تاۋەلسىزدىك رۋحىمەن ءوسىپ كەلە جاتقان بۇگىنگى جاس بۋىن –ءبىزدىڭ ەرتەڭگى ءۇمىتىمىز،سەنىمدى تىرەگىمىز.
نۇرسۇلتان نازاربايەۆ.
2013 جىلدىڭ باستى وقيعالارى
- اكىمشىلىك مەملەكەتتىك قىزمەتتى رەفورمالاۋ
- زەينەتاقى رەفورماسى
- بيلىكتىڭ جەرگىلىكتى ورگاندارى باسشىلارىنىڭ سايلاۋى
- «بولاشاق» پرەزيدەنتتىك باعدارلاماسىنىڭ 20 جىلدىعى.
بۇل جىل قازاقستاندى الەمنىڭ ەڭ دامىعان 30 ەلىنىڭ قاتارىنا ەنگىزۋدى ماقسات تۇتقان «قازاقستان – 2050» ستراتەگياسىن جۇزەگە اسىرۋدىڭ العاشقى جىلى بولدى. سوندىقتان تاۋەلسىزدىگىمىزدىڭ بۇل كەزەڭى وسى ستراتەگيا باسىمدىقتارىنا سايكەس مەملەكەتتىك باسقارۋ جۇيەسىن ساپالى قايتا قۇرۋدىڭ باستالۋىمەن ەرەكشەلەنەدى. مەملەكەتتىك باسقارۋدى ورتالىقسىزداندىرۋ مەن اكىمشىلىك رەفورما، قۇقىقتىق جۇيەنى جاڭعىرتۋ، جەمقورلىقپەن كۇرەس - ستراتەگيالىق العاشقى قادامدار رەتىندە قولعا الىندى. وسى جىلعى ماڭىزدى قوعامدىق-ساياسي شارالاردىڭ بارلىعىنىڭ نەگىزگى ماقساتى ستراتەگيانى جۇزەگە اسىرۋعا باعىتتالدى. ماسەلەن، 2013 جىلدىڭ ساۋىرىندە وتكەن قازاقستان حالقى اسسامبلەياسىنىڭ حح سەسسياسى «قازاقستان – 2050» ستراتەگياسى: ءبىر حالىق - ءبىر ەل – ءبىر تاعدىر» ديەۆيزىمەن ءوتتى. سەسسيا قورىتىندىسىندا قازاقستان حالقى اسسامبلەياسىنىڭ 2020 جىلعا دەيىنگى دامۋ كونسەپسياسى قابىلداندى.
ال، قازان ايىندا ءوزىنىڭ كەزەكتەن تىس حV سەزىندە «نۇر وتان» پارتياسى دا جاڭا ساياسي دوكتريناسىن بەكىتتى.
قاراشا ايىندا قازاقستان رەسپۋبليكاسى پرەزيدەنتىنىڭ حالىقارالىق «بولاشاق» ستيپەندياسى تۇلەكتەرى مەن ستيپەندياتتارىنىڭ فورۋمى وتكىزىلدى. «بولاشاقتىڭ» قۇرىلعانىنا 20 جىل تولۋىنا ارنالعان بۇل جيىندا دا ستراتەگيا اياسىنداعى ماقسات-مىندەتتەر ايتىلدى، جاس ۇرپاقتىڭ مەملەكەتىمىزدىڭ ۇزاق مەرزىمدى دامۋىنداعى جاۋاپكەرشىلىگى ماسەلەلەرى قامتىلدى. «قازاقستان-2050» ستراتەگياسى اياسىندا جالپى قازاقستان حالقىنىڭ رۋحاني دامۋىنىڭ باستى باعدارى ىسپەتتى – ماڭگىلىك ەل پاتريوتتىق اكتىسى قحا-نىڭ XXIV سەسسياسىندا ۇسىنىلىپ، قابىلداندى. بۇل جىلى الەمنىڭ ءىرى ارحيۆتەرىندە جاتقان قازاقستان تاريحىنا قاتىستى قۇجاتتاردى جۇيەلى تۇردە ىزدەۋ جانە زەرتتەۋ بويىنشا «حالىق تاريح تولقىنىندا» اتتى جوبا قابىلداندى.
