جولداۋدا سۋ ماسەلەسى دە پرەزيدەنت نازارىنان تىس قالمادى
پرەزيدەنتتىڭ جولداۋىن ۇجىمىمىزبەن شىن ىقىلاسىمىزبەن تىڭدادىق. بۇل جولداۋدا وتە وزەكتى ماسەلەلەر كوتەرىلدى. جول ماسەلەسى ءسوز ەتىلدى. بىرنەشە مينيسترلىكتەردىڭ جۇمىسى ءسوز ەتىلىپ، جاڭادان ەكى مينيسترلىك قۇرۋدى ۇسىندى. سونىمەن قاتار، سوڭعى كەزدەرى كوپ ورىن الىپ جاتقان ونەركاسىپتەگى قىزمەتكەرلەردىڭ قاۋىپسىزدىك ماسەلەسىنە ەرەكشە توقتالدى.
تاعى ءبىر ماڭىزدى ماسەلە - سالىق. «مەن ەكونوميكانىڭ ءارتۇرلى سەكتورلارىندا بۇرىن جاريالاعان سالىق ستاۆكالارىن سارالاۋ ءوندىرىستىڭ كۇردەلىلىگىن ارتتىرۋعا پروپورسيونالدى تۇردە سالىق جۇكتەمەسىن ءبولۋدى قامتاماسىز ەتۋى كەرەك. كاسىپكەرلەر قوسىلعان قۇن سالىعىن قايتارۋدىڭ كۇردەلى پروسەدۋراسىنا شاعىمدانادى. بۇل ەلدەگى ينۆەستيسيالىق احۋالدى ايتارلىقتاي ناشارلاتادى. ۇكىمەت بۇل ەسكى ماسەلەنى تەز ارادا شەشۋى كەرەك»، -دەپ توقتالدى مەملەكەت باسشىسى.
ال الەمدى الاڭداتىپ وتىرعان سۋ ماسەلەسىن كوتەرۋى وتە ورىندى. سوڭعى كەزدەرى كليماتتىق جاعدايعا بايلانىستى دۇنيەجۇزىندە اۋىز سۋ تاپشىلىعى بايقالىپ كەلەدى. ونىڭ ساپالى بولۋى سۋ قۇبىرلارىنا بايلانىستى بولىپ وتىر. نەگىزىنەن سۋ باستى باقىلاۋدا تۇرۋى كەرەك. ال سۋ قۇبىرلارىنىڭ توزۋى اۋىز سۋ ساپاسىنىڭ تومەندەۋىنە الىپ كەلەدى. سوندىقتان سۋ قويمالارىن كوبەيتىپ، قۇبىرلاردى جاڭارتۋىمىز كەرەك. ەندى جاڭادان سۋ رەسۋرستارى جانە يرريگاسيا مينيسترلىگىن قۇرۋ تۋرالى يدەياسىن قولدايمىن.
تابيعي سۋدىڭ 30 پايىزىن پايدالانساق، 70 پايىزى تابيعاتتىڭ وزىنە كەرەك ەتىلۋى ءتيىس. الايدا بۇگىنگى تاڭدا ۇلكەن قالالارىمىزدا سۋ تاپشىلىعى قاتتى سەزىلۋدە. ماسەلەن استانا قالاسىن سالىپ جاتقان كەزدە سانيتارلىق دارىگەرلەر بەس جىلدان كەيىن سۋ تاپشىلىعى پايدا بولاتىنى تۋرالى دابىل قاققان ەدى. قالا بولعان سوڭ ادام سانى ارتادى. ال مۇنداعى سۋ قورى قالانىڭ بەس ءجۇز ارى بارعاندا جەتى ءجۇز حالقىن عانا قامتاماسىز ەتۋگە جەتەدى. مىنە، شامادا ارادان ون جىل وتكەندە مامانداردىڭ ايتقانى ايداي كەلدى. سوندىقتان عالىمداردى تارتۋ ارقىلى كەز كەلگەن جوبا جوسپاردى جۇزەگە اسىرسا ەكەن دەگەن وي كەلدى. جالپى ايتىلدى جۇزەگە اسىرۋ كەرەك دەگەن باعامدا جۇرۋگە بولمايدى. كەز كەلگەن ماسەلەنى جان جاقتى قاراستىرىپ بارىپ شەشكەن ءجون. وتكەندە پرەزيدەنت الماتىنىڭ سۋ رەزەرۋارىن كوزبەن كورىپ، وسى جاعىندا الداعى ۋاقىتتا قاداعادا ۇستاۋىن تاپسىرعان بولاتىن. دەمەك، وزەكتى ماسەلە مەملەكەت باسشىسىنىڭ نازارىندا ەكەنىن كورۋگە بولادى.