ۇلى دالا ەلى – ۇلتتىق تاريحىمىزدىڭ مىڭجىلدىقتارى مەن تاۋەلسىزدىكتىڭ ۇلى جەتىستىكتەرىن ۇشتاستىرىپ جاتىر... ءبىز كوپتەگەن سىناقتاردان ابىرويمەن وتتىك، شىڭدالدىق، رۋحىمىز بەكىدى. ءبىز ۇلى دالا ەلى – جاڭا قازاقستاندى – ۇلى دالانىڭ جاڭارعان ەلىن قۇردىق.
نۇرسۇلتان نازاربايەۆ.
2015 جىلدىڭ باستى وقيعالارى
- ۇلى وتان سوعىسىنداعى جەڭىستىڭ 70 جىلدىعى.
- قازاقستان حالقى اسسامبلەياسىنىڭ 20 جىلدىعى.
- قازاق حاندىعىنىڭ 550 جىلدىعى.
- الەمدىك جانە ءداستۇرلى دىندەر كوشباسشىلارىنىڭ بەسىنشى سەزى.
- قازاقستاننىڭ دۇنيەجۇزىلىك ساۋدا ۇيىمىنا ءوتۋى.
- ق ر كونستيتۋسياسىنىڭ 20 جىلدىعى.
- ق ر پرەزيدەنتىنىڭ قازاقستان حالقىنا جولداۋى.
ەلباسى نۇرسۇلتان نازاربايەۆ: «باعدارىمىز – بەلگىلى، تاڭداۋىمىز – ايقىن، ماقساتىمىز – بيىك»
2014 جىلدى قورىتىندىلاعان القالى باسقوسۋدا تۇڭعىش پرەزيدەنت 2015 جىلعى باسىمدىقتار مەن مىندەتتەردى سارالاي كەلە الداعى باستى وقيعالار مەن مەرەكەلى داتالارعا توقتالعان ەدى.
راسىندا دا 2015 جىل ەلىمىز ءۇشىن ماڭىزدى ايتۋلى داتالارمەن ەستە قالدى. قازاق حاندىعىنىڭ 550 جىلدىعى، قازاقستان رەسپۋبليكاسى كونستيتۋسياسى مەن قازاقستان حالقى اسسامبلەياسىنىڭ 20 جىلدىعى، ۇلى وتان سوعىسى جىلدارىنداعى جەڭىستىڭ 70 جىلدىعى تويلاندى.
قازاقستان حالقى اسسامبلەياسىنىڭ جىلى دەپ بەلگىلەنىپ، مەرەكەلەنگەن بۇل كەزەڭ كوپ ەتنوستى ەلىمىزدە ۇلتتىق رۋحاني قۇندىلىقتار مەن سالت-داستۇرلەردىڭ جاندانعان، جاڭارعان كورىنىستەرىمەن دە بىرلىك پەن تاتۋلىقتىڭ رۋحىن اسقاقتاتتى.
قازاقستاننىڭ دۇنيەجۇزىلىك ساۋدا ۇيىمىنا ءوتۋى مەن ەۋرازيالىق ەكونوميكالىق وداقتىڭ جۇمىس ىستەي باستاۋى دا وسى جىلدىڭ ەنشىسىندە. قازاقستاندىقتاردى ءداستۇرلى جاڭا جىل مەرەكەسىمەن قۇتتىقتاۋىندا ەلباسى: «باعدارىمىز – بەلگىلى، تاڭداۋىمىز – ايقىن، ماقساتىمىز – بيىك. بارشاعا شۇعىلا شاشاتىن «نۇرلى جول» بۇكىل ەلىمىزدىڭ كۇرەتامىرىنا اينالدى»، – دەدى.
