ءماجىلىس ىشكى ىستەر ورگاندارىنىڭ قىزمەتى سالاسىنداعى نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ ماسەلەلەرى بويىنشا زاڭدى ەكىنشى وقىلىمدا قابىلدادى، دەپ حابارلايدى aqshamnews.kz
زاڭ «مەملەكەتتىك اپپاراتتىڭ قىزمەتىن بيۋروكراتيادان ارىلتۋ جونىندەگى شارالار تۋرالى» پرەزيدەنت جارلىعىن ىسكە اسىرۋ ماقساتىمەن ازىرلەنگەن.
تۇزەتۋلەرگە سايكەس «جەرگىلىكتى پوليسيا قىزمەتى» ۇعىمى الىنىپ تاستالادى. بۇعان 2016 جىلى قۇرىلعان جەرگىلىكتى پوليسيا قىزمەتى ءوز تيىمدىلىگىن ءىس جۇزىندە دالەلدەي الماعانى سەبەپ بولدى. جەرگىلىكتى پوليسيا قىزمەتى قۇرامىندا ۋچاسكەلىك ينسپەكتورلار، پاترۋلدىك، يۋۆەنالدى، تابيعاتتى قورعاۋ پوليسياسى جانە ايەلدەردى زورلىق-زومبىلىقتان قورعاۋ بولىمشەلەرى بولعان. الايدا تۇزەتۋ اۆتورلارىنىڭ ايتۋىنشا، بۇل قىزمەت وزىنە جۇكتەلگەن نەگىزگى مىندەتتەردى، ياعني، قوعامدىق ءتارتىپتى ساقتاۋ، قۇقىق بۇزۋشىلىقتاردىڭ الدىن الۋ جانە جول قاۋىپسىزدىگىن قامتاماسىز ەتۋدىڭ ورنىنا، اباتتاندىرۋ ەرەجەلەرىنىڭ بۇزىلۋىن انىقتاۋ، قۇرىلىس قالدىقتارىن شىعارۋ سىندى ەكىنشى كەزەكتەگى جۇمىستارمەن اينالىسا باستاعان.
ىشكى ىستەر مينيسترلىگى جەرگىلىكتى پوليسيا قىزمەتى مەن اكىمشىلىك پوليسيا باسقارماسىن قايتا ۇيىمداستىرىپ، ولاردىڭ بازاسىندا ەكى جاڭا باسقارما قۇرىلادى. ولار: قۇقىق بۇزۋشىلىقتاردىڭ الدىن الۋ جانە قوعامدىق قاۋىپسىزدىكتى قامتاماسىز ەتۋ باسقارمالارى. ءار قىزمەت ءوزىنىڭ تىكەلەي مىندەتتەرىمەن اينالىسادى.
سونداي-اق كولىك پوليسياسى بولىمشەلەرىن رەتكە كەلتىرۋ ماقساتىمەن «جەلىلىك» دەگەن تەرمين «كولىكتە» دەپ وزگەرتىلەدى. ال اسكەري-تەرگەۋ ورگاندارى ىشكى ىستەر ورگاندارىنىڭ اۋماقتىق قۇرىلىمىنان الىنىپ تاستالادى، سەبەبى ولار ءىىم قۇرامىنداعى دەربەس بولىمشە رەتىندە بولىنگەن.