بۇگىن الماتىداعى اباي اتىنداعى قازاق ۇلتتىق وپەرا جانە بالەت تەاترىندا قازاق كينوسى مەن تەاتر ونەرىنىڭ اڭىزى، كورنەكتى ونەر قايراتكەرى ءاسانالى ءاشىموۆتى اقتىق ساپارعا شىعارىپ سالۋ ءراسىمى ءوتتى، - دەپ حابارلايدى aqshamnews.kz ءتىلشىسى.
ونەر يەسىمەن قوشتاسۋعا قالىڭ جۇرتشىلىق جينالدى، ولاردىڭ قاتارىندا ەلگە تانىمال تۇلعالار دا بار.
مەملەكەتتىك كەڭەسشى ەرلان قارين ءاسانالى ءاشىموۆتىڭ وتباسى مەن جاقىندارىنا كوڭىل ايتتى.
"قازاقستاننىڭ ەڭبەك ەرى ءاسانالى ءاشىموۆتىڭ وتباسى مەن جاقىندارىنا قايعىلارىڭىزعا ورتاقتاسىپ، كوڭىل ايتامىن. ءاسانالى ءاشىموۆ بۇكىل سانالى عۇمىرىن تەاتر مەن كينو ونەرىنە ارناپ، ۇلتتىق مادەنيەتىمىزدىڭ كوكجيەگىن كەڭەيتۋگە ولشەۋسىز ۇلەس قوستى. ول كوپتەگەن وبرازدى شەبەر سومداپ، كورەرمەننىڭ ىستىق ىقىلاسىنا بولەندى. ساحنا ساڭلاعى ءارى كاسىبي كينوگەر رەتىندە سوڭىنا وشپەس ءىز قالدىردى. جاس ونەرپازدارعا باعىت-باعدار بەرىپ، رۋحاني ساباقتاستىقتىڭ ساقتالۋىنا زور ەڭبەك ءسىڭىردى. ونەردىڭ تۋىن بيىك ۇستاپ، ونەگەلى عۇمىر كەشكەن ءاسانالى ءاشىموۆتىڭ جارقىن بەينەسى حالقىمىزدىڭ جۇرەگىندە ماڭگى ساقتالادى. يمانى سالامات، جانى ءجانناتتا بولسىن!" - دەدى ول.
ءوز كەزەگىندە الماتى قالاسىنىڭ اكىمى دارحان ساتىبالدى ءاسانالى ءاشىموۆتىڭ دۇنيەدەن ءوتۋى ورنى تولماس قازا ەكەنىن اتاپ ءوتتى. ونىڭ ايتۋىنشا، مارقۇم ءتىرى كەزىندە ەلدىڭ قوعامدىق ومىرىنە، قالانىڭ مادەني ءىس-شارالارىنا بەلسەندى اتسالىسىپ، ءاربىر كەزدەسۋگە تەرەڭ ماعىنا مەن رۋحاني سالماق دارىتا ءبىلدى.
"ءاسانالى ءاشىموۆ تەاتر مەن كينو ونەرىنىڭ ۇلى تۇلعاسى عانا ەمەس، ۇلتتىق رۋح پەن رۋحانياتتىڭ كورنەكتى وكىلى بولدى. ول سانالى عۇمىرىن قازاق مادەنيەتىن دامىتۋعا ارناپ، ونەر ارقىلى حالىقتىڭ وزىندىك ساناسىن، بولمىسىن جانە تاريحىن اسقاقتاتتى. تالاي دارىندى شاكىرت تاربيەلەپ، ۇلتتىق ونەردە وزىندىك مەكتەپ قالىپتاستىردى. ونىڭ شىعارماشىلىق مۇراسى بۇگىنگى جانە كەلەر ۇرپاق ءۇشىن ماڭگىلىك ادامگەرشىلىك ءارى مادەني باعدار بولىپ قالا بەرەدى"، - دەدى قالا اكىمى.
ەسكە سالايىق، قازاق كينوسىنىڭ كوريفەيى، قازاقستاننىڭ حالىق ءارتىسى، قازاقستاننىڭ ەڭبەك ەرى ءاسانالى ءاشىموۆ 21 جەلتوقساندا 89-عا قاراعان شاعىندا ومىردەن وزدى.