31 ناۋرىز كۇنى ماقان ەسبولاتوۆ اتىنداعى ق ر ءىىم الماتى اكادەمياسىندا ەلگە بەلگىلى سپورت ساڭلاقتارىنىڭ قاتىسۋىمەن «دوڭگەلەك ۇستەل» ءوتتى. جيىندا ۇلتتىق قۇرىلتايدىڭ IV وتىرىسىنداعى ايتىلعان نەگىزگى ماسەلەلەر باستى تاقىرىپ رەتىندە تالقىلاندى.
مەملەكەت باسشىسىنىڭ قاتىسۋىمەن وتكەن ۇلتتىق قۇرىلتايدىڭ ءتورتىنشى وتىرىسىندا قازاقستاندى دامىتۋدىڭ نەگىزگى باعىتتارى تالقىلانىپ، جاڭا باستامالار ورتاعا سالىنعانى ءمالىم. كەشەگى «دوڭگەلەك ءۇستەل» بارىسىندا قاتىسۋشىلار ۇلتتىق قۇرىلتايدا ايتىلعان ءبىلىم بەرۋ مەن تاربيەگە قاتىستى مازمۇنداردى اشالاي تالدادى.
تالقى جيىنىنا قازاقستان حالقى اسسامبلەياسىنىڭ اقساقالدار كەڭەسىنىڭ وكىلدەرى، قازاقستان رەسپۋبليكاسىنىڭ ەڭبەك سىڭىرگەن سپورت شەبەرى قانات يسلام، وليمپيادىنىڭ قولا جۇلدەگەرى، ءۇش دۇركىن الەم چەمپيونى نازىم قىزايباي، الەم چەمپيونى الۋا بالقىبەكوۆا ارنايى شاقىرىلدى. داڭقتى سپورتشىلار اكادەميا كۋرسانتتارىمەن كەزدەسىپ، ءوز ويلارىمەن ءبولىستى، ءارى سۇراقتارىنا جاۋاپ بەردى.
– ۇلتتىق قۇرىلتايدىڭ كەزەكتى وتىرىسىندا مەملەكەت باسشىسى وسكەلەڭ ۇرپاققا ءبىلىم بەرۋ جانە ءتاربيە ماسەلەسىنە دە ەرەكشە توقتالدى. ءبىلىم بەرۋ مەن تاربيە بىر-بىرىنەن اجىرماس ۇعىمدار ەكەنىن ەسكەرسەك، ءبىلىم ساپاسىن ارتتىرۋمەن قاتار تاربيە ماسەلەسىنە دە باسا نازار اۋدارىمىز كەرەك. جاس ۇرپاقتىڭ بويىنا ۇلتتىق قۇندىلىقتاردى ءسىڭىرىپ، ولاردى جاۋاپكەرشىلىك پەن ەڭبەكسۇيگىشتىككە باۋلۋ وتە ماڭىزدى. بۇل ماقساتتا «ادال ازامات» جانە «ءبىر تۇتاس تاربيە» باعدارلاماسى جۇزەگە اسىرىلىپ جاتقانىن جاقسى بىلەسىزدەر. وسى باعدارلامالار اياسىندا وتباسىلىق تاربيەمەن قاتار جاستاردىڭ قوعامدىق بەلسەندىلىگىن ارتتىرۋ قولعا الىنىپ جاتىر، – دەدى ق ر ءىىم الماتى اكادەمياسى باستىعىنىڭ ورىنباسارى مۇرات جاقىپبەكوۆ.
ال قازاقستان حالقى اسسامبلەياسىنىڭ اقساقالدار كەڭەسىنىڭ مۇشەسى ابدۋحاليل دولكۋنتاي ەل بىرلىگى ەڭ ماڭىزدى ماسەلە ەكەنىن اتاپ ءوتتى.
– پرەزيدەنت بولاشاق جاستاردىڭ قولىندا ەكەنىن ايتتى. سوندىقتان جاستارىمىزدى دۇرىس تاربيەلەپ، ەلىمىزدىڭ وركەنيەتتى، قۋاتتى مەملەكەت بولۋىنا ءارقايسىسىمىزدىڭ اتسالىسۋىمىز ماڭىزدى. قازاقستاندا 100-دەن استام ۇلت وكىلدەرى ءومىر ءسۇرىپ جاتىر. ءبىز تاتۋ- ءتاتتى بولساق، دامىعان مەملەكەتتەردىڭ قاتارىنا ەمىن- ەركىن قوسىلامىز. «جۇمىلا كوتەرگەن جۇك جەڭىل»، – دەدى ول.
قازاقستان رەسپۋبليكاسىنىڭ ەڭبەك سىڭىرگەن سپورت شەبەرى قانات يسلام كۋرسانتتارعا ءومىر مەن جۇمىستاعى ءتارتىپتىڭ ماڭىزىنا باسا توقتالدى. سونداي-اق، اكادەميا كۋرستتارىنىڭ بولاشاق قىزمەتى ابىرويلى ءارى جاۋاپكەرشىلىگى جوعارى ەكەنىن اتاپ ءوتتى. ال الەم چەمپيونى الۋا بالقىبەكوۆا ءار ادام ءوز ماماندىعىنىڭ شەبەرى بولسا، ۇلكەن جەتىستىككە جەتەتىنىن ءتۇسىندىردى. وليمپيادىنىڭ قولا جۇلدەگەرى، ءۇش دۇركىن الەم چەمپيونى نازىم قىزايباي سپورتتىڭ ادام ومىرىندەگى ماڭىزدىلىعىنا توقتالدى.
– ءبارىڭىزدى سپورتپەن اينالىسۋعا شاقىرامىن. ەلىمىزدىڭ ءوسىپ، دامۋىنا ءوز ۇلەسىمىزدى قوسايىق. ەلىم دەيتىن، جەرىم دەيتىن كوزدەرىندە وت، سوزدەرىندە جالىنى بار ازاماتتارىمىز كوپ بولسىن، – دەدى نازىم قىزايباي.