پرەزيدەنت جارلىعى بويىنشا.
مەملەكەت باسشىسىنىڭ «قازاقستان رەسپۋبليكاسىنىڭ مەملەكەتتىك باسقارۋ جۇيەسىن ودان ءارى جەتىلدىرۋ جونىندەگى شارالار تۋرالى» جارلىعىمەن جاڭادان 5 مينيسترلىك قۇرىلدى، دەپ حابارلايدى Almaty-akshamy.kz اقورداعا سىلتەمە جاساپ.
ولار:
- سۋ رەسۋرستارى جانە يرريگاسيا مينيسترلىگى؛
- كولىك مينيسترلىگى؛
- تۋريزم جانە سپورت مينيسترلىگى؛
- مادەنيەت جانە اقپارات مينيسترلىگى؛
- ونەركاسىپ جانە قۇرىلىس مينيسترلىگى قۇرىلدى.
***
قازاقستان رەسپۋبليكاسىنىڭ مەملەكەتتىك باسقارۋ جۇيەسىن ودان ءارى جەتىلدىرۋ جونىندەگى شارالار تۋرالى
2023 جىلعى 01 قىركۇيەك
قازاقستان رەسپۋبليكاسى كونستيتۋسياسىنىڭ 44-بابىنىڭ 3) تارماقشاسىنا سايكەس مەملەكەتتىك باسقارۋ جۇيەسىن جاڭعىرتۋ جانە ونىڭ تيىمدىلىگىن ارتتىرۋ ماقساتىندا قاۋلى ەتەمىن:
- مىنالار:
1) قازاقستان رەسپۋبليكاسىنىڭ ەكولوگيا جانە تابيعي رەسۋرستار مينيسترلىگى ودان قازاقستان رەسپۋبليكاسىنىڭ سۋ رەسۋرستارى جانە يرريگاسيا مينيسترلىگىن ءبولىپ شىعارۋ، وعان سۋ قورىن پايدالانۋ جانە قورعاۋ، سۋمەن جابدىقتاۋ، سۋ بۇرۋ سالاسىنداعى فۋنكسيالار مەن وكىلەتتىكتەردى بەرۋ جولىمەن؛
2) قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ مينيسترلىگى ونى:
تەمىرجول، اۆتوموبيل، ىشكى سۋ كولىگى؛ ساۋدا ماقساتىندا تەڭىزدە ءجۇزۋ سالالارىنداعى؛ قازاقستان رەسپۋبليكاسىنىڭ اۋە كەڭىستىگىن پايدالانۋ مەن ازاماتتىق جانە ەكسپەريمەنتتىك اۆياسيا قىزمەتى؛ اەروناۆيگاسيا مەن اۋەجايلاردىڭ كورسەتىلەتىن قىزمەتتەرى سالاسىنداعى تابيعي مونوپوليالار؛ اۋەجايلاردىڭ كورسەتىلەتىن قىزمەتتەرى سالاسىنداعى قوعامدىق ماڭىزى بار نارىقتار؛ اۆتوموبيل جولدارى سالاسىنداعى فۋنكسيالار مەن وكىلەتتىكتەر بەرىلە وتىرىپ، قازاقستان رەسپۋبليكاسىنىڭ كولىك مينيسترلىگىنە؛
يندۋستريا جانە يندۋستريالىق دامۋ؛ ونەركاسىپ؛ تاۋ-كەن مەتاللۋرگيا كەشەنى؛ ەلىشىلىك قۇندىلىقتى دامىتۋ؛ ماشينا جاساۋ؛ كومىر، حيميا، جەڭىل (اۋىل شارۋاشىلىعى جانۋارلارىنىڭ تەرىسى مەن ءجۇنىن قايتا وڭدەۋدەن باسقا)، اعاش وڭدەۋ جانە جيھاز ونەركاسىبى؛ قۇرىلىس يندۋسترياسى جانە قۇرىلىس ماتەريالدارىن ءوندىرۋ؛ ماشينالار مەن جابدىقتاردىڭ قاۋىپسىزدىگى؛ سالالىق باعىتقا سايكەس حيميالىق ءونىمنىڭ قاۋىپسىزدىگى؛ وزىندىك ەرەكشەلىگى بار تاۋارلاردى باقىلاۋ؛ ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ؛ باعالى مەتالدار ءوندىرىسىن جانە باعالى مەتالدار مەن اسىل تاستاردىڭ اينالىمىن رەتتەۋ؛ قۇرامىندا باعالى مەتالدار بار شيكىزات تاۋارلارى؛ زەرگەرلىك جانە باسقا دا بۇيىمدار؛ ارنايى ەكونوميكالىق ايماقتاردى قۇرۋ، ولاردىڭ جۇمىس ىستەۋى جانە تاراتىلۋى؛ ۋران ءوندىرۋدى قوسپاعاندا، پايدالى قاتتى قازبالار بولىگىندە جەر قويناۋىن پايدالانۋدى مەملەكەتتىك باسقارۋ؛ جەر قويناۋىن مەملەكەتتىك گەولوگيالىق زەرتتەۋ، مينەرالدىق-شيكىزات بازاسىن مولايتۋ سالالارىنداعى؛ ساۋلەت، قالا قۇرىلىسى جانە قۇرىلىس قىزمەتى؛ تۇرعىن ءۇي قاتىناستارى؛ كوممۋنالدىق شارۋاشىلىق؛ ەلدى مەكەندەر شەگىندە سۋمەن جابدىقتاۋ جانە سۋ بۇرۋ، جىلۋمەن جابدىقتاۋ (ورتالىقتاندىرىلعان جىلۋمەن جابدىقتاۋ ايماعىندا جىلۋ ەنەرگياسىن ءوندىرۋدى جۇزەگە اسىراتىن