كەزدەسسەم ۇرلانا كارايمىن
اساۋداي تۋلايدى جاس جۇرەك
مەن سەنى جانىما بالايمىن
سەن ءۇشىن مەندە بار ءبىر تىلەك
مەن سەنى جانىما بالايمىن
سەن ءۇشىن مەندە بار ءبىر تىلەك، - دەپ باستالاتىن بۇل ءان كوپشىلىكتىڭ كوڭىلىنەن ويىپ تۇرىپ ورىن العان اندەردىڭ اۆتورى.
ءان اۆتورى قوراباي ەسەنوۆ بۇگىن مەرەيلى 75 جاسقا تولىپ وتىر. كەزىندە وسى انىمەن ءبىر-اق كۇندە قازاقتىڭ ءۇنجارياسى - قازاق راديوسى ارقىلى قالىڭ جۇرتقا اتى ءالىم بولعان ونەر يەسىنىڭ تۋعان كۇنى تۋعان ەلىندە اتالىپ ءوتىپ جاتىر، دەپ حابارلايدى Almaty-akshamy.kz.
وسىدان بىرەر جىل بۇرىن عانا قورابايدىڭ كونسەرتى قاراعاندىدا تۇڭعىش رەت ءوتىپتى.
ليريكا كورولى، رەترو رىسارى، ءان سەرىسى قورەكەڭ! ءيا، اتاقتى قوراباي ەسەنوۆتى ايتامىز، قالىڭ قازاقتى جەتى شەكتى گيتاراسىنىڭ جازيرا اۋەنىمەن قۇشاقتاعان قايتالانباس تالانت، قاراپايىم ونەر وكىلى، پاتشاداي پاڭ، قۇلداي قاراپايىم قازاق اۋەنى. «قوراباي قازاق ونەرىندەگى زور قۇبىلىس. ۇلت ساحناسىندا گيتاراسىمەن قوسا سان تارماقتى جاڭا اۋەز،جاڭا سارىن اشقان دەگدار بۋىن. زامانعا ساي تۋعان ەرەكشە دارا تۇلعا» دەپتى بەلگىلى اقىن، مەملەكەت جانە قوعام قايراتكەرى كاكىمبەك سالىقوۆ اعامىز.
وكىنىشكە قاراي، قوراباي اعامىز جايلى قوعامدا كوپ ايتىلا بەرمەيدى. بۇل رەتتە دارا داۋىس يەسىنە قازاقستاننىڭ حالىق ءارتىسى قايرات بايبوسىنوۆ «ءبىز قورەكەڭنىڭ ءانى ارقىلى ونەرگە، ومىرگە عاشىق بولدىق» دەگەن باعا بەرىپ، ءبىر-بىرىن وسىلاي قوشەمەتتەگەن ەكەن. بۇل رەتتە تەلەارنالاردىڭ ءتورى، كونسەرت زالدارىنىڭ ءساندى ساحناسى قوراباي اندەرىنە جول اشۋ جاعىن كوبىرەك قولعا العان ءجون سياقتى.
قورەكەڭنىڭ «جاس قالام» دەپ جارق ەتە قالعانىنا دا جارتى عاسىردان استام ۋاقىت وتە شىعىپتى. قوراباي جايلى كوركەم فيلم تۇسىرسە دە ارتىق ەمەس. جاپ-جاس جىگىتتىڭ «قازاق» راديوسىنان شىرقاعان جالعىز ءانى ءبىر-اق كۇندە اۆتوردى تانىمال ەتكەن.