«ۇلى دالا جورىعى-2023» مارافون-بايگەسىنىڭ جەڭىمپازدارى ماراپاتتالدى
«ۇلى دالا جورىعى» مارافون-بايگەسىنىڭ 14-كەزەڭى اياقتالىپ، تارلان تاريحتىڭ كۋاگەرى بولعان، رۋحانياتى جاڭعىرعان ەلىمىزدىڭ رۋحاني استاناسى تۇركىستان تورىندە جەڭىمپازدار انىقتالدى، دەپ حابارلايدى اlmaty-akshamy.kz.
تاڭعى ساعات 7:00-دەن باستاپ سوڭعى 50 شاقىرىمدى ەڭسەرۋگە اتتانعان 4 كوماندا ىشىندە جەتىسۋ وبلىسىنىڭ كومانداسى توپ جارىپ، مارە سىزىعىن ءبىرىنشى بولىپ كەستى.
ون ءتورتىنشى كۇننىڭ قورىتىندىسى بويىنشا كوماندالاردىڭ جالپى ۋاقىتى:
جەتىسۋ وبلىسى – 93 ساعات 47 مينۋت 43 سەكۋند؛
اقتوبە وبلىسى – 95 ساعات 06 مينۋت 37 سەكۋند؛
الماتى قالاسى – 104 ساعات 23 مينۋت 57 سەكۋند؛
اباي وبلىسى – 112 ساعات 12 مينۋت 46 سەكۋند.
جەڭىمپازداردى ماراپاتتاۋ سالتاناتىنا ق ر تۋريزم جانە سپورت ۆيسە-مينيسترى سارسەن قۇرانبەك، «AMANAT» پارتياسىنىڭ اتقارۋشى حاتشىسى داۋلەت كارىبەك، ق ر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ، تۇركىستان وبلىسى اكىمى اپپاراتىنىڭ باسشىسى ەركەعالي ءالىمقۇلوۆ پەن «JORYQ» ات سپورتى فەدەراسياسىنىڭ پرەزيدەنتى باقىتجان تۇرلىبەكوۆ ارنايى قاتىستى.
«ۇلى دالا جورىعى» الەمدە جوق رەسپۋبليكالىق مارافون بايگە. بىلتىر باستالعان بۇل جوبانىڭ اۋقىمى كەڭەيىپ، ەل ىشىندە كەڭىنەن قولداۋ تابۋدا. كەلەر ۇرپاققا قاسيەتتى ات ۇستاۋ مەن بايگە ونەرىن جەتكىزۋ اسا جاۋاپتى بورىش. بۇگىنگى ءىس-شارا وسى جولدا اتقارىلىپ جاتقان ناقتى ءىستىڭ ءبىرى. ويتكەنى ول قازىرگى جاھاندانۋ داۋىرىندەگى ۇلتتىق بولمىسىمىزدى ساقتاۋدىڭ ءبىر جولى. سول سەبەپتەن دە ۇلتتىق سپورت قاۋىمداستىعى 2 جىل قاتارىنان «ۇلى دالا جورىعى» جوباسىنا سەرىكتەس بولىپ، قولداپ كەلەدى.
بۇگىندە پرەزيدەنت قاسىم-جومارت كەمەل ۇلى توقايەۆتىڭ تىكەلەي نازارىنىڭ ارقاسىندا ۇلتتىق سپورتقا ەرەكشە كوڭىل بولىنۋدە. مەملەكەت باسشىسى كەلەر جىلى استانادا وتەتىن V دۇنيەجۇزىلىك كوشپەندىلەر ويىنىنا دا ايرىقشا نازار اۋدارىپ وتىر. «ۇلى دالا جورىعىنا» قاتىسقان شاباندوزدار كوشپەندىلەر ويىنىندا ولجا سالادى دەگەن سەنىمدەمىن» دەپ ايتتى ءوز قۇتتىقتاۋ سوزىندە ق ر ۇلتتىق سپورت قاۋىمداستىعىنىڭ پرەزيدەنتى يسلامبەك سالجانوۆ.
سوڭعى مەجە – تۇركىستان قالاسىنا دەيىن ەڭ قىسقا ۋاقىت ىشىندە جەتكەن جەتىسۋ وبلىسىنىڭ كومانداسى باس جۇلدە – 18 000 000 تەڭگە (رەگلامەنتكە ساي) كولەمىندەگى جۇلدەمەن ماراپاتتالدى.
اقتوبە وبلىسى كومانداسى 2ء-شى ورىن ءۇشىن – 16 000 000 تەڭگە، ال 3ء-شى ورىن يەگەرى الماتى قالاسىنىڭ كومانداسى 9 000 000 تەڭگەنى قانجىعاسىنا بايلادى. تورەشىلەر شەشىمىمەن، مارەگە 4ء-شى بولىپ كەلگەن اباي وبلىسىنىڭ كومانداسىنا 5 000 000 تەڭگە بەرىلدى.
