جەكە اكادەميالارعا "ۇلتتىق" ءسوزىن اتاۋلارىندا قولدانۋعا تىيىم سالىندى، دەپ حابارلايدى aqshamnews.kz
قازاقستاندا زاڭنامالىق وزگەرىستەر اياسىندا جەكە اكادەميالاردىڭ اتاۋىندا «ۇلتتىق» ءسوزىن قولدانۋعا شەكتەۋ ەنگىزىلدى. بۇل تۇزەتۋلەر «ءبىلىم تۋرالى»، «عىلىم جانە تەحنولوگيالىق ساياسات تۋرالى»، سونداي-اق «قايىرىمدىلىق تۋرالى» زاڭدارعا ەنگىزىلەتىن ىلەسپە وزگەرىستەر قاتارىندا قاراستىرىلعان.
ەندى مەملەكەت قاتىسپايتىن، زاڭدى تۇلعا رەتىندە تىركەلگەن جەكە اكادەميالار ءوز اتاۋىندا «ۇلتتىق» ءسوزىن تولىق نەمەسە قىسقارتىلعان تۇردە، كەز كەلگەن تىلدە قولدانا المايدى. بۇل شارا اكادەميالىق اتاۋلاردىڭ ماڭىزدىلىعىن ساقتاۋ جانە ءبىلىم بەرۋ ۇيىمدارىنىڭ مارتەبەسىن ناقتىلاۋ ماقساتىندا قولعا الىنعان.
سونىمەن قاتار، زاڭ جوباسىنا تاعى ءبىر ماڭىزدى تۇزەتۋ ەنگىزىلدى. «ارال وڭىرىندەگى ەكولوگيالىق قاسىرەت سالدارىنان زارداپ شەككەن ازاماتتاردى الەۋمەتتىك قورعاۋ تۋرالى» زاڭعا سايكەس، تۇركىستان وبلىسىنا قاراستى كەنتاۋ قالاسى جانە وعان ىرگەلەس اششىساي، حانتاعى، بايىلدىر، قارناق، ءقۇشاتا جانە شاشتوبە اۋىلدارى ەكولوگيالىق جاعدايدىڭ الدىن-الۋ ايماعى رەتىندە تانىلاتىن بولدى. بۇل قادام ءوڭىر حالقىن الەۋمەتتىك جانە ەكولوگيالىق تۇرعىدان قورعاۋعا باعىتتالعان.