جاقىندا قازاقستان رەسپۋبليكاسىنىڭ ۇلتتىق مۋزەيى، «ق ر قارۋلى كۇشتەرى ارداگەرلەرى» جانە «Atamnyn amanaty» قوعامدىق بىرلەستىكتەرى بىرگە ۇلى جەڭىستىڭ 80 جىلدىعىنا ارنالعان «تاريحي جادىنى ساقتاۋ ۇرپاق ساباقتاستىعى مەن جاستارعا پاتريوتتىق تاربيە بەرۋدىڭ ماڭىزدى فاكتور رەتىندە» تاقىرىبىندا عىلىمي-پراكتيكالىق كونفەرەنسيا وتكىزدى.
كونفەرەنسيا ەكىنشى دۇنيەجۇزىلىك سوعىس جىلدارىنداعى اعا ۇرپاق ەرلىگىن ۇلىقتاۋدىڭ، تاريحي جادىنى ساقتاۋدىڭ جاڭا جولدارىن، باعىتتارى مەن فورمالارىن ىزدەۋ، تاريحي-ولكەتانۋ قىزمەتىن، ارحيۆتىك - ىزدەستىرۋ جۇمىستارىن جانداندىرۋ، سونىمەن قاتار وسكەلەڭ ۇرپاقتى پاتريوتيزمگە تاربيەلەۋ جانە ۇرپاقتار ساباقتاستىعىن دامىتۋدى تالقىلاۋدى ماقسات ەتىپ قويدى.
جيىندى «Atamnyn Amanaty» قوعامدىق بىرلەستىگىنىڭ باسقارما ءتوراعاسى مۇرات مولداعالييەۆ اشىپ، جۇرگىزىپ وتىردى. كونفەرەنسيانىڭ باستى قوناعى – «ق ر قارۋلى كۇشتەرى ارداگەرلەرى» ۇيىمى باسشىسىنىڭ ورىنباسارى، گەنەرال-مايور مارات ناعۇمانوۆ اتالعان ۇيىمنىڭ ءتوراعاسى، حالىق قاھارمانى، ارميا گەنەرالى مۇحتار التىنبايەۆتىڭ القالى جيىنعا قاتىسۋشىلارعا ارنالعان قۇتتىقتاۋ ءسوزىن وقىپ بەردى. وندا بىلاي دەلىنگەن:
«تاريحي جادى – ۇرپاق ساباقتاستىعىنىڭ نەگىزى. ءدال وسى جاد ارقىلى جاستار وتكەننىڭ ماڭىزىن تەرەڭ ۇعىنىپ، ەلدىڭ بولاشاعى ءۇشىن ءوز جاۋاپكەرشىلىگىن سەزىنەدى. بۇگىندە الەم كۇردەلى وزگەرىستەر كەزەڭىن باستان وتكەرىپ جاتقاندا، تاريحي اقيقاتتى ساقتاۋ، تاريحتى بۇرمالاۋعا قارسى تۇرۋ جانە پاتريوتتىق سانانى كۇشەيتۋ ايرىقشا وزەكتىلىككە يە.
قازاقستان رەسپۋبليكاسى قارۋلى كۇشتەرى ارداگەرلەرى رەتىندە ءبىزدىڭ ميسسيامىز – جاس بۋىنعا ەلىمىزدىڭ قاھارماندىق تاريحىن جەتكىزىپ قانا قويماي، وتانعا قىزمەت ەتۋدىڭ جارقىن ۇلگىسى ارقىلى ولاردىڭ ادامگەرشىلىك باعدارىن نىعايتۋ. سوعىس جانە ەڭبەك ەرلەرىنىڭ، ەل تاۋەلسىزدىگى مەن اۋماقتىق تۇتاستىعىن قورعاعان اسكەري قىزمەتشىلەردىڭ رۋحىن قاستەرلەۋ – تاريح الدىنداعى دا، كەلەر ۇرپاق الدىنداعى دا ورتاق بورىشىمىز.
كونفەرەنسيا جۇمىسى پاتريوتتىق تاربيەنىڭ ءتيىمدى جۇيەسىن دامىتۋعا باعىتتالعان يدەيالارمەن، وزىق تاجىريبەلەرمەن جانە ناقتى باستامالارمەن الماساتىن ماڭىزدى الاڭعا اينالاتىنىنا سەنىمدىمىن».
سودان كەيىن ق ر ۇلتتىق مۋزەيىنىڭ ديرەكتورى بەرىك ءابدىعالي ۇلى ءسوز الدى. ول ءوز سوزىندە «Atamnyn Amanaty» جانە «ق ر قارۋلى كۇشتەرى ارداگەرلەرى» ۇيىمدارى اراسىندا ورناعان ناتيجەلى ىنتىماقتاستىعىمىزدى ەرەكشە اتاپ وتكىم كەلەدى. بىرلەسكەن جوبالار، كورمەلەر، ارحيۆتىك-ىزدەستىرۋ باعدارلامالارى، ارداگەرلەرمەن كەزدەسۋلەر مەن ءبىلىم بەرۋ ءىس-شارالارى بىزگە قوعامدىق ديالوگ الاڭىن كەڭەيتۋگە، ۇلتتىق تاريحتى تۇتاس قابىلداۋدى قالىپتاستىرۋعا جانە تاريحي ءبىلىمنىڭ ساباقتاستىعىن نىعايتۋعا مۇمكىندىك بەرىپ وتىر دەگەندى ايتتى.
كونفەرەنسيا جۇمىسى كەلەسى باعىتتار بويىنشا ۇيىمداستىرىلدى:
1. ەكىنشى دۇنيەجۇزىلىك سوعىس تاريحى بويىنشا جاڭا زەرتتەۋلەر مەن جوبالار؛
2.مۋزەيلەردە سوعىس تۋرالى تاريحي ماتەريالداردى ۇسىنۋدىڭ زاماناۋي فورمالارى: جاڭا تاسىلدەر مەن تەندەنسيالار؛
3. جاۋىنگەر تاعدىرى: ارحيۆتىك زەرتتەۋدىڭ تەورياسى مەن پراكتيكاسى، دالالىق ىزدەستىرۋ جۇمىستارىنىڭ ناتيجەلەرى؛
4.ۇلى جەڭىستىڭ تاريحي جادىن ساقتاۋ جاستارعا پاتريوتتىق تاربيە بەرۋدىڭ ماڭىزدى فاكتورى رەتىندە.
كونفەرەنسيا بارىسىندا ق ر ۇلتتىق ۇلانى باس قولباسشىسىنىڭ ورىنباسارى، حالىق قاھارمانى، گەنەرال-مايور قايرات ۇمبەتوۆ، “مەموريالدىق ايماق” ىزدەستىرۋ جاساعىنىڭ جەتەكشىسى مايدان قۇسايىنوۆ، ق ر قك ۇلتتىق قورعانىس ۋنيۆەسريتەتىنىڭ وقىتۋشىسى، پولكوۆنيك، PhD دوكتورى الماگۇل الدابەرگەنوۆا، تاريح عىلىمدارىنىڭ كانديداتى، وتستاۆكاداعى پولكوۆنيك ماناس ماعۇلوۆ، پەداگوگيكا عىلىمدارىنىڭ كانديداتى، وتستاۆكاداعى پولكوۆنيك اسقار قالييەۆ، «Atamnyn Amanaty» قوعامدىق ۇيىمىنىڭ مۇراعاتتىق ىزدەستىرۋشىسى مەيىرحان نۇرحايدار قىزى جانە باسقالار جوعارىداعى باعىتتار باعىتتار بويىنشا باياندامالار جاسادى.