2013 جىلدان باستاپ كۇنتىزبەگە وتباسى كۇنى ەنگىزىلدى. ونى قىركۇيەك ايىنىڭ ەكىنشى جەكسەنبىسىندە اتاپ ءوتۋ داستۇرگە اينالدى. «مەرەيلى وتباسى» جالپىۇلتتىق بايقاۋى دا كەڭىنەن قانات جايدى. وسى جىلى اقپان جانە ءساۋىر ايلارىندا دارا بىتىمگەر رەتىندە قازاقستان بيلىگىنىڭ ۇيىمداستىرۋىمەن الماتىدا يراننىڭ جانە «التىلىق توبىنىڭ» (رەسەي، اقش، جۇڭگو، ۇلىبريتانيا، فرانسيا، گەرمانيا) كەلىسسوزدەرىنىڭ العاشقى ەكى راۋندى وتكىزىلدى. الماتى كەلىسسوزدەرىنىڭ قورىتىندىلارى يراندىق يادرولىق باعدارلاما اياسىنداعى جاعدايلاردى رەتتەۋ بويىنشا بىرلەسكەن جالپى ىس-ارەكەت جوسپارىنىڭ نەگىزىنە الىندى.
2013 جىلدىڭ ماۋسىم ايىندا ەلىمىزدىڭ مادەني ومىرىندەگى ەلەۋلى وقيعالاردىڭ ءبىرى – «استانا وپەرا» تەاترى اشىلدى. وسى ايدا ەلباسى اتاپ وتكەندەي، جاھاندىق داعدارىس سالدارىن جەڭىلدەتۋ ماقساتىندا ۇكىمەت «جۇمىسپەن قامتۋدىڭ جول كارتاسى-2020» باعدارىن قابىلدادى. وسى باعدارلاما بويىنشا 2011-2014 جىلدار ارالىعىندا 470 مىڭنان استام ادام جۇمىسقا ورنالاسۋ مۇمكىندىگىنە يە بولدى. 120 مىڭنان استامى جاڭا ماماندىقتى يگەردى نەمەسە بىلىكتىلىگىن كوتەردى، ال 30 مىڭداي اۋىل تۇرعىنى كاسىبىن دوڭگەلەتۋ ءۇشىن جەڭىلدىكپەن شاعىن نەسيەلەر الدى. ناتيجەسىندە ەلىمىزدەگى جۇمىسسىزدىق دەڭگەيى كەلەر جىلى 5 پايىزعا تومەندەگەن ەكەن. جۇمىسقا ورنالاسقان ادامدار سانى 8،6 ميلليون ادامعا كوبەيدى، ءوزىن-وزى جۇمىسپەن قامتىعاندار مولشەرى ازايعان. ءىرى جانە ورتاشا كاسىپورىنداردىڭ 80 پايىزىندا ۇجىمدىق شارت جاسالدى. الەۋمەتتىك كليماتتى زەرتتەۋ ماقساتىندا مونيتورينگ جاريالانىپ، ەڭبەكتى قورعاۋ ارتتى، ەڭبەكاقى بويىنشا قارىزدار مەن داۋ-دامايلاردىڭ ءتۇپ ءمانى انىقتالدى.
قاراشادا پرەزيدەنت تاپسىرماسى اياسىندا ۇكىمەت 2014–2016 جىلدارداعى كوشى-قون پروبلەمالارىن شەشۋ بويىنشا كەشەندى جوسپاردى بەكىتتى. ول ىشكى جانە سىرتقى كوشى-قونعا باقىلاۋدى كۇشەيتۋدى، وتاندىق كاسىبي ماماندار ءۇشىن قولايلى جاعدايلار تۋعىزۋدى، سونداي-اق شەتەلدىك جوعارى كاسىبي مامانداردىڭ كەلۋى ءۇشىن كومەك قولىن سوزۋدى كوزدەدى. مۇنىڭ ءبارى ادام كاپيتالىنىڭ ساپاسىن جاقسارتۋعا جاردەمدەسكەنى ءسوزسىز.
