«قازپوشتا» قىتايدان كەلەتىن تاۋارلاردى ۋاقتىلى جەتكىزۋ ءۇشىن قانداي شارۋالار اتقارىپ جاتىر. بۇگىنگى تاڭدا راسىمدەۋدەن وتەتىن كولىكتەر سانىن تاۋلىگىنە قر-دان قحر-عا ەكى ەسەگە جۋىق ارتتىرۋعا مۇمكىندىك بار.
ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن كەڭەستە «قازپوشتا» اق قىزمەتىنىڭ وزەكتى ماسەلەلەرى قارالدى. بۇل تۋرالى اlmaty-akshamy.kz حابارلايدى ۇكىمەتتىڭ باسپا ءسوز قىزمەتىنە سىلتەمە جاساپ.
كومپانيا باسشىسى اسەل جاناسوۆا اتقارىلىپ جاتقان جۇمىستار، اعىمداعى كورسەتكىشتەر مەن حالىققا قىزمەت كورسەتۋدىڭ تۇراقتىلىعىن قامتاماسىز ەتۋ جونىندەگى شارالار تۋرالى باياندادى. سونىمەن قاتار كەڭەسكە قاتىسۋشىلار ۇلتتىق پوشتا وپەراتورىن قولداۋ جانە ودان ءارى دامىتۋ بويىنشا ۇسىنىستاردى قارادى.
بۇدان باسقا، قازاقستان-قىتاي شەكاراسىنداعى «نۇر جولى» شەكارالىق وتكىزۋ بەكەتى ارقىلى جۇك كولىكتەرىنىڭ، ونىڭ ىشىندە «قازپوشتا» جەلىسى بويىنشا وتۋىنە كەدەرگىلەردى جويۋ جونىندەگى تاپسىرمالاردىڭ ورىندالۋ بارىسى تالقىلاندى.
پرەمەر-مينيسترگە بۇگىنگى تاڭدا راسىمدەۋدەن وتەتىن كولىكتەر سانىن تاۋلىگىنە قر-دان قحر-عا ەكى ەسەگە جۋىق، قحر-دان قر-عا 40%-عا ارتتىرۋ مۇمكىن بولعانى باياندالدى. بۇل رەتتە ءاليحان سمايىلوۆ قىسقا مەرزىمدە ودان دا جوعارى ناتيجەلەرگە قول جەتكىزۋ ءۇشىن اكىمشىلىك پروسەستەردى جەدەلدەتۋدى تالاپ ەتتى.