قازاق كينوسىنىڭ جاۋھارى "قىز جىبەك" فيلمىندە "قىز جىبەك" ءرولىن سومداعان اكتريسا مەرۋەرت وتەكەشوۆا ءاسانالى ءاشىموۆتى اقتىق ساپارعا شىعارىپ سالۋ راسىمىندە ءسوز سويلەدى، - دەپ حابارلايدى اqshamnews.kz ءتىلشىسى.
اكتريسا مارقۇمدى تەاتر ءۇشىن "ورنى تولماس قايعى" دەپ اتاپ، ءاسانالى ءاشىموۆ جۇرت جۇرەگىندە ماڭگى قالاتىنىن ايتتى.
"بۇل - تەاتر ءۇشىن ورنى تولماس قايعى. ءبىزدىڭ سۇيىكتى ءاسانالى اعامىز الىس ساپارعا اتتاندى. ءبىراق ول جۇرەگىمىزدە ماڭگى قالادى. حالىق ونى ەشقاشان ۇمىتپايدى. ءاسانالى اعانىڭ ويناعان رولدەرى دە، تۇسكەن فيلمدەرى دە، سىڭىرگەن ەڭبەگى دە ۇشان-تەڭىز"، — دەدى مەرۋەرت وتەكەشوۆا.
ونىڭ ايتۋىنشا، ءاسانالى ءاشىموۆ ونەر جولىنىڭ باسىندا جۇرگەن شاعىندا وزىنە اعا، ۇستاز ءارى دوس رەتىندە كوپ دەمەۋ بولعان.
"ماعان ءاسانالى اعا اعا رەتىندە دە، اكتەر، ۇستاز، دوس رەتىندە دە كوپ كومەك كورسەتتى. ونەر جولىن ەندى باستاعان كەزىمدە مەن وتە جاس ەدىم. تولەگەنىم الىس ساپارعا كەتتى، ەندى بەكەجانىم - ءاسانالى اعا دا بۇگىن الىس جولعا اتتاندى. ەندى ولار جوعارىدا بىر-بىرىمەن قاۋىشىپ، بىزگە جۇلدىزداي قاراپ، قامقورلىعىن كورسەتەتىن شىعار"، — دەدى اكتريسا.
سونداي-اق ول كەلەسى جىلى تەاتردىڭ 100 جىلدىعى تويلاناتىنىن ەسكە الىپ، "ءبىر جىل جەتپەي قالعانىنا" وكىنىش ءبىلدىردى.
"اتتەڭ، ءبىر جىل جەتپەي قالدى. كەلەسى جىلى تەاترىمىزدىڭ 100 جىلدىعى تويلانادى. قالاي بولعاندا دا، ءاسانالى اعانىڭ ورنىن ەشكىم باسا المايدى"، - دەپ تۇيىندەدى مەرۋەرت وتەكەشوۆا.
ەسكە سالايىق، قازاق كينوسىنىڭ كوريفەيى، قازاقستاننىڭ حالىق ءارتىسى، قازاقستاننىڭ ەڭبەك ەرى ءاسانالى ءاشىموۆ 21 جەلتوقساندا 89-عا قاراعان شاعىندا ومىردەن وزدى. بۇگىن، 23 جەلتوقاندا ونى الماتىدا كوپشىلىك اقتىق ساپارعا شىعارىپ سالدى.