مەملەكەت باسشىسى قاسىم-جومارت توقايەۆ «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىندا مەديا، كينو، مۋزىكا، ديزاين، ءبىلىم بەرۋ، اقپاراتتىق تەحنولوگيالار سياقتى كرەاتيۆتى يندۋستريا سالالارىن دامىتۋ ماسەلەسىن ەرەكشە اتاپ ءوتتى. سونداي-اق، بۇل سەكتور ءالى دە دامىماعانىن جانە ەلىمىزدە كرەاتيۆتى ەكونوميكانىڭ قارقىندى ءوسۋى ءۇشىن جاعداي جاساۋ قاجەت ەكەنى ايتىلدى.
ۇلتتىق كينونى قولداۋ مەملەكەتتىك ورتالىعىنىڭ باسقارما ءتوراعاسى قۇرمانبەك ءجۇماعاليدىڭ ايتۋىنشا، بۇل – كينويندۋسترياداعى ماماندارعا دا قاتىستى ايتىلعان مەسسەدج.
«پرەزيدەنت «كرەاتيۆشىلەرگە» جوبالاردى كوممەرسيالاندىرۋ ماسەلەلەرى بويىنشا كومەكتەسۋ كەرەك ەكەنىن ايتتى. راسىندا، ءبىز ءقازىر جاقسى جوبالاردىڭ دا نازاردان تىس قالىپ، تابىستارعا جەتە الماي جاتقانىن كورىپ وتىرمىز. ەگەر كينو سالاسىنا كەلەتىن بولساق، وندا دايىن فيلمدەر مىندەتتى تۇردە تابىس اكەلۋى ءتيىس. ءبىراق، وكىنىشكە وراي، كەيبىر شىعارماشىلىق توپ وكىلدەرى ءتۇسىرىلىم اياقتالعاننان كەيىن فيلمدەردى قالاي جارنامالاپ، جارىققا شىعارۋ كەرەكتىگىن بىلمەيدى. ال كەيبىر رەجيسسەرلەر ءوز فيلمدەرىن حالىقارالىق كينوفەستيۆالدەرگە ۇسىنا ما، الدە كەڭ پروكاتقا شىعارا ما – ول جاعىن الدىن الا ويلاستىرمايدى. سوندىقتان بيىلعى پيچينگتى وتكىزگەننەن كەيىن، ءبىز كينەماتوگرافيستەرگە قانداي تەتىكتەر ارقىلى جەرگىلىكتى دەڭگەيدە، ءتىپتى قالاي حالىقارالىق نارىققا شىعۋعا بولاتىنىن ءتۇسىندىرۋ ماقساتىندا ترەنينگتەر ۇيىمداستىرۋدى جوسپارلاپ وتىرمىز»، – دەدى قۇرمانبەك جۇماعالي.
سونداي-اق، ول بيىل تامىز ايىندا ۇلتتىق كينونى قولداۋ مەملەكەتتىك ورتالىعى كينوتەاتر وكىلدەرىمەن، كينوديستريبيۋتورلارمەن جانە كينوپروديۋسەرلەرمەن كەزدەسۋلەر وتكىزگەنىن اتاپ ءوتتى.
«ءقازىر كينو سالاسىندا بارلىعىمىزعا ءبىرىڭعاي دامۋ ستراتەگياسى قاجەت. جالپىعا تۇسىنىكتى جۇيە كەرەك. ءقازىر ءبىز قولدانىستاعى ەرەجەلەر مەن نورماتيۆتىك-قۇقىقتىق اكتىلەردى جەتىلدىرۋ ماقساتىندا سالا وكىلدەرىمەن بەلسەندى كەزدەسۋلەر وتكىزىپ جاتىرمىز. سونداي-اق، ۇلتتىق فيلمدەرگە قولداۋ كورسەتۋ ءۇشىن جىل سوڭىنا دەيىن كينوتەاترلارمەن مەموراندۋمدارعا قول قويۋدى جوسپارلاپ وتىرمىز. جالپى، بيزنەس وكىلدەرى وتاندىق كينونىڭ دامۋى جولىندا بارىنشا قولداۋ كورسەتۋگە جانە بىزبەن تىعىز بايلانىستا بولۋعا دايىن. مەنىڭ ويىمشا، ءقازىر «كرەاتيۆشىلەر» پرەزيدەنتتىڭ ەرەكشە قولداۋىن سەزىنۋدە»، – دەدى قۇرمانبەك جۇماعالي.