وسى ايدا ەكاتەرينبۋرگتە قازاقستان مەن رەسەي اراسىنداعى قارىم-قاتىناس جاڭا بىرەگەي قۇجاتپەن – ەكى مەملەكەتتىڭ دە حالىقتارىنىڭ مۇددەسى مەن ماقساتتارىنا تولىق جاۋاپ بەرەتىن ءححى عاسىرداعى تاتۋ كورشىلىك پەن وداقتاستىق تۋرالى كەلىسىمشارتپەن تولىقتى. تاراپتار: مەملەكەتتىك ەگەمەندىك پەن تاۋەلسىزدىككە ءوزارا قۇرمەت، تەڭقۇقىقتىق جانە ىشكى ىستەرگە ارالاسپاۋ، كۇش قولدانباۋ نەمەسە كۇشپەن قورقىتپاۋ، ايماقتىق تۇتاستىق، شەكارانىڭ بۇزىلمايتىندىعى قاعيداتتارىن باسشىلىققا الۋ جونىندە مىندەتتەمەلەر قابىلدادى.
1 قاڭتار
ەلىمىزدىڭ بۇقارالىق اقپارات قۇرالدارىندا مەملەكەت باسشىسى نۇرسۇلتان نازاربايەۆتىڭ قازاقستان حالقىن جاڭاجىلدىق قۇتتىقتاۋى جاريالاندى. «ەلىمىز جوعارى ەكونوميكالىق وسىمگە قول جەتكىزدى. قازاقستان الەمدەگى باسەكەگە قابىلەتتى ەلدەر اراسىندا 51-ورىنعا تابان تىرەدى. بۇل – ءبىزدىڭ ءسوزىمىز بەن ءىسىمىزدىڭ ءبىر ارنادا توعىسقانىنىڭ، ەڭ باستىسى، ەل بولىپ ءبىر جەڭنەن قول، ءبىر جاعادان باس شىعارا الاتىنىمىزدىڭ دالەلى. ءبىزدىڭ ماقساتكەرلىگىمىز لوندونداعى جازعى وليمپيالىق ويىندار بارىسىندا ايقىن كورىندى. قازاقستان قۇراماسى ۇزدىك 12 ەلدىڭ قاتارىنا كىردى. بۇل جەڭىس قازاقستاندىقتاردى بىرىكتىرۋدىڭ ماڭىزدى فاكتورىنا اينالدى»،– دەدى ەلباسى.
23 قاڭتار
اقوردادا ەلباسىنىڭ توراعالىعىمەن ۇكىمەت مۇشەلەرىمەن، ق ر پرەزيدەنتى اكىمشىلىگىنىڭ جەتەكشىلەرىمەن جيىن ءوتتى. وندا 2012 جىل قورىتىندىلانىپ، 2013 جىلداعى ەل دامۋىنىڭ ناقتى شارالارى تالقىلاندى.
30 قاڭتار
مەملەكەت باسشىسىنىڭ ءتوراعالىق ەتۋىمەن قۇقىق قورعاۋ ورگاندارىنىڭ 2012 جىلعى جۇمىسىن قورىتىندىلاعان جانە «قازاقستان-2050» ستراتەگياسىن جۇزەگە اسىرۋ مىندەتتەرىنە ارنالعان كەڭەيتىلگەن كەڭەس بولىپ ءوتتى.
4 اقپان
مەملەكەت باسشىسى اقوردادا ەل دامۋىنىڭ اعىمداعى ماسەلەلەرىنە قاتىستى كەڭەس وتكىزدى. باس قوسۋدا بانك سەكتورى،زەينەتاقى رەفورماسى، مۇناي-گاز سالاسىن ودان ءارى يگەرۋ ماسەلەلەرى تالقىلاندى.
