جاڭا جىل – عاجايىپقا سەنەتىن، وتباسىمەن ءبىر داستارقان باسىنا جينالىپ، جىلى ەستەلىكتەرگە تولى فيلمدەر كورەتىن ەرەكشە كەزەڭ. بۇل كۇندەرى ەكراننان كوبىنە كۇلكى سىيلايتىن، ءۇمىت پەن جاقسىلىقتى ناسيحاتتايتىن تۋىندىلاردى كورگىمىز كەلەدى.
تومەندە جاڭا جىل مەن قىسقى مەرەكەلەر تاقىرىبىنا ارنالعان، كورەرمەننىڭ بىرنەشە بۋىنىنا ورتاق كەڭەس داۋىرىندەگى كلاسسيكالىق فيلمدەردى ۇسىنامىز.
ەڭ تانىمال كلاسسيكالىق فيلمدەر
«يرونيا سۋدبى، يلي س لەگكيم پاروم!» (1975) – لەنينگراد قالاسىنداعى كەزدەيسوق تانىستىقتان باستالاتىن، جاڭا جىلمەن تىعىز بايلانىستى ەڭ تانىمال فيلمدەردىڭ ءبىرى. دوستارمەن مونشاعا بارۋدان باستالعان وقيعا كۇتپەگەن ماحاببات حيكاياسىنا ۇلاسادى. بۇل تۋىندى ونداعان جىلدار بويى جاڭا جىلدىق مەرەكەنىڭ اجىراماس بولىگىنە اينالدى. كەيىن بۇل ءفيلمنىڭ جاڭا نۇسقاسى دا ءتۇسىرىلدى، ءبىراق بايىرعى كورەرمەن ءۇشىن العاشقىسىنىڭ ورنى ەرەكشە.
«كارناۆالنايا نوچ» (1956) – ەلدار ريازانوۆ تۇسىرگەن مۋزىكالىق كومەديا. ليۋدميلا گۋرچەنكو ويناعان، ايگىلى «بەس مينۋت» انىمەن ەستە قالعان تۋىندى. جاستاردىڭ جاڭا جىل كەشىن ەركىن ءارى كوڭىلدى وتكىزگىسى كەلۋى مەن ەسكىشە ويلايتىن باسشىلىقتىڭ اراسىنداعى قاقتىعىس يۋمور ارقىلى كورسەتىلەدى. فيلم وپتيميزمگە تولى، جاڭا جىلدىڭ رۋحىن ايقىن سەزدىرەدى.
«چارودەي» (1982) – سترۋگاسكييلەردىڭ شىعارمالارى نەگىزىندە تۇسىرىلگەن مۋزىكالىق فانتاستيكا. جاڭا جىل ءتۇنى بولاتىن عاجايىپتار، ماحاببات پەن سيقىر ارالاسقان مۋزىكالىق فيلم. عىلىمي ينستيتۋتتاعى توسىن وقيعالار كورەرمەندى ەرتەگى الەمىنە جەتەلەيدى.
«دجەنتلمەنى ۋداچي» (1971) – وقيعاسى قىسقى مەرەكەلەر كەزىندە ءوربيتىن قىلمىستىق-كومەديالىق فيلم.
قىسقى اتموسفەراسى بار كومەديالار
«ستارىي نوۆىي گود» (1980) – ءارتۇرلى الەۋمەتتىك توپتان شىققان كورشىلەردىڭ ءومىرىن اجۋامەن سۋرەتتەيتىن ساتيرالىق كومەديا.
«زيگزاگ ۋداچي» (1968) – مەرەكە قارساڭىندا لوتەرەيادان ءىرى ۇتىسقا يە بولعان ادام تۋرالى وقيعا.
«يششيتە جەنششينۋ» (1982) – روجدەستۆو قارساڭىنداعى پاريجدە ءوربيتىن كومەديالىق دەتەكتيۆ.
«سنەگۋروچكۋ ۆىزىۆالي؟» (1985) –كەزدەيسوق جۇپتاسقان ارتىستەر تۋرالى جىلى ءارى ليريكالىق حيكايا.
جاڭا جىل تاقىرىبىنداعى فيلمدەر:
• جاقسىلىققا سەنۋدى ۇيرەتەدى؛
• وتباسى مەن دوستىقتىڭ ماڭىزىن كورسەتەدى؛
• وتكەن جىلدى وي ەلەگىنەن وتكىزىپ، جاڭا ۇمىتپەن العا قاراۋعا شابىتتاندىرادى.