2024 جىلدىڭ 4 جەلتوقسانىندا م.مامەتوۆا اتىنداعى №28 مەكتەپ-ليسەيدە تاۋەلسىزدىك كۇنىنە وراي ۇيىمداستىرىلعان «جەلتوقسان – تاۋەلسىزدىك جارشىسى» جانە 11 جەلتوقساندا وتكەن «جەلتوقسان – تاۋەلسىزدىگىمىزدىڭ ۇلى رۋحى» اتتى كەزدەسۋلەر ەرەكشە مانگە يە بولدى. بۇل ءىس-شارالار جەلتوقسان كوتەرىلىسىنىڭ تاريحي ماڭىزى مەن تاۋەلسىزدىك جولىنداعى كۇرەستى ۇلىقتاي وتىرىپ، جاستاردى وتانسۇيگىشتىككە تاربيەلەۋگە باعىتتالدى.
كەزدەسۋلەر بارىسىندا جەلتوقسان وقيعاسىنىڭ ەلىمىزدىڭ تاۋەلسىزدىككە جەتۋ جولىنداعى العاشقى قادام ەكەندىگى كەڭىنەن تالقىلاندى. قيىن-قىستاۋ كەزەڭدە الاڭعا شىققان قازاق جاستارىنىڭ قايسار رۋحى مەن ەرلىگى قازىرگى ۇرپاققا ۇلكەن ساباق. جەلتوقسان كوتەرىلىسى – ۇلتتىق سانا-سەزىمنىڭ قايتا جاڭعىرۋىنىڭ نىشانى بولىپ، ۇلت تاريحىندا وشپەس ءىز قالدىرعان وقيعا.
كەزدەسۋدىڭ قۇرمەتتى قوناقتارى جەلتوقسان وقيعاسىنا قاتىسقان باتىر قىزدارىمىزدىڭ ءبىرى ساتامبايەۆا گۇلنار ابەن قىزى، وقيعا كۋاگەرلەرى ءارى ۇستازدار تەلكارايەۆ قاليبەك نۇرعازييەۆيچ پەن وتەنيازوۆ ءنادىر ءابجانوۆيچ بولدى. ولار جەلتوقسان وقيعاسى كەزىندەگى قيىندىقتار مەن كۇرەس جولى تۋرالى جاستارعا اسەرلى اڭگىمەلەر ايتتى. قوناقتاردىڭ ەستەلىكتەرى وقۋشىلاردىڭ بويىندا وتانسۇيگىشتىك رۋحتى وياتىپ، تاريحقا قۇرمەتپەن قاراۋعا شاقىردى.
كەزدەسۋ اياسىندا 5-سىنىپ وقۋشىلارىن «جاس ۇلان» بالالار مەن جاسوسپىرىمدەر ۇيىمىنا، ال 2-سىنىپ وقۋشىلارىن «جاس قىران» ۇيىمىنا قابىلداۋ ءراسىمى ءوتتى. بۇل ءراسىم جاس ۇرپاقتىڭ وتانسۇيگىشتىك رۋحىن قالىپتاستىرىپ، ەلىنىڭ پاتريوتى بولۋعا دەگەن نيەتىن كۇشەيتتى.
كەزدەسۋ وقۋشىلاردىڭ ورىنداۋىنداعى اندەر مەن ولەڭدەرگە ۇلاستى. «تاۋەلسىزدىك ەل ۇرانى» ءانى مەن مۇقاعالي ماقاتايەۆتىڭ «بابالارىم، راقمەت ساعان» ولەڭى تىڭداۋشىلاردىڭ جۇرەگىندە تەرەڭ ءىز قالدىردى. بۇل شىعارمالار تاۋەلسىزدىكتىڭ ماڭىزىن جاستاردىڭ ساناسىنا سىڭىرۋگە سەپتىگىن تيگىزدى.
كەزدەسۋ بارىسىندا ليسەي ديرەكتورى مەدەتبەكوۆا ايسۇلۋ تەمىرعالي قىزى جەلتوقسان وقيعاسىنىڭ تاريحي ماڭىزدىلىعىن اتاپ ءوتىپ، كۋاگەرلەرگە العىس ءبىلدىردى. سونىمەن قاتار، م.مامەتوۆاعا ارنالعان «جاۋىنگەرلىك داڭق» مۇراجايىنىڭ جاستاردى پاتريوتتىققا تاربيەلەۋدەگى ءرولى ەرەكشە اتاپ ءوتىلدى. بۇل مۇراجاي ەل تاۋەلسىزدىگى ءۇشىن كۇرەسكەن باتىرلاردىڭ ەرلىگىن ۇرپاق جادىندا ساقتاۋعا باعىتتالعان.
كەزدەسۋ بارىسىندا جەلتوقساننىڭ بوزداقتارىن ەسكە الۋ ءۇشىن ءبىر مينۋت ۇنسىزدىك جاريالاندى. بۇل ءىس-شارا جەلتوقسان كوتەرىلىسىنىڭ تاريحي ءمانىن ۇلىقتاپ، بۇگىنگى ۇرپاقتىڭ ۇلتتىق سانا-سەزىمىن ارتتىرۋعا ۇلكەن ۇلەس قوستى. جاستاردىڭ جۇرەگىندە تاۋەلسىزدىك رۋحى ماڭگىلىك ساقتالىپ، ەل بولاشاعى ءۇشىن وسىنداي تاعىلىمدى شارالاردىڭ ماڭىزى زور.