۇيەسى «الماتى سۋ» مەكەمەسىنىڭ قاراۋىنا بەرىلدى. تۇرعىندارعا جوبانىڭ تولىق اياقتالۋىن كۇتۋدىڭ قاجەتى جوق. بۇل اۋماقتا جۇمىس بىتكەن سوڭ، ءبىز ءبارىن سۋمەن، كارىزبەن 100% قامتاماسىز ەتەمىز»، – دەدى ءلاززات جىلقىبايەۆا.
ەكىنشى جوبا بويىنشا:
• 25 شاقىرىمنان اساتىن ينجەنەرلىك جەلى جۇرگىزىلەدى،
• ونىڭ 13،41 شاقىرىمى – سۋمەن جابدىقتاۋ،
• 12 شاقىرىمنان استامى – كارىز جەلىسى.
بۇل جوبا شامامەن 1500 ابونەنتتى وسى زامانعى ينجەنەرلىك ينفراقۇرىلىمعا قوسۋعا مۇمكىندىك بەرمەك. قۇرىلىس-مونتاج جۇمىستارى ماۋسىم ايىندا باستالعان، 2026 جىلى ءبىتىرۋدى جوسپارلاپ وتىر.
ءقازىر پوتانين، نۇسىپبەكوۆ پەن ىستىق كوشەسىندەگى جەلى تارتۋ جۇمىسى ورتا شەگىنە كەلىپ قالىپتى.
جۇمىستىڭ باستى ەرەكشەلىگى – ينجەنەرلىك جەلىلەردى جۇرگىزىپ بولىسىمەن جولدى بىردەن اسفالتتايدى. بۇرىنعى تاسىلدەرمەن سالىستىرعاندا، قازىلعان جەردە قايتا كومۋگە از ۋاقىت كەتەدى، جانە جول تولىق اسفالتتالادى، بۇل تۇرعىندارعا قولايسىزدىق كەلتىرمەيدى.
«جوبانى ىسكە اسىرۋ – كوممۋنالدىق قىزمەتتەردىڭ ساپاسىن ارتتىرۋعا، سەنىمدى سۋمەن قامتىپ، جاڭا كارىز جۇيەسىن قۇرۋ. بۇل – جەتىسۋ اۋدانى تۇرعىندارىنىڭ ءومىر ساپاسىن ەداۋىر ارتتىرادى. اۋدان بيۋدجەتىنىڭ مۇمكىندىكتەرى، ونەركاسىپتىك ءوسىم مەن ورتالىقسىزدانۋ اياسىنداعى جۇمىستار وسىنداي اۋقىمدى جوبالاردى جۇزەگە اسىرۋعا مۇمكىندىك بەرىپ وتىر»، – دەپ تۇيىندەدى ءسوزىن ءلاززات جىلقىبايەۆا.