سونىمەن قاتار، بۇل كەزەڭدە ماڭعىستاۋ وبلىسىنىڭ اداي جىلقىسى رەكورد جاسادى. «رەكورد» كومانداسىنداعى 21 جاستاعى ماعجان ابدول ۇلى 1 300 شاقىرىمنىڭ سوڭعى 50 شاقىرىمىن باعىندىرۋعا تاڭعى ساعات 7:10-دا اتتانىپ، تۇركىستانداعى مارە سىزىعىن 08 ساعات 44 مينۋت 09 سەكۋندتا ءبىرىنشى بولىپ كەستى. استانادان تۇركىستانعا دەيىنگى 1 300 شاقىرىمدى باستان-اياق 1 اتپەن ەڭسەرۋدى ماقسات ەتكەن «رەكورد» كومانداسىنىڭ قۇرامى استانا قالاسى، ماڭعىستاۋ مەن جەتىسۋ وبلىستارىنىڭ شاباندوزدارىنان قۇرالعان.
مارەگە جەتىسۋلىق شاباندوز ەكىنشى بولىپ كەلسە، ارتىنشا استانالىق شاباندوز جەتىپ، «رەكورد» كومانداسى دىتتەگەن ماقساتىن ورىندادى. 1 300 شاقىرىمدى 1 اتپەن باعىندىرعان ازاماتتار 1-ورىن ءۇشىن 2،5 ميلليون تەڭگە، 2-ورىنعا - 2 ميلليون تەڭگە، 3-ورىنعا - 1،5 ميلليون تەڭگە كولەمىندەگى سىياقى الدى.
«رەكورد» كومانداسىنىڭ ناتيجەسىنە توقتالساق، ماڭعىستاۋ وبلىسىنىڭ جىلقىسى 1 300 شاقىرىمدى 98 ساعات 44 مينۋت 47 سەكۋندتا باعىندىردى. ال جەتىسۋ وبلىسىنىڭ تۇلپارى 100 ساعات 04 مينۋت 34 سەكۋندتا ەڭسەردى. ءۇشىنشى، استانالىق سايگۇلىكتىڭ ۋاقىتى 104 ساعات 28 مينۋت 11 سەكۋندتى قۇرايدى.
سونىمەن بىرگە، كومانداسى جارىستان شىعىپ قالسا دا، جورىقتى ءوز ەركىمەن جالعاستىرىپ، 1 300 شاقىرىمدى جەكە دارا باعىندىرعان 10 شاباندوزدىڭ ءارقايسىسىنا تورەشىلەر شەشىمىمەن 1 ميلليون تەڭگە كولەمىندەگى قارجىلاي سىيلىق بەرىلدى.
ەكى اپتالىق الامانعا قاتىسىپ، شاباندوزدارمەن بىرگە 1 300 شاقىرىمدى باعىندىرعان بەينەۋ اۋدانىنىڭ تۋماسى، قازاقستاننىڭ قۇرمەتتى قۇرىلىسشىسى، ەلگە بەلگىلى ۆەلوشاباندوز راببيم بوراشوۆقا دا تورەشىلەر «ەڭ ۇزدىك جانكۇيەر» نوميناسياسىن بەلگىلەپ، 1 000 000 تەڭگە كولەمىندە قارجىلاي سىيلىق تابىستالدى. ماڭعىستاۋدىڭ «كوكمويناق» كومانداسىنا جانكۇيەر ۆەلوشاباندوز بۇعان دەيىنگى مارافون-بايگەگە قاتىسىپ، تۇركىستانعا دەيىنگى 1 200 شاقىرىمدى باعىندىرعان بولاتىن.
جالپى 5-19 قىركۇيەك ارالىعىندا مارافونشىلار ەلوردادان تۇركىستان قالاسىنا دەيىن 1 300 شاقىرىمنان اسا قاشىقتىقتى باسىپ ءوتتى. مارافون 14 كەزەڭگە ءبولىندى. ەلىمىزدىڭ 19 وڭىرىنەن مارافونعا 1 كوماندادان قاتىستى. مارافونعا قاتىسۋشىلارعا ۇلى دالا رۋحىن سەزىنۋگە جانە كيەلى جەرلەرىمىز – جوشى حان، الاشا حان كەسەنەلەرى، تۇركى رۋحانياتىنىڭ بەسىگى تۇركىستان قالاسى سياقتى تاريحي ورىندارعا زيارات جاساۋعا مۇمكىندىك تۋدى.
ايتا كەتەيىك، «ۇلى دالا جورىعى» مارافون-بايگەسى رەسپۋبليكالىق «JORYQ» ات سپورتى فەدەراسياسىنىڭ، ق ر تۋريزم جانە سپورت مينيسترلىگىنىڭ ۇيىمداستىرۋىمەن، «اMANAT» پارتياسىنىڭ جانە ق ر ۇلتتىق سپورت قاۋىمداستىعىنىڭ قولداۋىمەن ءوتتى.
ال، مارافون-بايگەنىڭ باس سەرىكتەسى – «Sport Qory» تۋريزم يندۋسترياسى مەن سپورتتى قولداۋ قورى بولدى.