ال، جىلدىڭ باستى ساياسي وقيعاسى رەتىندە ءساۋىر ايىندا وتكەن پرەزيدەنت سايلاۋىن ايتۋعا بولار. وعان ەلەكتوراتتىڭ 95،22 پايىزى قاتىسىپ،ونىڭ ىشىندە سايلاۋشىلاردىڭ 97،75 پايىزى نۇرسۇلتان نازاربايەۆقا داۋىس بەردى. بۇل ەلباسى بەدەلىنىڭ ايقىندىلىعى مەن ونىڭ 5 ينستيتۋتتىق رەفورماعا نەگىزدەلگەن سايلاۋالدى ستراتەگيالىق باعدارلاماسىنىڭ حالىقتىق سيپاتپەن تىعىز ۇشتاسقاندىعىن بىلدىرسە كەرەك. سايلاۋعا الەمنىڭ 37 ەلىنەن، حالىقارالىق ۇيىمداردان كەلگەن بايقاۋشىلار سايلاۋدىڭ ۇيىمداستىرىلۋىنىڭ جوعارى دەڭگەيىن، ادىلدىگىن ەرەكشە اتاپ ءوتتى.
مەملەكەت باسشىسى 2015 جىلى وتكەن قحا-نىڭ XXII سەسسياسىندا اسسامبلەيانىڭ تۋعان كۇنى – 1 ناۋرىزدى جاڭا مەرەكە – العىس ايتۋ كۇنى دەپ بەلگىلەۋدى ۇسىندى. بۇل كۇن مەيىرىمدىلىكتىڭ، بۇكىل قازاقستاندىقتاردىڭ بىر-بىرىنە دەگەن دوستىعى مەن ماحابباتىنىڭ جارقىن مەرەكەسىنە ۇلاسپاق. العىس ايتۋ كۇنى العاش رەت 2016 جىلى اتالىپ ءوتتى. وسى جىلى سونىمەن قاتار قازاقستاندا اتاقتى عىلىم جانە مادەنيەت قايراتكەرلەرىنىڭ مەرەيتويلارى: كورنەكتى شىعىستانۋشى، عالىم شوقان ءۋاليحانوۆتىڭ 180 جىلدىعى، ۇلى ابايدىڭ 170 جىلدىعى جانە اسا كورنەكتى جازۋشى ءىلياس ەسەنبەرليننىڭ 100 جىلدىعى تويلاندى.
9 قاڭتار
مەملەكەت باسشىسى گەرمانيانىڭ فەدەرالدىق كانسلەرى انگەلا مەركەلمەن كەزدەسىپ، ەكىجاقتى كەلىسسوز اياسىندا ەكونوميكالىق ىنتىماقتاستىق ماسەلەلەرى تالقىلاندى.
25 اقپان
«قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن تاعايىنداۋ تۋرالى» پرەزيدەنت جارلىعى شىقتى. «قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى 2015 جىلدىڭ 26 ساۋىرىنە تاعايىندالسىن» دەلىنگەن وندا.
12 ناۋرىز
«نۇر وتان» پارتياسىنىڭ XVI سەزىندە مەملەكەت باسشىسى ءسوز سويلەپ، ءوزىنىڭ بەس ينستيتۋتتىق رەفورماسىن جاريالادى. وسى سەزدە نۇرسۇلتان نازاربايەۆ قازاقستان رەسپۋبليكاسى پرەزيدەنتىنىڭ سايلاۋىنا كانديدات رەتىندە ۇسىنىلدى.
20 ناۋرىز
نۇر-سۇلتاندا قازاقستان، رەسەي، بەلارۋس مەملەكەتتەرى باسشىلارى – نۇرسۇلتان نازاربايەۆ، ۆلاديمير پۋتين، الەكساندر لۋكاشەنكو باس قوسىپ، ءۇشجاقتى كەزدەسۋ ءوتتى.
