جۇڭگو پاندەمياعا بايلانىستى ساياساتىن وزگەرتتى. ال شەكاراداعى كەزەك ءالى سول قالپى.
سەنات ءتوراعاسى ماۋلەن اشىمبايەۆ 2023-2027 جىلدارعا ارنالعان رەسپۋبليكالىق بيۋدجەتتى ناقتىلاعان وتىرىستا وسىلاي دەپ ءمالىم ەتتى، دەپ حابارلايدى اlmaty-akshamy.kz قازاقپارات-قا سىلتەمە جاساپ.
«ينفلياسيا قىسىمىن باسەڭدەتۋدىڭ ءبىر فاكتورى – قازاقستان-قىتاي شەكاراسىنداعى لوگيستيكا. بىزگە قىتايدان ۇلكەن كولەمدە تاۋار كەلەدى. شەكارادا نەعۇرلىم كەپتەلىس كوپ بولىپ، كەزەك قالىپتاسىپ، قيىندىق تۋىنداسا، دەلدالدار، اقشا جينايتىندار سوعۇرلىم كوبەيەدى، جەمقورلىق سوعۇرلىم ارتادى. ونداي «الىمدار» ەلدەگى تۇتىنۋشىنىڭ قالتاسىنا سالماق تۇسىرەدى. ياعني، شەكاراداعى احۋالدى تازارتۋ ارقىلى، توسقاۋىلدار مەن دەلدالداردى، قانداي دا ءبىر جەمقورلىق سحەمالاردى جويا وتىرىپ، باعانىڭ الدەقايدا تومەن بولۋىنا ىقپال ەتەمىز»، - دەدى ول.
سەنات سپيكەرىنىڭ ايتۋىنشا، كەيىنگى كەزدە كاسىپكەرلەردەن شاعىم ءجيى تۇسەتىن بولعان.
«شەكارادا جۇك كولىكتەرى وتە كوپ قاڭتارىلاتىن بولعان. ءتىپتى قىتايدىڭ ءوزى رەجيمدى ليبەرالداندىرىپ، جەڭىلدەتكەنىنە قاراماستان، پروبلەما سول كۇيى قالىپ وتىر. مەملەكەت باسشىسىنىڭ وسى باعىتتاعى تاپسىرماسىن ورىندايتىن ۋاقىت كەلدى. سەناتورلار دا بۇل ىسپەن بەلسەندى اينالىسۋعا دايىن. بۇل جەردە وسىعان (شەكارادا قيىندىقتار بولۋىنا-رەد.) مۇددەلى تۇلعالار، جەمقورلار از ەمەس سياقتى. شەكاراداعى بۇكىل پروسەستەردى سيفرلاندىرىپ، اۆتوماتتاندىرۋ كەرەك. قىتايلىقتار وعان قارسى دەپ ويلامايمىن. ولار مۇنداي باستامانى تولىقتاي قولدايدى. كەدەن جانە وزگە قۇرىلىمدار تاراپىنان جاساندى جولمەن قويىلىپ وتىرعان توسقاۋىلداردى الىپ تاستاۋ قاجەت. مەنىڭ ويىمشا، قىتايمەن شەكاراداعى جاعداي - ەلدەگى باعاعا تىكەلەي اسەر ەتەتىن ماڭىزدى فاتكورلاردىڭ ءبىرى. ءبىز بۇل فاكتوردى جويا الامىز دەپ ويلايمىن. ول فاكتور كوپ جاعدايدا قولدان جاسالعان. پاندەميا اياقتالۋعا جاقىن. جۇڭگو ءوز ساياساتىن وزگەرتتى. ال شەكاراداعى كەزەك ءالى سول قالپى. بۇل، ارينە، ۇلكەن سۇراقتاردى تۋىنداتادى. ۇكىمەت بۇل ماسەلەمەن مىقتاپ اينالىسادى دەپ ويلايمىن. سەنات دەپۋتاتتارى دا ونى باقىلاۋدا ۇستايدى»، - دەدى سەنات ءتوراعاسى.