جىلۋ ەلەكتر ورتالىقتارى مەن قازاندىقتاردان باسقا) سالاسىنداعى مەملەكەتتىك رەتتەۋ؛ تۇرعىن ءۇي قۇرىلىسىنا ۇلەستىك قاتىسۋ؛ قورعانىس ونەركاسىبى؛ ءبىرىڭعاي اسكەري-تەحنيكالىق ساياساتتى جۇرگىزۋگە قاتىسۋ؛ اسكەري-تەحنيكالىق ىنتىماقتاستىقتى جۇزەگە اسىرۋ؛ مەملەكەتتىك قورعانىستىق تاپسىرىستى قالىپتاستىرۋ، ورنالاستىرۋ جانە ورىنداۋ سالاسىنداعى فۋنكسيالار مەن وكىلەتتىكتەر بەرىلە وتىرىپ، قازاقستان رەسپۋبليكاسىنىڭ ونەركاسىپ جانە قۇرىلىس مينيسترلىگىنە ءبولۋ جولىمەن؛
3) قازاقستان رەسپۋبليكاسىنىڭ اقپارات جانە قوعامدىق دامۋ مينيسترلىگى وعان قازاقستان رەسپۋبليكاسىنىڭ مادەنيەت جانە سپورت مينيسترلىگىنەن مادەنيەت؛ تاريحي-مادەني مۇرا وبەكتىلەرىن قورعاۋ جانە پايدالانۋ؛ كينەماتوگرافيا؛ مەملەكەتتىك رامىزدەر؛ ارحيۆ ءىسى جانە باسقارۋدى قۇجاتتامالىق قامتاماسىز ەتۋ؛ ەلەكتروندىق قۇجات اينالىمى جانە ەلەكتروندىق ارحيۆتەر سالالارىنداعى؛ ونوماستيكا؛ كرەاتيۆتى يندۋستريالار جانە شىعارماشىلىق قىزمەت ناتيجەلەرىن كوممەرسيالاندىرۋ سالاسىنداعى فۋنكسيالار مەن وكىلەتتىكتەردى بەرە وتىرىپ، ونى قازاقستان رەسپۋبليكاسىنىڭ مادەنيەت جانە اقپارات مينيسترلىگى ەتىپ قايتا قۇرۋ جولىمەن؛
4) قازاقستان رەسپۋبليكاسىنىڭ مادەنيەت جانە سپورت مينيسترلىگى ونى قازاقستان رەسپۋبليكاسىنىڭ تۋريزم جانە سپورت مينيسترلىگى ەتىپ قايتا قۇرۋ جولىمەن قايتا ۇيىمداستىرىلسىن.
- قايتا ۇيىمداستىرىلعان مەملەكەتتىك ورگاندار بەرىلەتىن فۋنكسيالار وكىلەتتىكتەرگە سايكەس قايتا ۇيىمداستىرىلاتىن مەملەكەتتىك ورگانداردىڭ قۇقىقتارى مەن مىندەتتەمەلەرىنىڭ قۇقىق ميراسقورلارى بولىپ ايقىندالسىن.
- قازاقستان رەسپۋبليكاسىنىڭ ۇكىمەتى:
1) قازاقستان رەسپۋبليكاسى پرەزيدەنتىنىڭ اكىمشىلىگىمەن كەلىسۋ بويىنشا قايتا ۇيىمداستىرىلاتىن مەملەكەتتىك ورگاندار مەن ولارعا ۆەدومستۆولىق باعىنىستى ۇيىمداردىڭ شتات سانىن قايتا ءبولۋدى؛
2) وسى جارلىقتى ىسكە اسىرۋ بويىنشا وزگە دە شارالاردى قابىلداۋدى قامتاماسىز ەتسىن.
- «قازاقستان رەسپۋبليكاسى ۇكىمەتىنىڭ قۇرىلىمى تۋرالى» قازاقستان رەسپۋبليكاسى پرەزيدەنتىنىڭ 1999 جىلعى 22 قاڭتارداعى №6 جارلىعىنا مىناداي وزگەرىستەر مەن تولىقتىرۋلار ەنگىزىلسىن:
1-تارماقتا:
مىنا:
«قازاقستان رەسپۋبليكاسىنىڭ مادەنيەت جانە سپورت مينيسترلىگى؛» دەگەن جول مىناداي رەداكسيادا جازىلسىن:
«قازاقستان رەسپۋبليكاسىنىڭ تۋريزم جانە سپورت مينيسترلىگى؛»؛
مىنا:
«قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ مينيسترلىگى؛» دەگەن جول الىپ تاستالسىن؛
مىنا:
«قازاقستان رەسپۋبليكاسىنىڭ اقپارات جانە قوعامدىق دامۋ مينيسترلىگى؛» دەگەن جول مىناداي رەداكسيادا جازىلسىن:
«قازاقستان رەسپۋبليكاسىنىڭ مادەنيەت جانە اقپارات مينيسترلىگى؛»؛
مىناداي مازمۇنداعى جولدارمەن تولىقتىرىلسىن:
«قازاقستان رەسپۋبليكاسىنىڭ سۋ رەسۋرستارى جانە يرريگاسيا مينيسترلىگى؛
قازاقستان رەسپۋبليكاسىنىڭ كولىك مينيسترلىگى؛
قازاقستان رەسپۋبليكاسىنىڭ ونەركاسىپ جانە قۇرىلىس مينيسترلىگى.».
- وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.
- وسى جارلىق قول قويىلعان كۇنىنەن باستاپ قولدانىسقا ەنگىزىلەدى.
قازاقستان رەسپۋبليكاسىنىڭ پرەزيدەنتى ق. توقايەۆ