6 اقپان
ەلباسى نۇرسۇلتان نازاربايەۆ مادريدتە يسپانيا كورولى I حۋان كارلوسپەن كەزدەستى. مەملەكەت باسشىسىنىڭ بۇل ساپارى اياسىندا ەكى ەلدىڭ تۋريزم مەن حالىقارالىق ساياسات سالاسىنداعى، سونداي-اق مادەني-گۋمانيتارلىق باعىتتاعى ءوزارا ىنتىماقتاستىق ماسەلەلەرى قارالدى.
8 اقپان
ەلباسى رەسەيگە جۇمىس ساپارىمەن باردى. ەكى ەل پرەزيدەنتتەرى نۇرسۇلتان نازاربايەۆ پەن ۆلاديمير پۋتين مەملەكەتتەر ىنتىماقتاستىعىنىڭ اۋقىمدى ماسەلەلەرى جونىندەگى ەكىجاقتى ماسەلەلەرگە ەرەكشە كوڭىل ءبولىپ، 2013-2015 جىلدارعا ارنالعان بىرلەسكەن ءىس-قيمىل جوسپارىن تالقىلاپ، ماڭىزدى ۋاعدالاستىققا قول جەتكىزدى.
1 ناۋرىز
مەملەكەت باسشىسى قازاقستانعا كەلگەن فرانسيانىڭ سىرتقى ىستەر ءمينيسترى لوران فابيۋستى قابىلدادى. نۇرسۇلتان نازاربايەۆ مارتەبەلى مەيماننىڭ بۇل ساپارى ەكىجاقتى قاتىناستاردىڭ نىعايۋىنىڭ جوعارى دەڭگەيىن تانىتاتىنىن اتاپ ءوتتى. «ءبىزدىڭ ەلدەرىمىزدىڭ ىنتىماقتاستىعى سەرپىندى دامىپ كەلەدى. ءبىز ءۇشىن فرانسيا ەۋروپالىق وداق ەلدەرى اراسىندا ءىرى ينۆەستورلاردىڭ بىرىنەن سانالادى. قازىرگى ۋاقىتتا ءبىز ءتۇرلى قىزمەت سالالارىنداعى 25 بىرلەسكەن جوبانى ىسكە اسىرۋدامىز، ەكىجاقتى ءوزارا ءىس-قيمىلدى دامىتۋ پەرسپەكتيۆالارى وتە زور»،– دەدى ەلباسى.
11 ءساۋىر
نۇر-سۇلتانعا قىرعىز رەسپۋبليكاسىنىڭ پرەزيدەنتى جۇمىس ساپارىمەن كەلدى. نۇرسۇلتان نازاربايەۆ پەن المازبەك اتامبايەۆ كەزدەسۋ بارىسىندا ىنتىماقتاستىقتى ودان ءارى دامىتۋدىڭ جاي-كۇيى مەن پەرسپەكتيۆالارىن، قازاقستان-قىرعىزستان بىرلەسكەن ينۆەستيسيالىق قورى قىزمەتىنىڭ ناقتى باعىتتارىن تۇجىرىمدادى.
17 ءساۋىر
فينليانديا رەسپۋبليكاسىنىڭ پرەزيدەنتى ساۋلي ءنيينيستو قازاقستانعا مەملەكەتتىك ساپارمەن كەلدى. ەل پرەزيدەنتى نۇرسۇلتان نازاربايەۆ پەن ساۋلي نيينيستەنىڭ كەزدەسۋىندە تاراپتار ەكى مەملەكەت اراسىنداعى ەكىجاقتى ءوزارا ءىس-قيمىلدىڭ نەگىزگى باعىتتارى جونىندەگى كەڭ اۋقىمدى ماسەلەلەردى ، ونىڭ ىشىندە ەكى ەلدىڭ ساۋدا-ەكونوميكالىق ىنتىماقتاستىعىن تەرەڭدەتۋدى تالقىلادى.