16 ءساۋىر
قازاقستانعا مەملەكەتتىك ساپارمەن تۇركيا پرەزيدەنتى كەلدى. نۇرسۇلتان نازاربايەۆ پەن رەدجەپ تايىپ ەردوعاننىڭ ەكىجاقتى كەلىسسوزدەرىنەن كەيىن قازاقستان مەن تۇركيا اراسىنداعى جوعارى دەڭگەيلى ستراتەگيالىق ىنتىماقتاستىق كەڭەسىنىڭ قورىتىندىسى بويىنشا بىرلەسكەن مالىمدەمە جانە «جاڭا سينەرگيا» بىرلەسكەن ەكونوميكالىق باعدارلاماسىنىڭ ءىس-شارالار جوسپارىنىڭ ماڭىزىن ارتتىرۋ جونىندە حاتتاما قابىلداندى .
10 ءساۋىر
مەملەكەت باسشىسى «ەلباسىمەن بىرگە – جاڭا جەڭىستەرگە!» اتتى جاستار فورۋمىنا قاتىستى.فورۋمعا قازاقستاننىڭ بۇكىل وڭىرىنەن 2000-نان استام ادام قاتىستى، ولاردىڭ قاتارىندا «جاس وتان» جاستار قاناتىنىڭ بەلسەندىلەرى، ءماسليحاتتاردىڭ جاس دەپۋتاتتارى، كاسىپكەرلەر، عالىمدار، تانىمال سپورتشىلار جانە جاستاردىڭ ىرگەلى ۇيىمدارىنىڭ كوشباسشىلارى بار. ءىس-شارا قورىتىندىسى نەگىزىندە «ەلباسىمەن بىرگە – جاڭا جەڭىستەرگە!» جاستار فورۋمىنا قاتىسۋشىلار قازاقستان جاستارىنا ارنالعان ۇندەۋ قابىلدادى.
26 ءساۋىر
قازاقستان رەسپۋبليكاسى پرەزيدەنتىنىڭ سايلاۋى ءوتىپ، ونىڭ ناتيجەسى بويىنشا exit-poll قورىتىندىسى جاريالاندى: سايلاۋشىلاردىڭ 97،5 پايىزى – ن.نازاربايەۆقا ، 1،87 پايىزى – ت.سىزدىقوۆقا، 0،63 پايىزى – ا.قۇسايىنوۆقا داۋىس بەردى. ءۇش كۇننەن كەيىن، 29 ساۋىردە نۇرسۇلتان نازاربايەۆتىڭ قازاقستان پرەزيدەنتى قىزمەتىنە رەسمي كىرىسۋىنە وراي سالتاناتتى ۇلىقتاۋ ءراسىمى بولدى.
7 مامىر
مەملەكەت باسشىسى – قارۋلى كۇشتەردىڭ جوعارعى باس قولباسشىسى نۇرسۇلتان نازاربايەۆتىڭ قاتىسۋىمەن ەلورداداعى «قازاق ەلى» الاڭىندا وتان قورعاۋشى كۇنىنە جانە ۇلى وتان سوعىسىنداعى جەڭىستىڭ 70 جىلدىعىنا ارنالعان اسكەرۋ شەرۋ ءوتتى. بۇل كۇنى «جەرۇيىق» ساياباعىندا باتىر پانفيلوۆشىلارعا ارنالعان مونۋمەنت سالتاناتتى تۇردە اشىلدى.
8-9 مامىر
ەلباسى ماسكەۋدە وتكەن تمد-عا مۇشە ەلدەر مەملەكەت باسشىلارى كەڭەسىنىڭ بەيرەسمي سامميتىنە، سونداي-اق، جوعارى ەۋرازيالىق ەكونوميكالىق كەڭەستىڭ مەملەكەت باسشىلارى دەڭگەيىندەگى وتىرىسىنا قاتىستى. بۇل باسقوسۋلار اياسىندا ن.نازاربايەۆ پەن ۆ.ءپۋتيننىڭ كەزدەسۋى بولدى. وسى ساپارى اياسىندا نۇرسۇلتان نازاربايەۆ رەسەي استاناسىندا وتكەن ۇلى جەڭىستىڭ 70 جىلدىعىنا ارنالعان اسكەري شەرۋگە قاتىستى.
