ۇكىمەت وتىرىسىندا پرەمەر-مينيستر ولجاس بەكتەنوۆ شاعىن بيزنەستى قولداۋدىڭ جانە كاسىپكەرلەر ءۇشىن مۇمكىندىكتەردى كەڭەيتۋدىڭ ماڭىزدىلىعىن اتاپ ءوتتى، دەپ حابارلايدى aqshamnews.kz
«شاعىن بيزنەستىڭ وندىرىستىك ينفراقۇرىلىمعا قولجەتىمدىلىگىن قامتاماسىز ەتىپ، ءۇي-جايلاردى جەڭىلدىكپەن جالعا الۋىنا مۇمكىندىك جاساعان ءجون. سونىمەن قاتار شاعىن بيزنەستى قولداۋدىڭ وڭىرلىك باعدارلامالارىن ازىرلەۋ ماڭىزدى ءىس ەكەنىن اتاپ وتكىم كەلەدى»، دەدى ولجاس بەكتەنوۆ.
ماسەلەن، الماتى قالاسىندا كاسىپكەرلىكتى دامىتۋ باعدارلاماسى اياسىندا بيىل جەرگىلىكتى بيۋدجەتتەن شاعىن جانە ورتا بيزنەستى دامىتۋعا 25،5 ملرد تەڭگە ءبولىندى. بۇل جالپى مەملەكەتتىك قولداۋ شارالارىمەن قامتىلماعان، قالا ءۇشىن نەعۇرلىم باسىم باعىتتاردىڭ دامۋىن ىنتالاندىرۋعا مۇمكىندىك بەردى.
تابىستى مىسالداردىڭ ءبىرى رەتىندە قالادا جىلدىق 6%-عا دەيىن جەڭىلدىكتى نەسيەلەر بەرۋ ارقىلى شاعىن ونەركاسىپتىك پاركتەردى دامىتۋ ءىسىن ايتۋعا بولادى.
وسى وڭ تاجىريبەنى بۇكىل ەلىمىز بويىنشا كەڭىنەن تاراتۋ قاجەتتىلىگى اتاپ ءوتىلدى.
بۇدان بولەك، ۇكىمەتتە «ىسكەر ايماق» باعدارلاماسىن قارجىلاندىرۋ تەتىكتەرى ايقىندالدى.
قارجى مينيسترلىگىنە باعدارلامانى قارجىلاندىرۋدى قامتاماسىز ەتۋ تاپسىرىلدى، بۇل رەتتە باعدارلامانى جەرگىلىكتى بيۋدجەتتەر ەسەبىنەن دە قوسا قارجىلاندىرۋ كوزدەلۋى قاجەت. ءوڭىر اكىمدىكتەرى ءبىرىنشى دەڭگەيدەگى سۋبسيديالاردى ءبولۋ ءۇشىن اۋدانداردىڭ ەرەكشەلىگىن ەسكەرە وتىرىپ، بارىنشا قىسقا مەرزىمدە باسىم سالالاردىڭ تىزبەسىن قالىپتاستىرۋى قاجەت.