قازاقستاننىڭ بۇرىنعى مادەنيەت جانە سپورت ءمينيسترى ارىستانبەك مۇحامەدي ۇلى پرەزيدەنت قاسىم-جومارت توقايەۆقا اشىق حات جولداپ، مەملەكەت باسشىسىنىڭ ادىلەتتى قوعام قۇرۋ باعىتىنداعى باستامالارىن قولدايتىنىن جەتكىزدى. ول ءوز ۇندەۋىندە بىرنەشە ماسەلەنى قوزعاپ، قۇقىق بۇزۋشىلىقتارعا قاتىستى دەرەكتەردى بايانداپ، زاڭسىزدىقتارمەن كۇرەسۋ قاجەتتىگىن اتاپ ءوتتى، - دەپ حابارلايدى aqshamnews.kz
مۇحامەدي ۇلى ءوز حاتىندا 2016 جىلى مينيستر بولعان كەزىندە كۇماندى كومپانياعا 3 ميلليون دوللار اۋدارۋعا قارسى بولعانىن، ونىڭ ورنىنا بۇل قاراجاتتى ءىلياس ەسەنبەرليننىڭ «كوشپەندىلەر» تريلوگياسىنىڭ جەلىسىمەن تۇسىرىلگەن «الماس قىلىش» تاريحي فيلمىنە باعىتتاعانىن اتاپ ءوتتى. «مەن بۇل شەشىمدى ادىلەتتىلىك پەن مەملەكەتتىك رەسۋرستاردى قورعاۋ ماقساتىندا قابىلدادىم»، – دەدى ول.
ەكس-مينيستر سوت جانە مەملەكەتتىك قۇرىلىمدارداعى كەيبىر ماسەلەلەردى ايتا كەلە، ادىلەتسىزدىك پەن زاڭسىزدىقتى مىسالدارمەن كەلتىردى. سونىڭ ءبىرى – الماتى قالاسىنىڭ الاتاۋ اۋداندىق سوتىنىڭ سۋدياسى د.س. ايقۇلوۆتىڭ 2024 جىلى كريپتوۆاليۋتا ارقىلى مۇلىككە تولەم جاساعان ارمان بايقادامنىڭ پايداسىنا شەشىم شىعارۋى. مۇحامەدي ۇلىنىڭ ايتۋىنشا، بۇل شەشىم زاڭسىز ءارى ادىلەتسىز، سەبەبى قازاقستاندا كريپتوۆاليۋتانىڭ اينالىمىنا تىيىم سالىنعان بولاتىن.
سونداي-اق، ول استانا قالاسىنىڭ سۋدياسى ا. قارىموۆا ءۇش رەت ازاماتتىق-پروسەسسۋالدىق كودەكستى بۇزىپ، ءبىر ءىستى سەرىك قارىمساقوۆتىڭ پايداسىنا شەشكەنىن ايتىپ ءوتتى. مۇحامەدي ۇلى بۇل ارەكەتتەردى زاڭعا قايشى دەپ باعالاپ، سوت جۇيەسىنىڭ ادىلدىگى مەن تاۋەلسىزدىگىنە كۇمان كەلتىردى.
ەكس-مينيستر ەلگە اكتيۆتەردى قايتارۋ باستاماسى اياسىندا بولعان جاعدايدى دا مىسالعا كەلتىردى. 2024 جىلدىڭ اقپان ايىندا «Nomad Land’s» ج ش س رەسپۋبليكالىق جوعارى سپورت شەبەرلىگى مەكتەبىن مەملەكەتكە قايتارۋدى ۇسىنعانىمەن، سوت بۇل كەلىسىمدى جارامسىز دەپ تانىعان. كەيىن جوعارعى سوت بۇل مۇلىكتى جەكە مەنشىككە بەرۋ تۋرالى شەشىم شىعارىپ، ونى قىلمىستىق توپتىڭ مۇددەسىنە قىزمەت ەتەتىن تۇلعاعا تاپسىرعان.
مۇحامەدي ۇلى، سونىمەن قاتار، مەملەكەتتىك باعدارلامالاردى باقىلاۋ ماسەلەسىن قوزعاپ، پرەزيدەنت جارلىعىمەن قۇرىلعان جوعارعى اۋديتورلىق پالاتا جۇمىسىنا كەيبىر سوتتاردىڭ باعىنبايتىنىن العا تارتتى.
سوڭىندا ەكس-مينيستر مەملەكەت باسشىسىنان زاڭسىزدىقتارعا توسقاۋىل قويۋدى سۇراپ: «سىزدەن زاڭسىزدىق پەن ءسىزدىڭ ساياساتىڭىزعا قارسى ارەكەتتەردى توقتاتۋدى وتىنەمىن»، – دەپ جازدى.
ەسكە سالايىق، مۇحامەدي ۇلى 2022 جىلى حالىقارالىق كورمە ءۇشىن بولىنگەن 221 ميلليون تەڭگەنى جىمقىرۋ ءىسى بويىنشا 8 جىلعا باس بوستاندىعىنان ايىرىلعان بولاتىن. كەيىن ونىڭ جازاسى پارا الۋعا وقتالۋ دەرەگى ءۇشىن 11 جىلعا دەيىن ۇزارتىلدى.