10 ماۋسىم
ەلورداداعى بەيبىتشىلىك جانە كەلىسىم سارايىندا الەمدىك جانە ءداستۇرلى دىندەر ليدەرلەرىنىڭ V سەزى اشىلدى.
22-23 ماۋسىم
قازاقستان رەسمي تۇردە دۇنيەجۇزىلىك ساۋدا ۇيىمىنىڭ قۇرامىنا ەندى. قازاق ەلىنىڭ دسۇ-نا كىرۋىنە بايلانىستى كەلىسسوزدەر مارەسىنە جەتتى. وسىعان وراي ەلىمىزدىڭ دۇنيەجۇزىلىك ساۋدا ۇيىمىنا كىرۋىنىڭ ماقسات-مۇددەسىن ايقىنداپ، ماڭىزىن تۇجىرىمداعان ەلباسىنىڭ قازاقستان حالقىنا ۇندەۋى جاريالاندى. «دۇنيەجۇزىلىك ساۋدا ۇيىمىنا مۇشە بولۋ ءبىزدىڭ ەكونوميكامىزدى جاڭا كوكجيەكتەرگە باستايدى. كاسىپورىندارىمىزدىڭ شەتەل نارىقتارىنا شىعۋىن قامتاماسىز ەتەدى. ال تۇتىنۋشىلار ءۇشىن تاۋارلار مەن قىزمەتتەردىڭ كەڭ اۋقىمىنا تاڭداۋ جاساۋعا جول اشادى. بۇگىندە ساۋدا-ساتتىعىمىزدىڭ 90 پروسەنتى دۇنيەجۇزىلىك ساۋدا ۇيىمىنا مۇشە ەلدەرگە تيەسىلى. قازاقستان شەتەلدىك ينۆەستورلار مەن سەرىكتەستەر ءۇشىن بۇرىنعىدان دا تارتىمدى بولا تۇسەدى. جاڭا وندىرىستەر مەن جۇمىس ورىندارىن اشۋعا مۇمكىندىكتەر تۋادى»، - دەدى پرەزيدەنت.
27 شىلدە
شۆەيساريانىڭ جەنيەۆا قالاسىندا قازاقستاندى دۇنيەجۇزىلىك ساۋدا ۇيىمىنا رەسمي قابىلداۋ شاراسى ءوتتى. وعان ەلباسى نۇرسۇلتان نازاربايەۆ قاتىستى.
2 قىركۇيەك
تاعى ءبىر قازاق ازاماتى عارىشقا ۇشقان كۇن! بايقوڭىر عارىش ايلاعىنان قازاقستاندىق عارىشكەر ايدىن ايىمبەتوۆ «سويۋز تما-18م» كەمەسىمەن عارىشقا بەت الدى.
3 قىركۇيەك
جۇڭگو استاناسى پەكيننىڭ تيانانمەن الاڭىندا ەكىنشى دۇنيەجۇزىلىك سوعىستىڭ اياقتالعانىنا 70 جىل تولۋ مەرەيتويىنا وراي جانە جۇڭگو حالقىنىڭ جاپونيامەن سوعىستاعى جەڭىسىنىڭ 70 جىلدىعىنا ارنالعان ماسشتابتى اسكەري شەرۋ ءوتتى. شەرۋگە 12 مىڭعا جۋىق اسكەري ادامدار، 500 تەحنيكا، 200 ۇشاق جانە الەمنىڭ 17 ەلىنەن مىڭعا جۋىق شەتەلدىك اسكەري قىزمەتكەرلەر قاتىستى. سالتاناتتى شاراعا قازاقستان، رەسەي، بەلارۋس، چەحيا، وزبەكستان، تاجىكستان، وڭتۇستىك كورەيا، ۆەتنام، تايلاند جانە تاعى باسقا ەلدەردىڭ پرەزيدەنتتەرى قاتىستى.
