الماتىلىق تۇرعىندارعا شەتەلدە «بەدەلدى» ءبىلىم الۋعا جاردەمدەسەمىن دەگەن الاياق قۇرىقتالدى.
كەيبىر اتا-انالار بالالارىن شەتەلدىك ۇزدىك ۋنيۆەرسيتەتتەردە وقىتقىسى كەلەدى. ەڭ جاقسى جانە قولايلى ۋنيۆەرسيتەتتى تاڭداعان كەزدە ازاماتتار “ءبىلىم سالاسىنداعى شەتەلدىك مامانداردىڭ” قىزمەتىنە ءجيى جۇگىنەدى. دەگەنمەن مامانسىماقتار ازاماتتاردىڭ سەنگىشتىگىن پايدالانا وتىرىپ، كومەكتەسپەگەنىمەن قويماي، ءسىزدىڭ اقشاڭىز بەن ۋاقىتىڭىزدى وڭاي تارتىپ الا الاتىنىن ءبىلۋ كەرەك.
«ءبىرقاتار الاياقتىق جاسادى دەگەن كۇدىكپەن ءبىز 46 جاستاعى ب. ەسىمدى كۇدىكتىنى ۇستادىق. بولجام بويىنشا، ايەل ادام ازاماتتاردىڭ اڭقاۋلىعىن پايدالانىپ، شەتەلدە بەدەلدى ءبىلىم الۋعا ۋادە بەرىپ، ءىرى كولەمدە اقشانى الىپ كەتكەن. ول جۇڭگو، اقش، گەرمانيا سياقتى ەلدەردە وقۋ ورنىن ىزدەۋ جانە تاڭداۋ بويىنشا قىزمەت كورسەتۋگە جالعان كەلىسىم-شارتتار جاساپ، سەنگىش اتا-انالاردى جوو-نا 100% قابىلدايدى دەپ سەندىردى. قابىلداۋمەن قاتار، ايەل ادام، “كليەنتتەردى” اقىسىن تولەسە، وسى ۋنيۆەرسيتەتتەردە سەسسيادان وتۋگە كومەكتەسەتىنىنە سەندىرگەن. ءبىراق بۇل ۋادەلەر ءسوز جۇزىندە عانا قالعان. الدانعان ازاماتتار ءىىو-عا كومەك سۇراپ جۇگىندى»، – دەدى بوستاندىق اۋداندىق پوليسيا باسقارماسىنىڭ باستىعى ماقسات قاناپيايەۆ.
قازىرگى ۋاقىتتا كۇدىكتىنىڭ جەكە باسى بۇرىن جاسالعان وسىعان ۇقساس قىلمىستارعا قاتىسى بار-جوعى تەكسەرىلىپ جاتىر. بۇل دەرەكتەر ق ر قك-نىڭ 190-بابىنىڭ 3-بولىگى (الاياقتىق) بويىنشا تىركەلدى. قىلمىستىق ءىس بويىنشا باسقا دا مالىمەتتەر ق ر قپك-نىڭ 201-بابى جانە ق ر كونستيتۋسياسىنىڭ نورمالارىنا سايكەس جاريا ەتۋگە جاتپايدى.