بۇگىن الماتىنىڭ وڭىرلىك كوممۋنيكاسيالار قىزمەتىندە جاڭا جىلدىق مەرەكە كۇندەرى قارساڭىندا ءورت جانە قوعامدىق قاۋىپسىزدىك ماسەلەلەرىنە ارنالعان بريفينگ ءوتتى، دەپ حابارلايدى aqshamnews.kz
پيروتەحنيكالىق بۇيىمداردى ءقاۋىپسىز پايدالانۋ تاقىرىبىنا ەرەكشە نازار اۋدارىلدى. سپيكەرلەر رەتىندە الماتى قالاسى توتەنشە جاعدايلار دەپارتامەنتى باسشىسىنىڭ ورىنباسارى كارىمجان راحمان كارىمجان ۇلى، مەملەكەتتىك ءورت باقىلاۋ باسقارماسىنىڭ اعا ينجەنەرى دۋلات جاندار ەلدوس ۇلى، الماتى قالاسى پد اكىمشىلىك پوليسيا باسقارماسى باسشىسىنىڭ ورىنباسارى تيمۋر سەرىك ۇلى جانە جەدەل مەديسينالىق كومەك قىزمەتىنىڭ مەديسينالىق ءبولىمى ديرەكتورىنىڭ ورىنباسارى اندرەي لوجكين قاتىستى.
الماتى تجد باسشىسىنىڭ ورىنباسارى كارىمجان راحمان پيروتەحنيكانى پايدالانۋ كوبىنەسە ءورت پەن جاراقات الۋعا سەبەپ بولاتىنىن اتاپ ءوتتى.
«جىل سايىن الماتىدا جاڭا جىلدىق مەرەكە كەزىندە ورتا ەسەپپەن 11 ءورت وقيعاسى ورىن الادى، ولاردىڭ شامامەن 18% - ى پيروتەحنيكالىق بۇيىمدارمەن بايلانىستى. سوڭعى بەس جىلدا وسىنداي سەبەپپەن 57 ءورت تىركەلدى. ءبىزدىڭ باستى مىندەتىمىز — وسىنداي جاعدايلاردىڭ الدىن الۋ جانە قالا تۇرعىندارىن قورعاۋ»، - دەپ اتاپ ءوتتى كارىمجان راحمان.
سونىمەن قاتار، وتكەن جىلى 18 ادام، ونىڭ ىشىندە 11 بالا پيروتەحنيكانى دۇرىس پايدالانباۋ سالدارىنان العان جاراقاتتارىنا بايلانىستى مەديسينالىق كومەككە جۇگىندى. جەدەل جاردەم قىزمەتى ديرەكتورىنىڭ ورىنباسارى اندرەي لوجكين، اتا-انالاردى مەرەكە كەزىندە بالالاردى مۇقيات باقىلاۋعا شاقىردى.
«ءبىز بالالاردى وتشاشۋلار مەن پەتاردالاردى ۇشىرۋعا جول بەرمەۋدى ۇسىنامىز. بۇل قايعىلى وقيعالاردى بولدىرماۋعا كومەكتەسەدى»، - دەدى سپيكەر.
تجد جانە پوليسيا وكىلدەرى الماتىدا «پيروتەحنيكا» وپەراسياسى جۇرگىزىلىپ جاتقانىن حابارلادى. 19 جەلتوقسانداعى جاعداي بويىنشا پيروتەحنيكالىق ونىمدەردىڭ 141 قورابى جانە بىرنەشە رەت اتىلاتىن «VIP ساليۋت» وتشاشۋلارىنىڭ 125ء-ى تاركىلەندى. پيروتەحنيكانى زاڭسىز ساتۋدىڭ 22 فاكتىسى انىقتالدى. تاركىلەنگەن ءونىمنىڭ جالپى سالماعى 365 كگ قۇرادى. بۇل باعىتتاعى جۇمىس جالعاسۋدا.
«قالا اۋماعىندا 145 ءموبيلدى توپ جۇمىس ىستەيدى. ءبىزدىڭ مىندەتىمىز — ءقاۋىپتى ونىمدەردى ساتۋدىڭ الدىن الۋ جانە اسىرەسە كامەلەتكە تولماعاندار اراسىندا جاراقات الۋ ءقاۋپىن بولدىرماۋ»، — دەدى پوليسيا باسشىسىنىڭ ورىنباسارى تيمۋر سەرىك ۇلى.
سونىمەن قاتار، تج دەپارتامەنتىمەن 72 قالالىق شىرشا مەن 17 مۇز ايدىنى تەكسەرىلدى. مەنشىك يەلەرىنە ءورت قاۋىپسىزدىگى شارالارىن كۇشەيتۋ بويىنشا ۇسىنىستار بەرىلدى.
سپيكەرلەر پيروتەحنيكامەن ءقاۋىپسىز جۇمىس ىستەۋدىڭ نەگىزگى ەرەجەلەرىن ەسكە سالدى:
* ونىمدەردى تەك مامانداندىرىلعان دۇكەندەردەن ساتىپ الىڭىز، قاپتامانىڭ تۇتاستىعىن جانە جارامدىلىق مەرزىمىن تەكسەرىڭىز.
* پيروتەحنيكانى جىلۋ مەن ىلعالدان الىس ۇستاڭىز.
* ىسكە قوسۋ كەزىندە ادامداردان، عيماراتتاردان جانە اعاشتاردان 50 مەتر قاشىقتىقتى ساقتاڭىز.
* ءفيتيلدى تۇتاتۋ كەزىندە ونىمگە ەڭكەيمەڭىز.
* 16 جاسقا دەيىنگى بالالاردى ءوز بەتىنشە تۇتاتۋلارىنا جول بەرمەڭىز.
«وسى قاراپايىم ەرەجەلەردى ساقتاۋ ورتتەر مەن جاراقاتتاردان اۋلاق بولۋعا، مەرەكەنى ءقاۋىپسىز ءارى قۋانىشتى ەتۋگە كومەكتەسەدى»، — دەپ اتاپ ءوتتى دۋلات جاندار.
سپيكەرلەر بريفينگ سوڭىندا قايعىلى جاعدايلاردى بولدىرماۋ ءۇشىن الماتى تۇرعىندارىن جاڭا جىلدى مەرەكەلەۋگە جاۋاپكەرشىلىكپەن قاراۋعا شاقىردى.