ءال-فارابي اتىنداعى قازۇۋ-دا جۋرناليستيكا فاكۋلتەتىنىڭ ۇيىمداستىرۋىمەن «مەديايندۋستريا جانە ءبىلىم بەرۋدەگى سەرىكتەستىك: كادر دايارلاۋ ماسەلەلەرى» تاقىرىبىندا رەسپۋبليكالىق جۇمىس بەرۋشىلەر فورۋمى ءوتتى، دەپ حابارلايدى aqshamnews.kz
شاراعا ەلىمىزدىڭ جەتەكشى مەديا ۇيىمدارىنىڭ، باسپا ۇيلەرىنىڭ جانە PR-كومپانيالاردىڭ باسشىلارى مەن ساراپشىلارى قاتىستى.
فورۋمدا قازىرگى مەديانارىقتاعى وزگەرىستەر، سيفرلىق ترانسفورماسيا، جاس ماماندارعا قويىلاتىن جاڭا تالاپتار، سونداي-اق ۋنيۆەرسيتەت پەن يندۋستريا اراسىنداعى سەرىكتەستىكتى نىعايتۋ جولدارى تالقىلاندى.
جۋرناليستيكا فاكۋلتەتىنىڭ دەكانى قانات اۋەسباي فورۋمدى اشىپ، مەديا سالاسىنىڭ جىلدام دامۋى جاعدايىندا ءبىلىم بەرۋ باعدارلامالارىن جاڭعىرتۋ جانە ەڭبەك نارىعىنىڭ سۇرانىسىنا بەيىمدەۋ قاجەتتىگىن اتاپ ءوتتى. ول مەديا نارىعىنداعى قارقىندى وزگەرىستەر جاعدايىندا كادر دايارلاۋدىڭ جاڭا ستاندارتتارىن قالىپتاستىرۋ مەن ەنگىزۋدە فورۋمنىڭ ماڭىزى زور ەكەنىن اتاپ ءوتتى. دەكان سونداي-اق قازۇۋ مەن سالا سەرىكتەستەرى اراسىنداعى ىنتىماقتاستىق تۇلەكتەردىڭ باسەكەگە قابىلەتتىلىگىن ارتتىرۋدا شەشۋشى ءرول اتقاراتىنىن ايتتى.
بەينەماتەريال كورسەتىلگەننەن كەيىن سپيكەرلەر مەديا جانە ءبىلىم بەرۋ سالالارى اراسىنداعى ديالوگقا كوشتى. فورۋم سپيكەرلەرى سيفرلىق جۋرناليستيكا، مەديا ترانسفورماسياسى، جاس ماماندارعا قويىلاتىن تالاپتار، سونداي-اق ۋنيۆەرسيتەتتەر مەن يندۋستريا اراسىنداعى سەرىكتەستىكتىڭ باسەكەگە قابىلەتتى كادرلار دايارلاۋداعى ءرولى بويىنشا وزەكتى پىكىرلەرىن ورتاعا سالدى.
فورۋمعا بىلىكتى مەديامەنەدجەر نۇرجان جالاۋ قىزى، «Alatau Aqparat» مەدياحولدينگىنىڭ باس ديرەكتورى ەرجان تولەك، «IRIS PR CONSULTING» PR ءبولىمىنىڭ جەتەكشىسى ىرىس امانگەلدى، «NAR MEDIA GROUP» كومپانياسىنىڭ ديرەكتورى نارتاي وتەگەن، ق ر ۇلتتىق مەملەكەتتىك كىتاپ پالاتاسى ديرەكتورىنىڭ ورىنباسارى تولقىن تۇرعالي قىزى، Abai TV باس پروديۋسەرى جاڭىلحان اسىلبەكوۆا، «اباي.kz» اقپاراتتىق پورتالىنىڭ باس رەداكتورى نۇرگەلدى ءابدىعاني جانە باسقا دا جۋرناليستەر قاتىستى.
قاتىسۋشىلار جۇمىس بەرۋشىلەر مەن ۋنيۆەرسيتەت اراسىنداعى بايلانىستاردى نىعايتۋ، ستۋدەنتتەردىڭ تاجىريبەدەن ءوتۋ، تاعىلىمداما مەن العاشقى جۇمىس ورنىن تابۋىن جەڭىلدەتۋ تەتىكتەرىن قاراستىردى. جاڭا مەديا-قۇزىرەتتەرگە قويىلاتىن تالاپتاردى جاڭارتۋ دا نەگىزگى تاقىرىپتاردىڭ ءبىرى بولدى.
فورۋم اياسىندا جۇمىس بەرۋشىلەرمەن مەموراندۋمدارعا قول قويىلىپ، سەرىكتەستەر ماراپاتتالدى. سونىمەن قاتار ستۋدەنتتەرگە جۇمىس بەرۋشىلەرمەن تىكەلەي كەزدەسۋگە مۇمكىندىك بەرگەن «ماماندىقتار جارمەڭكەسى» ۇيىمداستىرىلدى.