18 ءساۋىر
جوعارى قامقورشىلىق كەڭەستىڭ شەشىمىمەن نازاربايەۆ ۋنيۆەرسيتەتىنىڭ 2020 جىلعا دەيىنگى ستراتەگياسى جانە جاڭا جارعىسى بەكىتىلدى. ۋنيۆەرسيتەت كلاسسيكالىق اكادەميالىق باسقارۋ جۇيەسىنە كوشتى.
24 ءساۋىر
نۇر-سۇلتانداعى بەيبىتشىلىك جانە كەلىسىم سارايىندا قازاقستان حالقى اسسامبلەياسىنىڭ مەرەيتويلىق حح سەسسياسى ءوتتى.
ەلباسى، قازاقستان حالقى ااسسامبلەياسىنىڭ ءتوراعاسى نۇرسۇلتان نازاربايەۆتىڭ قاتىسۋىمەن وتكەن بۇل شارا «قازاقستان-2050» ستراتەگياسى: ءبىر حالىق، ءبىر ەل، ءبىر تاعدىر» تاقىرىبىندا بولدى.
22 مامىر
پرەزيدەنت جارلىعىنا سايكەس، ەكونوميكانى دامىتۋعا جانە ءارتاراپتاندىرۋعا جاردەمدەسۋ، ينۆەستيسيالاردى تارتۋ، كلاستەرلەردى دامىتۋ ماقساتىندا «بايتەرەك» ۇلتتىق باسقارۋشى حولدينگى قۇرىلدى.
23 مامىر
ەلوردادا ەلباسى نۇرسۇلتان نازاربايەۆتىڭ باستاماسىمەن Vءى استانا ەكونوميكالىق فورۋمىنىڭ اياسىندا بۇۇ-نىڭ قولداۋىمەن تۇڭعىش رەت بۇكىلالەمدىك داعدارىسقا قارسى كونفەرەنسيا (بدقك) ءوتتى.تاۋەلسىزدىك سارايىندا الەمنىڭ 132 مەملەكەتىنەن كەلگەن 11 مىڭعا جۋىق ساياساتكەرلەر مەن ساراپشىلار جانە وسى سالا ماماندارى جاھاندىق ەكونوميكانى داعدارىستان شىعارۋ جولدارىنىڭ ءتۇيىندى پروبلەمالارىن تالقىلادى.
29 مامىر
ەلوردادا قازاقستان پرەزيدەنتى نۇرسۇلتان نازاربايەۆتىڭ، رەسەي فەدەراسياسىنىڭ پرەزيدەنتى ۆلاديمير ءپۋتيننىڭ، بەلارۋس پرەزيدەنتى الەكساندر لۋكاشەنكونىڭ جانە مۇشە بولۋعا ءوتىنىش بەرگەن قىرعىز رەسپۋبليكاسىنىڭ پرەزيدەنتى المازبەك اتامبايەۆتىڭ، بايقاۋشى مارتەبەسىن الۋعا نيەت بىلدىرگەن ۋكراينا پرەزيدەنتى ۆيكتور يانۋكوۆيچتىڭ قاتىسۋىمەن جوعارى ەۋرازيالىق ەكونوميكالىق كەڭەستىڭ كەزەكتى وتىرىسى بولدى.
1 شىلدە
قازاقستانعا مەملەكەتتىك ساپارمەن ۇلىبريتانيا پرەمەر-مينيسترى ديەۆيد كەمەرون كەلدى. نۇرسۇلتان نازاربايەۆ پەن ديەۆيد كەمەرون ەكى ەل اراسىنداعى ىنتىماقتاستىق ماسەلەلەرىن تالقىلادى. كەزدەسۋ قورىتىندىسىندا ەكى ەل اراسىنداعى ستراتەگيالىق ارىپتەستىك جونىندەگى بىرلەسكەن مالىمدەمەگە قول قويىلدى. ۇلىبريتانيا قازاقستاندى ساۋدا مەن ينۆەستيسياعا قولايلى باسىم ەلدەردىڭ توبىنا قوستى.2013–2014 جىلدارى فرانسيا مەن قازاقستان مادەنيەت كۇندەرىمەن الماستى.
