الماتىلىقتار ايتماتوۆتىڭ اتاقتى «جامييلا» شىعارماسى بويىنشا قويىلعان ميۋزيكلدىڭ پرەمەراسىن تاماشالادى، دەپ حابارلايدى اqshamnews.kz ءتىلشىسى.
شاھاردىڭ باس سارايىندا وتكەن مۋزىكالىق سپەكتاكلدى الماتىلىقتارعا تارتۋ ەتكەن قىرعىزستاننىڭ توقتىقۇل ساتىلعانوۆ اتىنداعى ۇلتتىق فيلارمونياسى. العاشقى پرەمەرا بىلتىر كوكتەمدە قىرعىزستاندا وتكەن، بيىلعى گاسترول الماتى ساحناسىنان باستالدى. سپەكتاكل بۇدان ءارى باكۋ، تاشكەنت، انكارا جانە ەۋروپانىڭ بىرنەشە قالاسىندا كورسەتىلەدى.
قويىلىم باستالار الدىندا كەشتىڭ شىمىلدىعىن اشقان ق ر مەملەكەتتىك كەڭەسشىسى ەرلان قارين قازاق پەن قىرعىز اراسىنداعى مادەني بايلانىستارعا توقتالدى:
«بۇگىن رەسپۋبليكا سارايىندا ەرەكشە كەش. بۇل شارا ءبىزدىڭ باسىمىزدى بىرىكتىرەدى. قازاق پەن قىرعىز – توسكەيدە مالى، توسەكتە باسى قوسىلعان باۋىرلاس حالىق. ەكى حالىقتى مادەنيەت، ءداستۇر، ونەر مەن تاريحتاعى تانىمال تۇلعالار سياقتى بىرىكتىرەتىن ورتاق دۇنيەمىز كوپ. كۇنى كەشە وش قالاسىندا ابايعا ارنالعان مۋزەي اشىلدى، ال بۇگىن الماتىدا «جامييلا» ميۋزيكلى ساحنالانادى، – دەدى ەرلان تىنىمباي ۇلى.
قىرعىز ەلىنىڭ اتىنان ءسوز العان مەملەكەتتىك حاتشى مارات يمانقۇلوۆ بۇل پرەمەرانىڭ دوستىقتىڭ سيمۆولى ەكەنىن اتاپ ءوتتى:
«شىڭعىس ايتماتوۆتىڭ ەسىمى قىرعىز بەن قازاق مادەنيەتى ءۇشىن ورتاق. ال جازۋشىنىڭ شىعارماشىلىعىن العاش قولداعان – قازاق ادەبيەتىنىڭ ءدۇلدىلى مۇحتار اۋەزوۆ. سوندىقتان بۇل ميۋزيكلدىڭ الماتى ساحناسىندا ءوتۋىنىڭ ەرەكشە ءمانى بار، – دەدى مارات يمانقۇلوۆ.
«جامييلا» – ءجاميلا ەسىمدى كۇيەۋى سوعىسقا كەتكەن جاس كەلىنشەك پەن مايداننان جارالى بولىپ ورالعان دانياردىڭ اراسىندا ماحاببات تاريحىن ءجاميلانىڭ قاينىسى سەيتتىڭ اۋزىمەن باياندايتىن شىعارما.
سۋرەتشى بولۋدى ارمانداعان جاس بالانىڭ جەڭگەسى مەن دانياردىڭ سۋرەتىن سالامىن دەگەن ارمانى، جاس جۇبايلاردىڭ اراسىنا سوعىس سالعان سىزات، جۇرەكپەن سەزىلگەن نازىك ماحاببات – چوڭ شىڭعىستىڭ قۋاتتى قالامىنان تۋعان شىعارمانىڭ نەگىزگى ارقاۋى، وسىنىڭ ءبارىن قىرعىز ارتىستەرى ميۋزيكل ارقىلى كورەرمەنگە جەتكىزە ءبىلدى. ايتماتوۆتىڭ تالاي رەجيسسەردى شابىتتاندىرعان بۇل شىعارماسىنداعى ادامگەرشىلىك بىرلىك، ءوزارا كومەك پەن رۋحاني توزىمدىلىك تاقىرىبى سپەكتاكلدە ەرەكشە كورىنىس تاپتى.
دانيار ءرولىن قۇرالبەك چوكويەۆ، ءجاميلا ءرولىن سىرعا ساعىنبەكوۆا سومدادى. حورەوگرافيانى باس بالەتمەيستەر ەرلان قامىتبەكوۆ قويعان، قويىلىمنىڭ مۋزىكاسىن جازعان كومپوزيتور مىرزالي جيەنبايەۆ. ميۋزيكلدىڭ باس ۇيلەستىرۋشى-جەتەكشىسى قىرعىزستاننىڭ حالىق ءارتىسى قىرعىزباي وسمونوۆ، قويۋشى – قىرعىزستاننىڭ ەڭبەك سىڭىرگەن ءارتىسى بولوت تەنتيمىشيەۆ.
شىڭعىس ايتماتوۆتىڭ ءجۇز جىلدىق مەرەيتويىنا ارنالعان حالىقارالىق جوبا كورەرمەنگە رۋحاني ءارى ەستەتيكالىق ءلاززات سىيلاپ، قازاق-قىرعىزدىڭ مادەني بايلانىسىن جاڭا دەڭگەيگە كوتەردى.