«مۋسورگي» جوباسى جۇرتتى تاڭقالدىردى
قالا تۇرعىندارى كوبىرەك جينالاتىن، اسىرەسە جاستاردىڭ الاڭىنا اينالعان اربات بۇگىن، 24 قىركۇيەك كۇنى قوقىسقا تولىپ كەتتى. قوقىستاردى جامىلعان «قۇبىجىقتار» اربات بويىمەن شەرۋلەتىپ قالا تۇرعىندارىنىڭ نازارىن وزىنە اۋداردى دەپ حابارلايدى almaty-akshamy.kz.
انىعىندا بۇل ءار سالاداعى ەكو-بەلسەندىلەر ۇيىمداستىرعان ەكو-ارت جوبا بولاتىن. 8 سۋرەتشى جەتەكشى مەن ولاردىڭ كومانداسى قالاداعى ءار اۋداننىڭ ەكولوگيالىق جاعدايىن زەرتتەپ، جينالعان قوقىستاردان قۇبىجىق كەيىپكەرلەردى جاساپ شەرۋ وتكىزدى.
شەرۋشىلەردىڭ تىزبەگىن باستاپ قارشاداي عانا بالا الا بايراعىن بۇلعاپ ءجۇردى. ۇستىنە ءاپپاق قارداي كيىم كيگەن. ونىڭ ارتىنان قالماي قۋالاعان «قوقىس-بيكە مۇناي قىزى» اق قاردى قۋالاعان قوقىستار تىزبەگىن باستاعان. وعان ىلەسكەن «قۇبىجىقتار» ەل نازارىن اۋدارماي قالعان جوق. القام-سالقام «مۋتانتتار» ماقساتى دا سول ەدى – الماتىلىقتاردى ەكولوگيالىق ورتاعا جانە قوقىستارعا نازارىن اۋدارۋ.
قاتىسۋشىلاردىڭ ءبىرى ءمولدىر ساعىندىق بۇل شەرۋدىڭ ءمانىن بىلاي دەپ ءتۇسىندىردى: «بۇل «مۋسورگي» دەپ اتالاتىن جوبا. ەلىمىزدە ءبىرىنشى رەت ءوتىپ وتىر. قالانىڭ ءار اۋداندارىنا ءبولىنىپ ونداعى ەكولوگيالىق جاعدايدى زەرتتەۋگە تىرىستىق، ەكى اپتاداي ۋاقىت جۇمساپ لاستانۋ جاعدايىن باعالادىق، سۋرەتتەر مەن دەرەكتەردى توپتاستىردىق. ايتالىق، ءبىزدىڭ توپ بوستاندىق اۋدانىندا بولدىق، وندا ءبىز مۇزدىقتاردىڭ ەرۋى، جىلىنۋ سىندى جاعدايلار بويىنشا زەرتتەۋ جۇرگىزدىك. ال بۇگىن ءبىز سوندا جينالعان قوقىستاردان وسىنداي قۇبىجىق كەيىپكەرلەر جاساپ، شەرۋلەتىپ قالا تۇرعىندارىنىڭ نازارىن ەكولوگيانىڭ ماڭىزىنا بۇرعىمىز كەلدى». ءمولدىردىڭ ايتۋىنشا، بۇل جوباعا ءتۇرلى سالانىڭ ادامدارى توپتاسقان. ولاردىڭ اراسىندا سۋرەتشىلەر، قالامگەرلەر، مۋزىكانتتار، مەديسينا قىزمەتكەرلەرى، وقىتۋشى ۇستازدار دا بار.
«ارينە، تاڭ قالدىم. ەكولوگيا ماسەلەسى بويىنشا شارا ەكەنىن بىردەن ءتۇسىندىم. قوقىستاردىڭ، لاستانۋدىڭ ادام مەن پلانەتامىزعا تيگىزىپ جاتقان اسەرىن جەتكىزگىسى كەلگەنىن ءتۇسىندىم. بۇل راسىندا ماڭىزدى ماسەلە دەپ ويلايمىن. ءبىراق، قوعامعا تەرەڭىرەك اسەر ەتۋ ءۇشىن جالعىز بۇل شارا جەتكىلىكسىز»، – دەيدى قالا تۇرعىنى ارمان.
جوبا قاتىسۋشىلارىنىڭ ەكى اپتالىق ەڭبەگىنىڭ ناتيجەسىندە جينالعان دەرەكتەر مەن فوتوسۋرەتتەردىڭ، سونداي-اق، جاراقسىزداردان جاسالعان ونەر تۋىندىلارىنىڭ كورمەسى اربات ماڭىنداعى Dump Gallery-دە 30 قىركۇيەك پەن 8 قازان اراسىندا وتەدى. جوبا جەتەكشىلەرى الماتىلىقتاردى ەكولوگيا ماسەلەسىنە نازار اۋدارۋعا شاقىرادى.