15-16 تامىز
ءازىربايجاندا تۇركىتىلدەس مەملەكەتتەر ىنتىماقتاستىق كەڭەسىنىڭ (تۇركىتىلدەس مەملەكەتتەر ىنتىماقتاستىعىنىڭ كەڭەسى) ءۇشىنشى ءسامميتى بولىپ ءوتتى. وعان قازاقستان پرەزيدەنتى نۇرسۇلتان نازاربايەۆ، تۇركيا پرەزيدەنتى ابدۋللا گۇل، ازەربايجان پرەزيدەنتى يلحام الييەۆ، قىرعىزستان پرەزيدەنتى المازبەك اتامبايەۆ جانە تۇرىكمەنستان مينيسترلەر كابينەتى ءتوراعاسىنىڭ ورىنباسارى ساپاردۋردى تويلييەۆ قاتىستى.
5 قىركۇيەك
قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ «ۇلكەن جيىرمالىقتىڭ» سامميتىنە قاتىسۋ ءۇشىن رەسەي قالاسى سانكت-پەتەربۋرگكە كەلدى. ەلباسى G20 ءسامميتى اياسىندا بۇۇ-نىڭ باس حاتشىسى پان گي مۋنمەن، رەسەي پرەزيدەنتى ۆلاديمير پۋتينمەن، سونداي-اق، باسقا دا مەملەكەتتەردىڭ باسشىلارىمەن جانە دەلەگاسيالار جەتەكشىلەرىمەن كەزدەسۋلەر وتكىزدى.
6-7 قىركۇيەك
قازاقستانعا مەملەكەتتىك ساپارمەن جۇڭگو حالىق رەسپۋبليكاسىنىڭ ءتوراعاسى سي سزينپين كەلدى. ەلباسى نۇرسۇلتان نازاربايەۆ پەن قحر ءتوراعاسى سي سزينپين ءوزارا كەزدەسۋگە ارقاۋ بولعان حالىقارالىق مەملەكەتارالىق ىنتىماقتاستىق ماسەلەلەرىن تالقىلاپ، ماڭىزدى ۋاعدالاستىققا قول جەتكىزدى.
11 قىركۇيەك
ءدال وسى كۇنى قازاق مۇنايى وندىرىسىندە ماڭىزدى قادام جاسالدى. سولتۇستىك كاسپيي قايراڭىندا ورنالاسقان قاشاعان كەن ورنىنان مۇنايدىڭ العاشقى باررەلى وندىرىلە باستادى.
30 قىركۇيەك
قازاقستانعا رەسمي ساپارمەن يسپانيا كورولدىگى ۇكىمەتىنىڭ ءتوراعاسى ماريانو راحوي كەلدى. اقوردادا وتكەن ەكى جاقتى كەزدەسۋدە نۇرسۇلتان نازاربايەۆ پەن ماريانو راحوي قازاقستان مەن يسپانيانىڭ ستراتەگيالىق سەرىكتەستىگىن ودان ءارى دامىتۋ ماسەلەلەرىن تالقىلادى.
24 قازان
بەلارۋس استاناسىندا جوعارى ەۋرازيالىق ەكونوميكالىق كەڭەس ءوتتى. كەڭەس جۇمىسىنا قاتىسقان ەلباسى نۇرسۇلتان نازاربايەۆ ەكىنشى كۇنى تاۋەلسىز مەملەكەتتەر دوستاستىعى مەملەكەت باسشىلارىنىڭ باسقوسۋىندا ءسوز سويلەدى.