11 قىركۇيەك
مەملەكەت باسشىسىنىڭ قاتىسۋىمەن ەلوردادا قازاق حاندىعىنىڭ 550 جىلدىعىنا ارنالعان سالتاناتتى جينالىس ءوتتى.
28 قىركۇيەك
قازاقستان رەسپۋبليكاسىنىڭ پرەزيدەنتى بىرىككەن ۇلتتار ۇيىمى باس اسسامبلەياسىنىڭ سەسسياسىنا قاتىسىپ، الەمدىك ساياساتقا بايلانىستى جالپى پىكىرتالاستا ءسوز سويلەدى.
8 قازان
مەملەكەت باسشىسى جۇمىس ساپارىمەن جامبىل وبلىسىنا بارىپ، قازاق حاندىعىنىڭ 550 جىلدىعىنا وراي تارازدا وتكەن شارالارعا قاتىسىپ،ءسوز سويلەدى.
3 قاراشا
ۇلىبريتانيا پرەمەر-مينيسترى ديەۆيد كەمەروننىڭ شاقىرۋى بويىنشا نۇرسۇلتان نازاربايەۆ وسى ەلگە رەسمي ساپارمەن باردى. ساپار ناتيجەسىندە 13 ميلليارد دوللاردىڭ كەلىسىمدەرىنە قول قويىلدى.
5 قاراشا
نۇرسۇلتان نازاربايەۆ فرانسيا پرەزيدەنتى فرانسۋا وللاندتىڭ شاقىرۋىمەن فرانسياعا رەسمي ساپارمەن بارىپ، كەلىسسوزدەر قورىتىندىسىندا بىرلەسكەن دەكلاراسيا قابىلداندى.
15 جەلتوقسان
«استانا وپەرا» مەملەكەتتىك وپەرا جانە بالەت تەاترىندا قازاقستان رەسپۋبليكاسىنىڭ تاۋەلسىزدىگىنە ارنالعان سالتاناتتى جيىن ءوتتى. القالى جيىندا ەلباسى ءسوز سويلەپ، تاۋەلسىزدىك جىلدارى رەسپۋبليكامىز تاريحي دامۋ تۇرعىسىنان عاجايىپ سەكىرىس جاساعانىنا توقتالدى: «بابالارىمىز ۇمتىلعان اڭسارلى ماقسات – تاۋەلسىزدىككە ءبىزدىڭ ۇرپاق قول جەتكىزدى. سوندىقتان دا بۇل كۇن تۇتاس ۇرپاقتاردىڭ ورىندالعان ارمانىن بىلدىرەتىن قۋانىشتى ءارى ماڭىزدى مەرەكە بولىپ سانالادى... ءبىزدىڭ قازاقستان – ۇلى دالا ەلى، جاڭعىرعان ۇلى دالا ەلى. بۇل ءبىزدىڭ اسقاق اڭسارىمىز ءارى ەرەكشە ماقتانىشىمىز. قازاقستاندىقتاردىڭ بولاشاق ۇرپاعى ءبىزدىڭ جەتىستىكتەرىمىزدى لايىقتى باعالاپ، ماقتان تۇتارىنا ەش كۇمان جوق. ولار ءبىزدىڭ تاجىريبەمىزدەن دانالىقتىڭ، سىندارلى ىس-ارەكەتتىڭ جانە كەز كەلگەن قيىندىقتىڭ الدىندا يىلمەس بەرىكتىكتىڭ ۇلگىسىن كورەتىن بولادى، – دەدى پرەزيدەنت.
ستاتيستيكا:
2015 جىلى پرەزيدەنت 700-گە جۋىق پروتوكولدىق شارالارعا،100-دەن استام كەزدەسۋلەرگە، 11 مەملەكەتارالىق سامميتتەرگە،5 حالىقارالىق فورۋمدارعا قاتىسقان ەكەن.رەسپۋبليكا وڭىرلەرىنە 19 رەت، شەت ەلدەرگە 20 رەت رەسمي ساپارعا شىقتى. ءبىر جىل ىشىندە بارلىعى 168 زاڭ قابىلدانىپ، 216 جارلىققا قول قويىلدى.
