بيىلعى 20 قاڭتارداعى مالىمەت بويىنشا، ەلىمىزدە 120 ارداگەر مەن جەڭىسكە ۇلەس قوسقان 42 545 ازامات تۇرادى.
ولاردىڭ ىشىندە:
- قورشاۋداعى لەنينگراد تۇرعىندارى – 67 ادام؛
- كونسلاگەرلەردىڭ بۇرىنعى كامەلەتكە تولماعان تۇتقىندارى – 139 ادام؛
- سوعىس كەزىندە العان جارالانۋى، كونتۋزياسى، زاقىمدانۋى نەمەسە اۋرۋى سالدارىنان مۇگەدەكتىگى بار قايتىس بولعان ادامنىڭ جۇبايلارى – 743 ادام؛
- سوعىستا قازا تاپقان (قايتىس بولعان، حابار-وشارسىز كەتكەن) جاۋىنگەرلەردىڭ جەسىرلەرى – 2 ادام؛
- تىل ەڭبەككەرلەرى – 41 594 ادام.
ەڭبەك جانە حالىقتى الەۋمەتتىك قورعاۋ مينيسترلىگى ارداگەرلەر مەن تىل ەڭبەككەرلەرىنە قامقورلىق جاساۋ، ولاردىڭ ءومىر ءسۇرۋ ساپاسىن ارتتىرۋ – مەملەكەتتىڭ الەۋمەتتىك ساياساتىنىڭ باستى باسىمدىقتارىنىڭ ءبىرى ەكەنىن اتاپ ءوتتى. قارتتاردى الەۋمەتتىك قورعاۋ شارالارى ورتالىق دەڭگەيدە دە، جەرگىلىكتى دەڭگەيدە دە جۇزەگە اسىرىلادى.
بىرىنشىدەن، زەينەتاقى جانە وزگە دە الەۋمەتتىك تولەمدەردىڭ مولشەرى جىل سايىن ارتىپ كەلەدى. ازاماتتاردىڭ 19 ساناتىنا (سوعىسقا قاتىسۋشىلار، تىل ەڭبەككەرلەرى، اقتالعان ازاماتتار جانە ت.ب.) وزگە دە الەۋمەتتىك تولەمدەرگە قاراماستان ارناۋلى مەملەكەتتىك جاردەماقى تولەۋ جۇزەگە اسىرىلادى.
ەكىنشىدەن، ارداگەرلەردى الەۋمەتتىك قولداۋدىڭ قوسىمشا شارالارى كورسەتىلەدى. ولاردىڭ بارلىعى اسكەري قىزمەتشىلەرگە كورسەتىلەتىن قۇقىقتار مەن كەپىلدىكتەرگە يە. سالىق سالۋ بويىنشا جەڭىلدىكتەردى پايدالانادى، ولارعا استانا جانە الماتى قالالارىنداعى مامانداندىرىلعان گوسپيتالداردا بىلىكتى مەديسينالىق كومەك كورسەتىلەدى، ساناتوريي-كۋرورتتىق ەمدەۋ ۇسىنىلادى.
ۇشىنشىدەن، ارداگەرلەرگە ءبىرجولعى ماتەريالدىق كومەك بەرۋ جىل سايىنعى داستۇرگە اينالدى.
"وبلىستاردىڭ، استانانىڭ جانە رەسپۋبليكالىق ماڭىزى بار قالالاردىڭ جەرگىلىكتى اتقارۋشى ورگاندارىنىڭ اقپاراتى بويىنشا جەڭىس كۇنىنىڭ 80 جىلدىعىن مەرەكەلەۋ قۇرمەتىنە بيىل 120 ارداگەردىڭ ءارقايسىسىنا 5 ملن تەڭگەدەن ءبىرجولعى ماتەريالدىق كومەك كورسەتىلەدى"، - دەلىنگەن ۆەدومستۆونىڭ باسپا ءسوز قىزمەتى تاراتقان حابارلامادا.