بۇگىن Nur Otan پارتياسىنىڭ كەزەكتەن تىس سەزى ءوتتى. پارتيا AMANAT دەپ اتىن وزگەرتتى. سەزدە اتاۋىنان باسقا، كوپتەگەن وزگەرىستەر ورىن الدى. بۇگىنگى تاڭدا ساياسي الاڭنىڭ ەڭ باستى كريتەرييى – قازىرگى قوعامنىڭ تالاپتارىن ەسەپكە الۋ.
ءاربىر ساياسي ينستيتۋت وزگەرىستەرگە ۇشىراۋى ءتيىس. اسىرەسە، حالىقتىڭ مۇددەلەرىنەن شىعاتىن ساياسي پارتيالار ءۇشىن بۇل قالىپتى جاعداي. ساياسي پارتيانىڭ تەورياسى بويىنشا پارتيانىڭ سىرتقى جانە ىشكى فۋنكسيالارى بار.
ىشكى فۋنكسيالارعا پارتيانىڭ قۇرىلىمى مەن قارجىلاندىرۋى كىرەدى. ال سىرتقى قىزمەت حالىقپەن قارىم-قاتىناس ورناتۋعا، بيلىكتىڭ حالىق مۇددەلەرىن نەگىزگە الۋعا ۇمتىلۋىنا باعىتتالعان. سوندىقتان كەز كەلگەن ساياسي پارتيانىڭ باستى كۇشى – حالىق. ونىڭ قىزمەتى دە حالىققا بايلانىستى. ياعني، پارتيانىڭ باستى ماقساتى – حالىقتى تولعاندىراتىن ماسەلەلەردى شەشۋدە بولۋى ءتيىس.
پارتيانىڭ اۋديتورياسى كەڭ، مۇشەلەرى كوپ، ەلەكتوراتى بار. ەگەر پارتيا بۇل اۋديتوريانىڭ وي-پىكىرلەرىن جيناۋعا، پروبلەمالاردى تالداۋعا جانە ولاردى وكىلەتتى ارنالار ارقىلى شەشۋگە باعىتتالعان جۇمىستى تۇراقتى نەگىزگە قوياتىن بولسا، وندا ول قوعامداعى قارسىلىقتى ازايتا الادى.