بۇگىن، 23 جەلتوقساندا الماتىداعى اباي اتىنداعى قازاق ۇلتتىق وپەرا جانە بالەت تەاترىندا قازاق كينوسى مەن تەاتر ونەرىنىڭ اڭىزى، كورنەكتى ونەر قايراتكەرى ءاسانالى ءاشىموۆتى اقتىق ساپارعا شىعارىپ سالۋ ءراسىمى ءوتتى، - دەپ حابارلايدى aqshamnews.kz ءتىلشىسى.
ونەر يەسىمەن قوشتاسۋعا قالىڭ جۇرتشىلىق جينالدى، ولاردىڭ قاتارىندا ەلگە تانىمال تۇلعالار دا بار. ولار ابىزعا اينالعان قازاق ونەرىنىڭ قارا نارىنىڭ ەستەلىكتەرىن اۋىر كۇرسىنىسپەن ەسكە الىپ، ءسوز سويلەدى.
قىمبات ءابىلدينا:
"تاۋ تۇلعاسىمەن حالىق بولاتىن. سول حالىقتىڭ باسىنا قۋانىش ورناسا دا، قايعى ورناسا دا، "حالىق كىم؟" دەگەندە دوسقا دا، دۇشپانعا دا، وقىعانعا دا، وقىماعانعا دا، قالالىققا دا، دالالىققا دا تايسالماي كورسەتەتىن، تاۋ قىلىپ تانىتاتىن سيرەك تۇلعا ەدى. بۇگىن ءبىز سول تۇلعادان ايىرىلىپ تۇرمىز. جۇرەگىم قاتتى اۋىرىپ تۇر. "قازاق دەگەن كىم؟" دەپ سۇراعاندا، ءاسانالى اعانى ۇيالماي، ماقتانىشپەن كورسەتە الاتىن ەدىك. ول - كەشەگى عاسىردىڭ دا، بۇگىنگى عاسىردىڭ دا بەت-بەينەسى، بەدەلى، بۇكىل قازاقتىڭ ءتولقۇجاتى بولدى"، - دەدى ول قوشتاسۋ راسىمىندە.
ساۋىق جاقانوۆا:
"قانشاما ۇلى تۇلعالارىمىز ومىردەن ءوتىپ جاتىر. سونىڭ سوڭى بولسىن دەپ تىلەيىك، وزگەلەرى امان بولسىن. ءاسانالى اعامىزدىڭ رۋحىنا يمانى جولداس بولسىن، جاتقان جەرى جايلى بولسىن. ەلى امان، جۇرتى تىنىش بولسىن. ءاسانالى اعاداي ۇل-قىزدار قازاقتان تۋا بەرسىن"، - دەدى ول.
سماعۇل ەلۋباي:
"ەكراندا ول حالىقتىڭ باتىر تۇلعاسىن، اسىل ازاماتتىڭ بەينەسىن سومدادى. بۇگىن ءاسانالى اعا جاساعان سول بەينەلەرگە رازى بولعان قازاق حالقىنىڭ قابىرعاسى قايىسىپ وتىر. جاتقان جەرى جايلى، توپىراعى تورقا بولسىن"، - دەدى جازۋشى.
باقىت بەدەلحان:
"بۇگىن تاۋ قۇلاپ، بايتەرەك سىنىپ تۇسكەندەي. اسپان الاسارىپ، بۇكىل قالىڭ قازاق قايعىرىپ، قابىرعاسى سوگىلىپ، كوز جاسى توگىلىپ وتىر. جوقتان بار جاسايتىن - قۇداي، ولگەندى تىرىلتەتىن - ونەر. سول ولگەن ونەردى ءتىرىلتىپ، ورگە سۇيرەپ، بۇكىل الاشتىڭ باتاسىن الىپ، اقىرى ءوزى ابىزعا اينالعان جاسقا كەلدى. قازاقتىڭ بۇكىل ونەرىن، رۋحىن، قاسيەتىن، بار بولمىسىن الەمگە تانىتتى. ءاسانالى اعام ءوزى: "ۇلىلاردىڭ ءبارى تۇسىمە كىرەدى، ساعىنامىن. مەنىڭ بۇل دۇنيەدەگى قاتارىم ازايدى، و دۇنيەدەگى دوستارىم كوپ" دەپ ءجيى ايتاتىن. تاعى بىردە: "ەشكىمدى اۋرەگە سالماي، ءوزىم دە قينالماي، ۇيىقتاپ كەتسەم ارمانىم جوق" دەيتىن. سول ارمانىنا جەتتى. مۇنى قازاق "اق ءولىم" دەيدى. بۇكىل قازاقتىڭ الاقانىندا تۇرىپ، اق ولىممەن كەتۋ - ۇلكەن باقىت شىعار دەپ ويلايمىن. اسەكەڭنىڭ ءومىرى - ونەگە، تاعدىرى - تاعىلىم، عۇمىرى - عيبرات بولۋعا ءتيىس"، - دەيدى اقىن.
ەسكە سالايىق، قازاق كينوسىنىڭ كوريفەيى، قازاقستاننىڭ حالىق ءارتىسى، قازاقستاننىڭ ەڭبەك ەرى ءاسانالى ءاشىموۆ 21 جەلتوقساندا 89-عا قاراعان شاعىندا ومىردەن وزدى.