1-18 شىلدە ارالىعىندا قازاقستان رەسپۋبليكاسىنىڭ اۋماعىندا ءىىم جەدەل قىزمەتتەرى 97 قىلمىسكەردى ۇستادى، ونىڭ 28ء-ى شەت مەملەكەتتەردىڭ سۇراۋى بويىنشا.
سونىمەن قاتار حابار-وشارسىز كەتكەن 115 ادامنىڭ ورنالاسقان جەرى انىقتالدى، دەپ حابارلايدى almaty-akshamy.kz Polisia.kz-كە سىلتەمە جاساپ.
الماتىدا ىزدەۋدە جۇرگەن وزبەكستاندىق ازامات ۇستالدى. ەر ادام كورشى مەملەكەتتىڭ ۆەتەريناريا جانە مال شارۋاشىلىعىن دامىتۋ كوميتەتى بولگەن 400 ملن تەڭگەدەن استام سۋبسيديانى جىمقىردى دەپ كۇدىككە ىلىنگەن. ماڭعىستاۋ پوليسەيلەرى جاڭاوزەن تۇرعىنىنا دەنە جاراقاتىن كەلتىرگەن بۇزاقىنى ۇستادى. ۇستالعانداردىڭ بارلىعى ۋاقىتشا ۇستاۋ يزولياتورلارىنا قامالدى. ايتا كەتۋ كەرەك، قىلمىسكەرلەردى ىزدەستىرۋ تەك قازاقستان رەسپۋبليكاسىنىڭ اۋماعىندا عانا ەمەس، سونىمەن قاتار حالىقارالىق كەلىسىمدەر نەگىزىندە شەت ەلدەردە دە جۇزەگە اسىرىلىپ، وندا ىزدەستىرۋ توپتارى جىبەرىلەدى.
ماسكەۋ وبلىسىنىڭ حيمكي قالاسىندا رەسەيلىك ارىپتەستەرمەن بىرلەسىپ جەدەل-ىزدەستىرۋ ءىس-شارالارىن وتكىزۋ كەزىندە قازاقستاندىق ازاماتتار قۇرىقتالدى. ولار وتكەن جىلدىڭ قاڭتار ايىندا شىمكەنتتە جەرگىلىكتى تۇرعىنداردى ۇرىپ-سوققان. جابىرلەنۋشىلەردىڭ ءبىرى العان جاراقاتتارىنان كوز جۇمعان. اتالمىش ءىس بويىنشا بارلىق كۇدىكتىلەر ۇستالدى. سانكت-پەتەربۋرگ قالاسىندا 36 جاستاعى ەر ادام قۇرىقتالدى. ول 2019 جىلى سەمەيلىك تۇرعىندى الداپ، قۇنى 50 ملن تەڭگە بولاتىن بۋلدوزەردى يەمدەنگەن. قازاقستان رەسپۋبليكاسى مەن رەسەي فەدەراسياسىنىڭ قۇزىرلى ورگاندارى ۇستالعانداردى ەكستراديسيالاۋ تۋرالى ماسەلەنى قاراستىرىپ جاتىر.