ق ر مادەنيەت جانە سپورت ءمينيسترى داۋرەن ابايەۆتىڭ توراعالىعىمەن ق ر ۇكىمەتىنىڭ جانىنداعى رەسپۋبليكالىق ونوماستيكا كوميسسياسىنىڭ وتىرىسى ءوتتى.
ءىس-شاراعا كوميسسيا مۇشەلەرى، ونىڭ ىشىندە سەنات دەپۋتاتى مۇرات باقتيار ۇلى، ءماجىلىس دەپۋتاتى مالىك قۇلشار، عىلىمي جانە ساراپتامالىق قوعامداستىق وكىلدەرى قاتىستى. كوميسسيا وتىرىسى اياسىندا شىعىس قازاقستان، قاراعاندى جانە الماتى وبلىستارى اكىمدىكتەرىنىڭ جاڭادان قۇرىلعان اباي، ۇلىتاۋ جانە جەتىسۋ وبلىستارىنا اتاۋلار بەرۋ تۋرالى ۇسىنىستارى قارالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
سونداي-اق، مەملەكەت مەنشىگىندەگى جەكەلەگەن نىسانداردى، سونداي-اق نۇر-سۇلتان، الماتى، اقتوبە، قاراعاندى، قىزىلوردا، قوستاناي، پاۆلودار قالالارىنداعى كوشەلەردى قايتا اتاۋ ماسەلەلەرى قارالدى.
«وزدەرىڭىز بىلەتىندەي، مەملەكەت باسشىسى قازاقستان حالقىنا جولداۋىندا ءبىرقاتار اكىمشىلىك-اۋماقتىق وزگەرىستەردى اتاپ ءوتتى. ولاردىڭ بارلىعى تەرەڭ ەكونوميكالىق نەگىزدەمەگە يە، وراسان زور مۋلتيپليكاتيۆتىك اسەرى بار. دەگەنمەن ەڭ باستىسى - قوعامدىق پىكىردى ەسكەرۋ ماڭىزدى. ەندى قازاقستاندا ءوز وبلىس ورتالىقتارى بار جاڭا وبلىستار پايدا بولادى. اتاپ ايتقاندا، سەمەي قالاسى جاڭا اباي وبلىسىنىڭ ورتالىعىنا، جەزقازعان جاڭادان قۇرىلعان ۇلىتاۋ وبلىسىنىڭ ورتالىعىنا اينالادى، وسىنداي وزگەرىستەر الماتى وبلىسىنا دا قاتىستى»، - دەدى مينيستر.
كەز كەلگەن قالانى، ەلدى مەكەندى نەمەسە كوشەنى قايتا اتاۋ ونوماستيكا سالاسىن رەتتەيتىن زاڭناما تالاپتارىنا سايكەس جۇزەگە اسىرىلاتىنىن اتاپ ءوتۋ قاجەت. كوميسسيا كەلىپ تۇسكەن ۇسىنىستاردى قارايدى جانە قورىتىندى بەرەدى. وڭ قورىتىندى بولعان كەزدە قايتا اتاۋ تۋرالى شەشىم قازاقستان رەسپۋبليكاسى پرەزيدەنتىنىڭ جارلىعىمەن بەكىتىلەدى.
وتىرىس قورىتىندىسى بويىنشا كوميسسيا مۇشەلەرى اكىمدىكتەردىڭ ۇسىنىسىن ماقۇلدادى. جاقىن ارادا كوميسسيانىڭ قورىتىندىسى دايىندالىپ، زاڭناماعا سايكەس ودان ءارى جۇمىس ىستەۋ ءۇشىن وبلىستاردىڭ اكىمدىكتەرىنە جىبەرىلەتىن بولادى.
بۇعان دەيىن رەسپۋبليكالىق ونوماستيكا كوميسسياسى قاپشاعاي قالاسىن قونايەۆ دەپ قايتا اتاۋ تۋرالى وڭ قورىتىندى بەرگەن بولاتىن.