جىل ءتۇيىنى:
جاڭا پرەزيدەنتتىك مەرزىمگە سايلانعان نۇرسۇلتان نازاربايەۆ سايلاۋ وتىسىمەن ءوزىنىڭ 100 ناقتى قادامنان تۇراتىن ۇلت جوسپارىن ۇسىندى. وسىعان وراي ۇلتتىق كوميسسيا قۇرىلدى.ەل پارلامەنتى جىل اياعىنا دەيىن بۇل رەفورمالارعا زاڭدىق سيپات بەرىپ، الپىسقا جۋىق زاڭدار مەن نورماتيۆتىك-قۇقىقتىق اكتىلەر قابىلدادى. مۇنىڭ ءوزى بۇكىل الەمدى تىعىرىققا تىرەگەن داعدارىستىق كەزەڭنەن ءوتۋدىڭ قازاقستاندىق جولدىڭ ءتيىمدى دە ءساتتى باعدار بولعانىن ءومىردىڭ ءوزى دالەلدەپ بەردى.ەلىمىزدىڭ دامۋ جولىنداعى وسى جەڭىستى جولداردىڭ بىرلىكپەن جانە كەلىسىممەن استاسىپ جاتقاندىعىن ەلباسى دا جىلدىڭ قورىتىندى جيىنىندا جاقسى ايتتى: «جىل باسىندا وتكەن پرەزيدەنت سايلاۋى ءبىزدىڭ تابىستى تۇردە بولاشاعى ءبىرتۇتاس ۇلتقا اينالىپ كەلە جاتقانىمىزدى كورسەتتى. بىرلىك پەن كەلىسىمدى ساقتاپ، نىعايتۋ وڭاي جۇمىس ەمەس. ول دانالىق پەن كورگەندىلىكتى، كورەگەندىك پەن ەلىمىزدىڭ بارشا ازاماتتارىنىڭ ءوزارا سىيلاستىعىن قاجەت ەتەدى. عىلىم جەر بەتىندەگى ءاربىر ەتنوس كەمىندە ءبىر ەرەكشە قاسيەتكە يە ەكەنىن ايتادى. ءبىزدىڭ ءومىرىمىز قازاقستانداعى 100 ەتنوستىڭ 100 ايرىقشا جانە قايتالانباس قاسيەتى بار ەكەنىن كورسەتىپ وتىر. سونىڭ ءبارى جينالىپ كەلىپ ءبىزدىڭ ءبىرتۇتاس ۇلتىمىزدىڭ بىرەگەي باسىمدىلىعىن قۇرايدى. قازاقستاننىڭ ءاربىر ەتنوسى – ءبىزدىڭ بايلىعىمىز. كوپەتنوستىلىق – ءبىزدىڭ ورتاق ۇلى قازىنامىز. قازاقستان حالقى اسسامبلەياسى، مىنە، 20 جىل بويى وسى بايلىقتىڭ باستى قورعاۋشىسى مىندەتىن تابىستى اتقارىپ كەلەدى. تاۋەلسىز قازاقستان – ءبىزدىڭ ۇلكەن وتباسىمىز جانە ورتاق شاڭىراعىمىز»، – دەدى نۇرسۇلتان نازاربايەۆ.