20 قاراشا
ەلباسى نۇرسۇلتان نازاربايەۆ استانادا وتكەن قازاقستان رەسپۋبليكاسى سۋديالارىنىڭ Vءى سەزىنىڭ جۇمىسىنا قاتىسىپ، ءسوز سويلەدى. «قازاقستاننىڭ سوت جۇيەسى الدىڭعى قاتاردا بولۋى قاجەت...بارلىق قۇقىق قورعاۋ ورگاندارى ىشىنەن ەڭ جوعارى تۇرعانى جوعارعى cوت بولىپ تابىلادى. جوعارعى cوتتىڭ ابىرويى – قازاقستاننىڭ ابىرويى، جالپى بيلىكتىڭ ابىرويى. ءبىز «قازاقستان-2050» ستراتەگياسىن تەمىرقازىق ەتە وتىرىپ، سوت جۇيەسىن جەتىلدىرۋدى جالعاستىرا بەرۋىمىز قاجەت»،– دەدى پرەزيدەنت.
28 قاراشا
ەلباسى نۇرسۇلتان نازاربايەۆ بۇۇ باس حاتشىسىنىڭ ارنايى وكىلى، بۇۇ اۋعانستانعا ىقپالداستىق جونىندەگى ميسسياسىنىڭ باسشىسى يا.كۋبيشتى قابىلدادى.
29 قاراشا
مەملەكەت باسشىسى استاناداعى تاۋەلسىزدىك سارايىندا وتكەن «بولاشاق» حالىقارالىق باعدارلاماسىنىڭ 20 جىلدىعىنا ارنالعان فورۋمعا قاتىسىپ، ءسوز سويلەدى.
14 جەلتوقسان
ەلباسى نۇرسۇلتان نازاربايەۆ «قازاقستان» ورتالىق كونسەرت زالىندا تاۋەلسىزدىك كۇنىنە وراي وتكەن سالتاناتتى جينالىسقا قاتىسىپ، ءسوز سويلەدى.
24 جەلتوقسان
رەسەي استاناسى ماسكەۋدە جوعارى ەۋرازيالىق ەكونوميكالىق كەڭەستىڭ كەزەكتى باسقوسۋى ءوتتى. جيىندا ەۋرازيالىق ەكونوميكالىق وداق تۋرالى شارت جوباسى، ارمەنيا رەسپۋبليكاسىنىڭ كەدەن وداعى مەن ءبىرتۇتاس ەكونوميكالىق كەڭىستىككە قوسىلۋىنىڭ جول كارتاسى، سونداي-اق ەكونوميكالىق ينتەگراسيا ماسەلەلەرى قارالدى.
ستاتيستيكا:
2013 جىلى پرەزيدەنتىڭ قاتىسۋىمەن 700-دەن استام پروتوكولدىق شارالار، حالىقارالىق سيپاتتاعى 170 كەزدەسۋلەر مەن ءىس-شارالار ءوتتى. ولاردىڭ ىشىندە ەكىجاقتى قارىم-قاتىناس اياسىندا دۇنيەجۇزىلىك 7 ساپار، مەملەكەتارالىق 9 سامميت، 4 حالىقارالىق فورۋم بار. ەلباسى رەسپۋبليكامىزدىڭ 14 وڭىرىنە 23 رەت، شەت ەلدەرگە 16 رەت رەسمي ساپارعا شىقتى. ءبىر جىل ىشىندە بارلىعى 94 زاڭ قابىلدانىپ، 253 جارلىققا قول قويىلدى.پرەزيدەنت ءبىر جىلدا 6،8 مىڭ قۇجاتتاردى قاراپ، قول قويعان ەكەن.
جىل ءتۇيىنى
ەلىمىزدىڭ 2013 جىلعى الەۋمەتتىك-ەكونوميكالىق دامۋ ۇردىسىنە كوز سالساق، جىل قورىتىندىسىندا ءىجو ءوسىمى 6 پايىزعا وسكەنىن ايتقان ابزال. وسى جىلدىڭ ماۋسىم ايىندا «قازاقستان رەسپۋبليكاسىندا زەينەتاقىمەن قامسىزداندىرۋ تۋرالى» زاڭعا قول قويىلدى. شىلدە ايىندا «ءبىرىڭعاي جيناقتاۋشى زەينەتاقى قورى» (بجزق) قۇرىلدى.
