ستيپەنديا تاريح عىلىمدارىنىڭ كانديداتى ءالىمعازى داۋلەتحان اتىندا.
ق ر جازۋشىلار وداعىنىڭ مۇشەسى، تاريح عىلىمدارىنىڭ كانديداتى ءالىمعازى داۋلەتحان 80-گە تولدى. وسىعان وراي، 15 قىركۇيەك كۇنى ش.ش. ءۋاليحانوۆ اتىنداعى تاريح جانە ەتنولوگيا ينستيتۋتىندا “ەجەلگى جانە ورتاعاسىرلارداعى قازاقستاننىڭ جاڭا تاريحي ماسەلەلەرى” اتتى حالىقارالىق عىلىمي-پراكتيكالىق كونفەرەنسيا ءوتتى، دەپ حابارلايدى Almaty-akshamy.kz.
حالىقارالىق عىلىمي-پراكتيكالىق كونفەرەنسياعا 50-دەن استام ادام قاتىستى. ولاردىڭ قاتارىندا، مەرەيتوي يەسىنىڭ ەتجاقىن تۋىستارى جانە قازاقستاننىڭ بەلگىلى عالىمدارى، اكادەميكتەر، عىلىم دوكتورلارى مەن اقىن، جازۋشىلار سونداي-اق، قازاقستان رەسپۋبليكاسىنىڭ جەتەكشى جوعارى وقۋ ورىندارىنىڭ پروفەسسورلارى كەلىپ قاتىستى.
ءالىمعازى داۋلەتحان ۇلى 1943 جىلدىڭ 15 قىركۇيەگىندە قحر شۇار-نىڭ ىلە قازاق اۆتونوم وبلىسىنا قاراستى كۇنەس اۋدانىنىڭ تۇرگەن اۋىلىندا ءمۇعالىم وتباسىندا دۇنيەگە كەلدى.
كونفەرەنسيا مودەراتور تىزگىنىن م.و. اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى، ق ر ۇعا-نىڭ كوررەسپوندەنت-مۇشەسى، فيلول.ع.د.، پروفەسسور ماتىجانوۆ كەنجەحان ءسلامجان ۇلى جانە ش.ش. ءۋاليحانوۆ اتىنداعى تاريح جانە ەتنولوگيا ينستيتۋتىنىڭ جەتەكشى عىلىمي قىزمەتكەرى، اعا ساراپشى، ت.ع.ك.، شاشايەۆ اۋەزحان قادىرجان ۇلى جۇرگىزدى.
حالىقارالىق عىلىمي-پراكتيكالىق كونفەرەنسيادا قۇتتىقتاۋ سوزىمەن بىرگە، جازۋشى، كينودراماتۋرگ، تۇركى دۇنيەسى ادەبي سىيلىعىنىڭ لاۋرەاتى، ت. جۇرگەنوۆ اتىنداعى ونەر اكادەمياسىنىڭ پروفەسسورى قازاقستاننىڭ ەڭبەك سىڭىرگەن قايراتكەرى سماعۇل ابات ۇلى ەلۋباي، ءال-فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى م.ا.، فيلول. ع.د.، جۇباي ورىناي، قازاق قىزدار پەداگوگيكالىق ۋنيۆەرسيتەتىنىڭ پروفەسسورى، فيلول. ع.د.، زايكەنوۆا رۋدا زايكەن قىزى، ءال-فارابي اتىنداعى قازاق ۇلتتىق ۋنيۆەرسيتەتى قازاقستان تاريحى كافەدراسىنىڭ مەڭگەرۋشىسى، ت.ع.د.، پروفەسسور، ق ر ۇعا-نىڭ اكادەميگى كارىبايەۆ بەرەكەت باقىتجان ۇلى، ءال-فارابي اتىنداعى قازاق ۇلتتىق ۋنيۆەرسيتەتى جانىنداعى قازىرگى زامانعى قىتايدى زەرتتەۋ ورتالىعىنىڭ ديرەكتورى، ت.ع.د.، پروفەسسور ءنابيجان مۇقامەتحان ۇلى، جازۋشى-پۋبليسيست، قازاقستان پەداگوگيكالىق عىلىم اكادەمياسىنىڭ اكادەميگى، پروفەسسور توقاشبايەۆ مارات ءبايدىلدا ۇلى قاتارلى تاريحشىلار مەن بەلگىلى عالىمدار باياندامالارىن جاسادى. بايانداما كەزىندە تاۋەلسىز قازاقستانداعى تاريح عىلىمىنىڭ ءدوپ كەلگەن وزەكتى ماسەلەلەرى مەن تۇيىتكىلدى پروبلەمالارى كەڭىنەن تالقىلاندى جانە عىلىمي-پراكتيكالىق كونفەرەنسيانىڭ قورىتىندىسى نەگىزىندە ورتاق قارار قابىلداندى.
سونداي-اي، كونفەرەنسيا كەزىندە «شىعىس تۇركىستانداعى دۇربەلەڭمەن وتكەن قىرىق جىل (1912-1952)» اتتى زەرتتەۋ مونوگرافياسى، «ۇلىلاردىڭ ۇلاعاتى» اتتى اۆتوردىڭ شىعارماشىلىق ەڭبەگى جانە «شىعىستىڭ سونبەس جۇلدىزى – دۋبەك شالعىنبايەۆ» اتتى قولجازبا مۇراعاتتىق زەرتتەۋ ەڭبەگى مەن عىلىمي-پراكتيكالىق كونفەرەنسيا جيناعىنىڭ تۇساۋكەسەرى ءوتتى. سونىمەن بىرگە جاس زەرتتەۋشى، تاريحشى عالىمدارعا ارنالعان ءالىمعازى داۋلەتحان ۇلى اتىنداعى ستيپەنيا تاعايىندالدى.