قازاقستان رەسپۋبليكاسىنىڭ تاۋەلسىزدىگىنە ارنالعان 2015 جىلى وتكەن سالتاناتتى جيىندا ەلباسى جىلدى قورىتىندىلاي كەلە: «قيىندىقتارعا قاراماستان، تاۋەلسىزدىكتىڭ 24ء-شى جىلى جادىمىزدا كوپتەگەن جان تولقىتارلىق، قازاقستان ءۇشىن ايرىقشا ءمانى بار وقيعالارىمەن ەستە قالادى. ءبىز ەكونوميكامىزدىڭ وڭ ءوسىمىن ساقتادىق. يندۋستريالىق دامۋدىڭ ەكىنشى بەسجىلدىعى جانە «نۇرلى جول» باعدارلاماسى باستالدى. 2015 جىلى 800 ميلليارد تەڭگەنىڭ 120 جوباسى ىسكە قوسىلدى، 10 تۇراقتى جۇمىس ورنى اشىلدى، مىڭداعان شارشى مەتر باسپانا پايدالانۋعا بەرىلىپ، ولارعا جاستار مەن از قامتىلعان وتباسىلار قونىستاندى...قازاقستان دۇنيەجۇزىلىك ساۋدا ۇيىمىنا كىردى. ەۋرازيالىق ەكونوميكالىق وداق جۇمىسىن باستادى. بيىل قازاقستان الەمدىك جەتەكشى ەكسپورتتاۋشىلاردىڭ ەلۋلىگى قاتارىنا قوسىلىپ، 43-ورىندى يەلەندى. بىزدە شيراق، ساۋاتتى، جاڭاشىل جاستار بۋىنى ءوسىپ كەلەدى. الەمنىڭ جەتەكشى جوعارى وقۋ ورىندارىنىڭ قاتارىنا قوسىلعان نازاربايەۆ ۋنيۆەرسيتەتىندە دايارلانعان العاشقى 500 مامان بيىل ءبىتىرىپ شىقتى. قازاقستان ماگاتە-مەن بىرلەسىپ، يادرولىق وتىن بانكىن قۇردى، ول ءبىزدىڭ ەلگە ورنالاستىرىلادى. ءۇشىنشى عارىشكەرىمىز ايدىن ايىمبەتوۆ جەر توڭىرەگىندەگى وربيتاعا ساپار شەكتى. ءبىز ۇلت جوسپارىن ورىنداۋعا كىرىستىك. ونى تاۋەلسىزدىكتىڭ 25 جىلدىعى قارساڭىندا جۇزەگە اسىرا باستاعانىمىزدىڭ دا سيمۆولدىق ءمانى بار»، – دەدى نۇرسۇلتان نازاربايەۆ.
***
ەلباسى نۇرسۇلتان نازاربايەۆتىڭ قازاقستان حالقىن جاڭا جىلمەن قۇتتىقتاۋىنان:
«تاريح قويناۋىنا اتتانعالى تۇرعان جىل ەلىمىز ءۇشىن جەمىستى بولدى. قازاقستان داعدارىسقا قاراماستان، ءوزىنىڭ قۇتتى قادامىن جالعاستىردى.بيىل ءبىز تاريحى تەرەڭدە جاتقان تامىرلى حالىق ەكەنىمىزدى بارشاعا ايگىلەدىك. ۇلى دالادا ۇلت اتاۋىمەن مەملەكەت قۇرعان بابالار رۋحىنا تاعزىم ەتتىك. جاڭا قازاقستاننىڭ قالىپتاسۋىنا نەگىز قالاعان اتا زاڭىمىزدى ۇلىقتادىق. باق-بەرەكەمىزدىڭ ۇيىتقىسى – قازاقستان حالقى اسسامبلەياسىنىڭ بەدەلىن بيىكتەتتىك. ارداگەرلەرىمىزدى ارداقتاپ، ۇلى جەڭىستىڭ ءمان-ماڭىزىن ۇرپاقتىڭ ساناسىنا سىڭىردىك. قازاقتىڭ ءۇشىنشى عارىشكەرى كوك جۇزىنە سامعاپ، مەرەيىمىزدى ءوسىردى. ساۋدامىز ساپالى، تاۋارىمىز تارتىمدى بولۋى ءۇشىن دۇنيەجۇزىلىك ساۋدا ۇيىمىنا مۇشە بولدىق. بيىلعى پرەزيدەنت سايلاۋىندا بىرلىگى بار ەل ەكەنىمىزدى تاعى دا دالەلدەدىك».