بۇعان دەيىن ەلىمىزدە جۇمىس ىستەپ كەلگەن 11 جيناقتاۋشى زەينەتاقى قورىنداعى جالپى جيناق كولەمى 3،116 تريلليون تەڭگەنى (21 ميلليارد دوللار) قۇرادى جانە 8،5 ميلليون كليەنتتىڭ ەسەپشوتى اشىلدى (جۇمىسقا قابىلەتتى ادامداردىڭ 95 %).
الەۋمەتتىك ماسەلەلەردەگى جىلدىڭ ەڭ وزەكتى تاقىرىبى – ايەلدەردىڭ زەينەتكە شىعۋ جاسىنا بايلانىستى ءوربىدى. ءبىرقاتار پىكىرتالاستار ناتيجەسىندە، زەينەتكە شىعۋ جاسى 2014 جىلدان باستاپ كەلەسى 10 جىل ىشىندە بىرتە-بىرتە كوتەرىلەتىن بولدى. 10 جىلدان سوڭ ايەلدەر مەن ەرلەردىڭ زەينەتكە شىعۋ جاسى تەڭەسىپ، 63 جاستى قۇرايتىن بولادى. ال، قازان ايىندا «Nur Otan» پارتياسىنىڭ ماڭىزدى ساياسي وقيعا دەپ باعالاۋعا بولاتىن جاڭا ساياسي دوكتريناسى قابىلداندى. دوكترينا پارتيانىڭ ءححى عاسىرداعى ميسسياسى مەن «قازاقستان 2050» ستراتەگياسىن جۇزەگە اسىرۋداعى ءرولىن انىقتاۋعا باعىتتالعان.
مەملەكەتتىك قىزمەت سالاسىندا «ا» كورپۋسى قۇرىلدى. «ا» كورپۋسى باسقارۋشى لاۋازىمداعى مەملەكەتتىك قىزمەتكەرلەردى دايارلاۋعا، جەتىلدىرۋگە باعىتتالدى.
بۇل جىلى قازاق ەلىنىڭ كەشەندى حالىقارالىق رەزەرۆتەرى ۇلتتىق قوردىڭ ۆاليۋتالىق اكتيۆتەرىن قوسا العاندا 90 ميلليارد دوللارعا جەتتى. بۇل جىلدا ءبىرقاتار جوعارى تەحنولوگيالىق ءوندىرىس نىساندارى ىسكە قوسىلدى. ولاردىڭ قاتارىندا پاۆلودار قالاسىندا اشىلعان پوليمەر ونىمدەرىن شىعاراتىن «نەفتەحيم LTD» ج ش س، ورال قالاسىنداعى تەرموبەرىك اينەك شىعاراتىن «اينەك-سەرۆيس» ج ش س، تاراز قالاسىنداعى كۇكىرت قىشقىلىن شىعاراتىن «كازفوسفات» ج ش س جانە ت.ب اتاۋعا بولادى. قازاقستان مەن تۇركىمەنستان اراسىنداعى «بولاشاق-سەرحەتياكا» تەمىرجول وتكەلى، «قاشاعان» شيكىزاتىن قايتا وڭدەۋدى كوزدەيتىن اتىراۋ وبلىسىنداعى مۇناي مەن گازدى كەشەندى دايارلاۋ جونىندەگى «بولاشاق» زاۋىتى سياقتى شەتەلدىكتەرمەن بىرلەسكەن ءبىرقاتار جوبالار دا ، سونداي-اق ۇدەمەلى يندۋستريالدىق-يننوۆاسيالىق دامۋ اياسىندا 10 جاڭا كاسىپورىن ىسكە قوسىلدى.