2025 جىلعى 31 ناۋرىزدا ق ر پرەزيدەنتى جانىنداعى ورتالىق كوممۋنيكاسيالار قىزمەتى بازاسىندا ق ر عىلىم جانە جوعارى ءبىلىم ءمينيسترىنىڭ كەڭەسشىسى رۋسلان ەمەلبايەۆ پەن ق ر عجبم جوعارى ءبىلىم بەرۋدى دامىتۋ ۇلتتىق ورتالىعىنىڭ «ماماندىعىم – بولاشاعىم» باعدارلاماسى كەڭسەسىنىڭ باسشىسى ولجاس ساكەنوۆتىڭ قاتىسۋىمەن باسپا ءسوز كونفەرەنسياسى ءوتتى. باسپا ءسوز كونفەرەنسياسىنىڭ تاقىرىبى «ماماندىعىم – بولاشاعىم» جوباسىنا، كاسىپتىك باعدار بەرۋدى دامىتۋعا جانە ەلدەگى بىلىكتى كادرلاردى دايارلاۋعا ارنالدى.
باسپا ءسوز كونفەرەنسياسى بارىسىندا «ماماندىعىم – بولاشاعىم» باعدارلاماسىنىڭ كەڭسە باسشىسى ولجاس ساكەنوۆ ءوز سوزىندە مەملەكەت باسشىسىنىڭ تاپسىرماسىنا سايكەس جانە «حالىق تابىسىن ارتتىرۋدىڭ 2029 جىلعا دەيىنگى باعدارلاماسى» كەشەندى جوسپارى اياسىندا 2022 جىلدان باستاپ قازاقستاندا وڭىرلىك ەڭبەك نارىعىنىڭ وزەكتى سۇرانىستارىن ەسكەرە وتىرىپ، كادرلار دايارلاۋ جۇيەسىن قايتا فورماتتاۋعا باعىتتالعان «ماماندىعىم – بولاشاعىم» جوباسى ءساتتى جۇزەگە اسىرىلىپ كەلە جاتقانىن اتاپ ءوتتى.
جوبانىڭ نەگىزگى ماقساتتارىنىڭ ءبىرى – ءبىلىم بەرۋ جانە ەڭبەك رەسۋرستارى سالاسىنداعى وڭىرلىك ايىرماشىلىقتاردى تەڭەستىرۋ، سونداي-اق ەڭبەك ونىمدىلىگى مەن حالىق تابىسىن ارتتىرۋ. قازاقستان ەكونوميكاسى ءۇشىن بىلىكتى كادرلاردى دايارلاۋعا باعىتتالعان «ماماندىعىم – بولاشاعىم» جوباسى اياسىندا مەكتەپ وقۋشىلارى مەن ستۋدەنتتەرگە زاماناۋي ەڭبەك نارىعىنىڭ تالاپتارىنا ساي كاسىپتىك باعدار بەرۋگە ارنالعان يننوۆاسيالىق شەشىمدەردى ەنگىزۋ جالعاسۋدا.
«ماماندىعىم – بولاشاعىم» جاستاردى ەكونوميكانىڭ بولاشاقتاعى سىن-قاتەرلەرىنە دايىنداۋعا، ولاردى سۇرانىسقا يە ماماندىقتارعا باعىتتاۋعا جانە وڭىرلىك ەرەكشەلىكتەردى ەسكەرە وتىرىپ، ولاردىڭ الەۋەتىن دامىتۋعا باعىتتالعان. جوبادا ەرەكشە نازار EduNavigator پلاتفورماسىنا اۋدارىلعان، ول – مەكتەپ وقۋشىلارى مەن كاسىبي كەڭەسشىلەرگە ارنالعان كاسىپتىك باعدارلاۋ قۇرالى. بۇل پلاتفورما وقۋشىلارعا وزدەرىنىڭ كاسىبي قالاۋلارى تۋرالى تۇسىنىك قالىپتاستىرۋعا، مانساپتىق جولدارىن بولجاۋعا جانە جەكە بەيىمدىلىكتەرى مەن قىزىعۋشىلىقتارىن ەسكەرە وتىرىپ، سايكەس ماماندىقتاردى تاڭداۋعا كومەكتەسەدى»، – دەدى ولجاس ساكەنوۆ.
جوبا جەتەكشىسىنىڭ ايتۋىنشا، قازىرگى تاڭدا 100 000-نان استام مەكتەپ وقۋشىسى EduNavigator پلاتفورماسىندا تەستىلەۋدەن ءوتتى.
جوبا الماتى، استانا، ماڭعىستاۋ، قاراعاندى جانە جاڭا كاسىپتەردىڭ سالالىق اتلاستارى ەنگىزىلگەن باسقا وڭىرلەردى قوسا العاندا، ەلدىڭ نەگىزگى وبلىستارىن قامتيدى، سونداي-اق ەڭبەك رەسۋرستارىنىڭ وڭىرلىك كارتالارى ازىرلەنۋدە، ولاردىڭ نەگىزىندە 91 قازاقستاندىق جوو-دا 902 ءبىلىم بەرۋ باعدارلاماسى قالىپتاستىرىلدى.
باسپا ءسوز كونفەرەنسياسىندا ق ر عىلىم جانە جوعارى ءبىلىم ءمينيسترىنىڭ كەڭەسشىسى رۋسلان ەمەلبايەۆ «Study in Kazakhstan» كورمەسى جانە ق ر عىلىم جانە جوعارى ءبىلىم مينيسترلىگى جۇرگىزىپ وتىرعان مەكتەپ وقۋشىلارىنا كاسىپتىك باعدار بەرۋ جۇمىستارى تۋرالى ايتتى.
مينيسترلىكتىڭ باستاماسىمەن جانە جەرگىلىكتى اتقارۋشى ورگانداردىڭ قولداۋىمەن ەل وڭىرلەرىندە «Study in Kazakhstan» اۋقىمدى كورمەسى وتكىزىلەدى. بۇل كورمە مەكتەپ وقۋشىلارىنا كاسىپتىك باعدار بەرۋگە باعىتتالعان، ولارعا وتاندىق وقۋ ورىندارىندا قولجەتىمدى كەڭ اۋقىمدى ءبىلىم بەرۋ باعدارلامالارى مەن مانساپتىق مۇمكىندىكتەرمەن تانىسۋعا، سونداي-اق بولاشاق ماماندىعىن تاڭداۋعا كومەكتەسەتىن جەتەكشى ماماندار مەن ۋنيۆەرسيتەت وكىلدەرىنەن كەڭەس الۋعا مۇمكىندىك بەرەدى.
«Study in Kazakhstan» كورمەسى بيىل 29 قاڭتاردا قاراعاندى قالاسىندا باستالىپ، 12 اقپانعا دەيىن استانا، الماتى، تاراز، شىمكەنت، تۇركىستان، قىزىلوردا قالالارىندا جالعاستى. كورمەگە 32 مىڭنان استام مەكتەپ وقۋشىسى، اتا-انالار جانە كاسىپتىك باعدار بەرۋ ماماندارى قاتىستى. ءىس-شارا بارىسىندا اريزونا ۋنيۆەرسيتەتى، جاساندى ينتەللەكت مەكتەبى (Seoul Tech)، كوۆەنتري ۋنيۆەرسيتەتى سياقتى 20-دان استام شەتەلدىك جوعارى وقۋ ورنىنىڭ فيليالدارى، سونداي-اق قازاقستاننىڭ جەتەكشى ۋنيۆەرسيتەتتەرى تانىستىرىلدى.
سونداي-اق رۋسلان ەمەلبايەۆ:
«قازىرگى ۋاقىتتا ەل بويىنشا ناۋرىزداعى ۇبت ءوتىپ جاتىر، الدا نەگىزگى ۇبت بار، جانە تالاپكەرلەرگە ءوز بولاشاق ماماندىعىن تاڭداۋ قاجەت. «Study in Kazakhstan» جارمەڭكەسى – كاسىپتىك باعدار ءۇشىن تاپتىرماس الاڭ. سونىمەن قاتار كورمەدە بالالار مەملەكەت باسشىسىنىڭ تاپسىرماسىمەن اشىلعان شەتەلدىك وقۋ ورىندارىنىڭ فيليال وكىلدەرىنە تىكەلەي سۇراق قويا الادى. بۇل – جاستارىمىز ءۇشىن ەلدەن شىقپاي-اق شەتەلدىك ديپلوم الۋعا تاماشا مۇمكىندىك»، – دەدى.
وسى جىلدىڭ 3 ساۋىرىنەن باستاپ كورمە ءوز جۇمىسىن ەلدىڭ باتىس وڭىرلەرىندە جالعاستىرادى، ونىڭ ىشىندە اقتوبە، اتىراۋ، اقتاۋ جانە جاڭاوزەن قالالارىندا جاڭا كورمەلەر مەن ءىس-شارالار وتەدى. بۇل ءىس-شارالار ماقساتتى ءبىلىم بەرۋ گرانتتارى جانە جاستارعا كاسىپتىك باعدار بەرۋ تۋرالى اقپارات ۇسىنۋعا باعىتتالعان. ولار حالقى تىعىز ورنالاسقان جانە باتىس وڭىرلەردەگى جاستارعا ەلدىڭ جەتەكشى وقۋ ورىندارىندا ساپالى ءبىلىم الۋعا مۇمكىندىك بەرەدى.